مرزا غالب

سبدِ گل کے تلے بند کرے ہے گلچیں!
مژدہ اے مرغ! کہ گلزار میں صیاد نہیں

امام بخش ناسخ

پھونک دیں نالۂ سوزاں سے اگر چاہیں قفس
ہم فقط خاطر صیاد کیا کرتے ہیں

انشاء اللہ خان انشا

دام میں سے جو چھٹے ہیں انہیں یہ حکمِ ہوا
کہ بس اب گرد درِ خانۂِ صیاد رہو

بہادر شاہ ظفر

قید سے تیری کہاں جائیں گے ہم بے بال و پر
کیوں قفس میں تنگ کرتا ہے ہمیں صیاد تو

داغ دہلوی

کون سا طائر گم گشتہ اسے یاد آیا
دیکھتا بھالتا ہر شاخ کو صیاد آیا

مصحفی غلام ہمدانی

فغان جاں گسل رکھتا ہوں لیکن
نہیں سنتا مرا صیاد میری

مصطفٰی خان شیفتہ

کیونکر اٹھتا ہے خدا رنج قفس
مر گئے ہم تو کف صیاد میں

مومن خان مومن

ہیں اسیر اس کے جو ہے اپنا اسیر
ہم نہ سمجھے صید کیا صیاد کیا
الجھا ہے پانوں یار کا زلفِ دراز میں
لو آپ اپنے دام میں صیاد آ گیا

فیض احمد فیض

اب کے برس دستورستم میں کیا کیا باب ایزاد ہوئے
جو قاتل تھے مقتول ہوئے ، جو صید تھے اب صیاد ہوئے

مرزا رفیع سودا

دیکھوں ہوں یوں میں اس ستم ایجاد کی طرف
جوں صید وقت ذبح کے صیاد کی طرف
نے دانہ ہم قیاس کیا نے لحاظ دام
دھنس گئے قفس میں دیکھ کے صیاد کی طرف
نالے نے ترے بلبل نم چشم نہ کی گل کی
فریاد مری سن کر صیاد بہت رویا

جون ایلیا

ذوق پرواز تب و تاب عطا فرما کر
صید کو لائق صیاد کیا ہے میں نے
آشیانہ کوئی اپنا نہیں پر شوق یہ ہے
اک قفس لائیں کہیں سے کوئی صیاد رکھیں
دل محلے میں عجب ایک قفس تھا یارو
صید کو چھوڑ کے رہنے لگا صیاد اس میں

جگر مراد آبادی

اللٰہ رے اس گلشنِ ایجاد کا عالم
جو صید کا عالم وہی صیاد کا عالم

قمر جلالوی

حالِ گلشن کیا ہے اے نووارد کنجِ قفس
میں مدت سے اسیرِ خانۂ صیاد ہوں
اس قدر رویا کہ ہچکی بندھ گئے صیاد کی
لاش جب نکلی قفس سے بلبلِ نا شاد کی
کاٹتا ہے پر کے نالوں پر بڑھا دیتا ہے قید
اے اسیرانِ قفس عادت ہے کیا صیاد کی
کیا ملے دیکھیں اسیروں کو سزا فریاد کی
آج کچھ بدلی ہوئی سی ہے نظر صیاد کی
رات میں بلبل تجھے سوجھی تو ہے فریاد کی
آنکھ سوتے سے نہ کھل جائے کہیں صیاد کی
جس جگہ پہنچا وہیں آمد سنی صیاد کی
کیا بری تقدیر ہے مجھے خانماں برباد کی
اب مرے اجڑے نشیمن کی الٰہی خیر ہو
آج پھر دیکھی ہے صورت خواب میں صیاد کی