مرزا غالب

ہے کیا، جو کس کے باندھیے میری بلا ڈرے
کیا جانتا نہیں ہوں تمھاری کمر کو میں

انشاء اللہ خان انشا

باغباں کا یہ نہیں جرم نصیب اپنے کہ وہ
چھانٹ کر سب میں پکڑ میری کمر لیتا ہے
سر تو چاہے ہے مرا ہووے میسر تیرے
ہاتھ کا بازو کا زانو کا کمر کا تکیہ
آوے وہ اگر یار سفر کردہ تو انشاؔ
میں دوڑ کے کس لطف سے کھلواؤں کمر بند

حیدر علی آتش

مشتاق بندشوں کے ہیں خوابوں کو چاہیے
بندھوائیں شاعروں سے جو ان کی کمر کھلے
چلنا پڑے گا یار کی خدمت میں سر کے بل
سمجھے ہو کیا جو بیٹھے ہو آتشؔ کمر کھلے

داغ دہلوی

کہیں حسن سے بھی ہے کاہیدگی
نہ ہونے کے قابل کمر ہو گئی
نہ ہو نازک اتنا بھی مشاطہ کوئی
دہن دیکھ لینا کمر دیکھ لینا
میرا دلِ گم گشتہ جو ڈھونڈا نہیں ملتا
وہ اپنا دہن اپنی کمر دیکھ رہے ہیں

شیخ ابراہیم ذوق

ہم خوب ہیں واقف ترے انداز کمر سے
یہ تار نکلتا ہے کوئی دل کے گہر سے
حاضر ہیں مرے جذبۂِ وحشت کے جلو میں
باندھے ہوئے کہسار بھی دامن کو کمر سے
ناتوانی کا مری مجھ سے نہ پوچھو احوال
ہو مجھے دیکھتے یا اپنی کمر دیکھتے ہو
کوئی کمر کو تری کچھ جو ہو کمر تو کہے
کہ آدمی جو کہے بات سوچ کر تو کہے
اے ذوقؔ میں تو بیٹھ گیا دل کو تھام کر
اس ناز سے کھڑے تھے وہ رکھ کر کمر پہ ہاتھ

مصحفی غلام ہمدانی

ووہیں اپنی بھی ہے باریک تر از مو گردن
تیغ کے ساتھ یہاں ذکر کمر ہوتا ہے
بالوں نے ترے بلا دکھا دی
جب کھل کے وہ آ رہی کمر پر
کمر ہی کو تری پروا نہیں ہے کچھ اس کی
وگرنہ جعد تو کب تا کمر نہیں آتی
ڈرتا ہوں میں یہ گم نہ کرے آپ کو کہیں
پھر جعد کو ہوئی ہے رسائی کمر تلک
دل ہی اپنا ہے چینی مو دار
حصے آئے نہ وہ کمر سب کے
کروں مو و زلف کا کیا بیاں کہ عجیب قصہ ہے درمیاں
یہ ادھر کو سینے پہ آ رہی وہ ادھر کمر کے چلے گئے
کہنے کو گرچہ ہاتھ جدا ہیں مرے ولے
ہونے کو اس کا طوق و کمر دونوں ایک ہیں
رفتگی کا ہے یہ عالم کہ ترے وقت خرام
پاؤں جاتے ہیں کہیں اور کمر اور کہیں
ایک مدت ہوئی ہم وصف کمر کرتے ہیں
پر یہ معلوم نہیں اس کے کمر ہے کہ نہیں
جب دیکھتا ہوں ان کو تب تا کمر پڑے ہیں
یہ بال میرے جی کے پیچھے مگر پڑے ہیں

مومن خان مومن

یہ ناتواں ہوں کہ ہوں اور نظر نہیں آتا
مرا بھی حال ہوا تیری ہی کمر کا سا

جون ایلیا

کس طرح کوچ پر کمر باندھوں
ایک رہزن کی ہے کمر درپیش
درپیش ایک کام ہے ہمت کا ساتھیو
کسنا ہے مجھ کو میری کمر کس کے پاس ہے

جلیل مانک پوری

تیغ کیوں چلنے میں بل کھانے لگی
یہ تری نازک کمر کا کام ہے

جوش ملیح آبادی

پھر باوجود فقر وہ حاصل ہے طمطراق
تو یہ کہے کہ صاحب تاج و کمر ہیں ہم
کلہ فقر کو کج کر کے سر بزم نشاط
آؤ رسم کہن تاج و کمر تازہ کریں

عزیز حامد مدنی

کسی ایک سلسلۂ وفا کی متاع زلفِ دوتا نہیں
کوئی پیچ و تاب ہوا ملے کہ وہ زلف تا بہ کمر گئی

احمد فراز

کچھ تو کڑی کٹھور مسافت کا دھیان کر
کوسوں سفر پڑا ہے ابھی سے کمر نہ کھول
سنا ہے چشمِ تصور سے دشتِ امکاں میں
پلنگ زاویے اس کی کمر کے دیکھتے ہیں

امیر مینائی

چشمِ عشاق سے پنہاں ہو نظر کی صورت
وصل سے جان چراتے ہو کمر کی صورت
نہیں آتا ہے نظر، المدد اے خضر اجل
جادۂ راہِ عدم موئے کمر کی صورت
دہنِ یار کی توصیف کڑی منزل ہے
چست مضمون کی بندش ہو کمر کی صورت
ڈھونڈے سے بھی نہ معنی باریک جب ملا
دھوکا ہوا یہ مجھ کو کہ اس کی کمر نہ ہو

کلیم عاجز

مجھے کیا اگر ترے دوش سے تری زلف تا بہ کمر ہوئی
کہ میں ایسا خانہ خراب ہوں کبھی چھاؤں میں نہ بسر ہوئی
شانے کا بہت خونِ جگر جائے ہے پیارے
تب زلف کہیں تا بہ کمر جائے ہے پیارے