باقی صدیقی

ڈوب کر نبض ابھر آئی ہے
کیا کوئی ان کی خبر آئی ہے
میرے چہرے پہ تبسم کی طرح
اک شکن اور ابھر آئی ہے

جون ایلیا

شہر فراقِ یار سے آئی ہے اک خبر مجھے
کوچۂ یاد یار سے کوئی نہیں ابھر رہا

عرفان صدیقی

فیصلہ کر‘ کم و بیشِ تہہِ دریا کی نہ سوچ
مسئلہ ڈوبنے کا ہے ابھر آنے کا نہیں

رئیس فروغؔ

ہم اپنی فصل کاٹ رہے تھے تو کھیت میں
اک تازہ فصل کے نئے امکاں ابھر گئے

اسرار الحق مجاز

عقل کی سطح سے کچھ اور ابھر جانا تھا
عشق کو منزل پستی سے گزر جانا تھا

ماجد صدیقی

دل و نظر کی خموشیوں میں چھنکتے قدموں یہ کون آیا
کہ مثل مہتاب نطق میرا، لبوں سے میرے ابھر رہا ہے

جلیل مانک پوری

مے کشی سے نجات مشکل ہے
مے کا ڈوبا کبھی ابھر نہ سکا

رسا چغتائی

تو جو دل سے اتر گیا ہوتا
زخمِ دل کے ابھر گئے ہوتے

شاد عظیم آبادی

بشر حباب کی صورت ہمیں نظر آیا
بھری جو قطرہ کے اندر ہوا ابھر آیا
ریا تو دل میں تھی ماتھے پہ اب ہے اس کا نشاں
کہاں کا داغ کہاں دفعتاً ابھر آیا

شکیل بدایونی

جب کبھی ہم ترے کوچے سے گزر جاتے ہیں
لوح ادراک پہ کچھ اور ابھر جاتے ہیں

اختر ہوشیارپوری

ہوا میں خوشبوئیں میری پہچان بن گئی تھیں
میں اپنی مٹی سے پھول بن کر ابھر رہا تھا

ناصر کاظمی

میں تیرے درد کی طغیانیوں میں ڈوب گیا
پکارتے رہے تارے ابھر ابھر کے مجھے
صبح کا تارا ابھر کر رہ گیا
رات کا جادو بکھر کر رہ گیا