مرزا غالب

غالب مرے کلام میں کیوں کر مزہ نہ ہو
پیتا ہوں دھو کے خسروِ شیریں سخن کے پاؤں
حضورِ شاہ میں اہلِ سخن کی آزمائش ہے
چمن میں خوش نوایانِ چمن کی آزمائش ہے

امام بخش ناسخ

سوائے اہلِ سخن ہو مشاہدہ کس کو
نہاں ہے شاہد معنی سخن کے پردے میں

حیدر علی آتش

پاتا نہیں میں یار کو میل سخن ہنوز
معدوم ہے کمر کی طرح سے دہن ہنوز
آشنا گوش سے اس گل کے سخن ہے کس کا
کچھ زباں سے کہے کوئی یہ دہن ہے کس کا

شیخ ابراہیم ذوق

آیا ہوں نور لے کے میں بزمِ سخن میں ذوقؔ
آنکھوں پہ سب بٹھائیں گے اہلِ سخن مجھے

مصحفی غلام ہمدانی

میں سنا مصحفیؔ کو پیری میں
مجھ کو خیلے وہ خوش سخن سا لگا
مصحفیؔ کیوں نہ کہے تجھ کو کوئی طوطی ہند
جب تو اس وضع کرے فکرِ سخن آئنے میں
مشتاق ہی دل برسوں اس غنچہ دہن کا تھا
یارو مرے اور اس کے کب ربط سخن کا تھا

فیض احمد فیض

ستم کی رسمیں بہت تھیں لیکن، نہ تھی تری انجمن سے پہلے
سزا، خطائے نظر سے پہلے ، عتاب جرمِ سخن سے پہلے
قندِ دہن، کچھ اس سے زیادہ
لطفِ سخن، کچھ اس سے زیادہ

سراج الدین ظفر

اے سخن فہم ہم اس بزم سے آئے ہیں جہاں
حیرت آئینۂ اسلوب سخن تک پہنچے

عرفان صدیقی

اول اول اس سے کچھ حرف و نوا کرتے تھے ہم
رفتہ رفتہ رائیگاں کارِ سخن لگنے لگا
غزل تو خیر ہر اہلِ سخن کا جادو ہے
مگر یہ نوک پلک میرے فن کا جادوں ہے
تنہا ہوں سو اے میرے حریفو مری پہچان
رن میں بھی وہی بزمِ سخن میں بھی وہی ہے
اور کچھ راز نہیں راتوں کی بیداری کا
ہم بھی ہیں شیفتۂ شعر و سخن، وہ بھی ہے
حقیقتیں تو بہت ہیں بیان کرنے کو
خدا کرے مری تابِ سخن بھی زندہ رہے
موتیوں سے منہ بھرے دیکھو تو یہ مت پوچھنا
لوگ کیوں چپ ہو گئے تابِ سخن ہوتے ہوئے

مجید امجد

تنہا گلی، ترے مرے قدموں کی چاپ، رات
ہرسو وہ خامشی کہ نہ تابِ سخن پڑے
جب انجمن تموجِ صد گفتگو میں ہو
میری طرف بھی اک نگہِ کم سخن پڑے

الطاف حسین حالی

ہیں فصاحت میں مثل واعظ و حالیؔ دونوں
دیکھنا یہ ہے کہ بے لاگ سخن کس کا ہے

رئیس فروغؔ

ایسے ظالم ہیں مرے دوست کہ سنتے ہی نہیں
جب تلک خون کی خوشبو نہ سخن سے آئے

احسان دانش

جسے ہے فیض مری خانقاہ سے دانشؔ
وہ کس طرح مرا رنگِ سخن چھپائے گا

اختر شیرانی

غمِ زمانہ کی سختیوں سے ہوئی ہے پامال طبع اخترؔ
نہ وہ نشاط کہن ہے باقی نہ وہ مذاق سخن ہے باقی

ادا جعفری

کس موڑ پر ہیں آج ہم اے رہ گزار ناز
اب درد کا مزاج کسی ہم سخن سا ہے

بیخود بدایونی

ان کو دماغ پرسش اہل محن کہاں
یہ بھی سہی تو ہم کو مجال سخن کہاں

حسرت موہانی

تاثیر برقِ حسن جو ان کے سخن میں تھی
اک لرزش خفی مرے سارے بدن میں تھی
شیرینی نسیم ہے سوز و گداز میرؔ
حسرتؔ ترے سخن پہ ہے لطفِ سخن تمام

احمد فراز

ہم بھی شاعر تھے کبھی جانِ سخن یاد نہیں
تجھ کو بھولے ہیں تو دل داری فن یاد نہیں
ہم اہلِ دل ہیں ہماری اقلیم حرف کی ہے
کبھی تو جانِ سخن دیارِ سخن میں آؤ
گل بھی گلشن میں کہاں غنچہ دہن تم جیسے
کوئی کس منہ سے کرے تم سے سخن، تم جیسے

امیر مینائی

شاعر کو فکرِ شعر میں راحت کہاں امیر
آرام چاہتا ہے تو مشقِ سخن کو چھوڑ

شاذ تمکنت

بنا حسنِ تکلم حسنِ ظن آہستہ آہستہ
بہر صورت کھلا اک کم سخن آہستہ آہستہ
کسی کافر کی شوخی نے کہلوائی غزل مجھ سے
کھلے گا شاذؔ اب رنگِ سخن آہستہ آہستہ
وہ نیاز و ناز کے مرحلے نگہ و سخن سے چلے گئے
ترے رنگ و بو کے وہ قافلے ترے پیرہن سے چلے گئے
خوار و رسوا تھے یہاں اہلِ سخن پہلے بھی
ایسا ہی کچھ تھا زمانے کا چلن پہلے بھی
رفاقتوں میں بھی نکلیں رقابتیں کیا کیا
میں کیا کہوں ترا روئے سخن ہی ایسا تھا

فراق گورکھپوری

تیری آواز سویرا تری باتیں تڑکا
آنکھیں کھل جاتی ہیں اعجاز سخن کیا کہنا

کیفی اعظمی

وہ بھی سراہنے لگے اربابِ فن کے بعد
دادِ سخن ملی مجھے ترک سخن کے بعد

مجروح سلطان پوری

بلبلو اپنی نوا فیض ہے ان آنکھوں کا
جن سے ہم سیکھنے اندازِ سخن جاتے ہیں
مجھے نہیں کسی اسلوب شاعری کی تلاش
تری نگاہ کا جادو مرے سخن میں رہے

محسن نقوی

غزلوں کی دھنک اوڑھ مرے شعلہ بدن تو
ہے میرا سخن تو مرا موضوعِ سخن تو
عجب نشہ تھا مگر اس کی بخشش لب میں
کہ یوں تو ہم سے بھی کیا کیا نہ وہ سخن میں کھلا

ناصر کاظمی

بے حجابانہ انجمن میں آ
کم سخن محفلِ سخن میں آ
ہاں اے سکوت تشنگی درد کچھ تو بول
کانٹے زباں کے آبِ سخن کو ترس گئے
میکدہ بجھ گیا تو کیا رات ہے میری ہمنوا
سایہ ہے میرا ہم سبو چاند ہے میرا ہم سخن
ممکن نہیں متاعِ سخن مجھ سے چھین لے
گو باغباں یہ کنجِ چمن مجھ سے چھین لے
درد کانٹا ہے اس کی چبھن پھول ہے
درد کی خامشی کا سخن پھول ہے
زباں سخن کو سخن بانکپن کو ترسے گا
سخن کدہ مری طرزِ سخن کو ترسے گا