مرزا غالب

ذکر میرا بہ بدی بھی، اسے منظور نہیں
غیر کی بات بگڑ جائے تو کچھ دور نہیں

امام بخش ناسخ

جس قدر ہم سے تم ہوئے نزدیک
اس قدر دور کر دیا ہم کو

داغ دہلوی

وجود و عدم دونوں گھر پاس نکلے
نہ یہ دور نکلا نہ وہ دور نکلا

مصحفی غلام ہمدانی

کیا کھینچے ہے خود کو دور اللہ
اللٰہ رے ترا غرور اللہ
کچھ اپنی جو حرمت تجھے منظور ہو اے شیخ
تو بحث نہ مے خواروں سے چل دور ہو اے شیخ

مرزا رفیع سودا

سوداؔ کبھی نہ مانیو واعظ کی گفتگو
آوازۂ دہل ہے خوش آیند دور کا

یگانہ چنگیزی

چھپ چھپ کے غیر تک تمہیں جانا ضرور تھا
تھا پیچھے پیچھے میں بھی مگر دور دور تھا

باقی صدیقی

جو تمہارے حضور ہوتا ہے
وہ زمانے سے دور ہوتا ہے
غم زدوں کا نہ پوچھئے مقدور
موت بھی دور، زندگی بھی دور
کیا بتائیں کہ زندگی کیا ہے
ایک منزل مگر قریب نہ دور
میکدے سے حضور تک پہنچا
میرا قصہ بھی دور تک پہنچا

جگر مراد آبادی

وہ تھے نہ مجھ سے دور نہ میں ان سے دور تھا
آتا نہ تھا نظر تو نظر کا قصور تھا
پلٹی جو راستے ہی سے اے آہ نامراد
یہ تو بتا کہ بابِ اثر کتنی دور تھا

خواجہ میر درد

قتل عاشق کسی معشوق سے کچھ دور نہ تھا
پر ترے عہد سے آگے تو یہ دستور نہ تھا

عبدالحمید عدم

پینے والوں کو بھی نہیں معلوم
مے کدہ کتنی دور ہے ساقی

قمر جلالوی

کیوں روٹھ کے مجھ سے کہتے ہو ملنا تجھ سے منظور نہیں
تم خود ہی منانے آؤ گے سرکار وہ دن بھی دور نہیں
واپس جانا معیوب سا ہے جب میت کے ساتھ آئے ہو
دو چار قدم کی بات ہے بس، ایسی کوئی منزل دور نہیں
پاس اس کا بھی تو کر اے بتِ مغرور کبھی
تجھ سے سائے کی طرح جو نہ ہوا دور کبھی
جانے کب کب کے لیے دھوپ نے بدلے مجھ سے
تیری دیوار کا سایہ جو ہوا دور کبھی
چاندنی ایسے کھلی ہو گئے ذرے روشن
داغ سینے سے قمر کے نہ ہوا دور کبھی

شکیب جلالی

پاس رہ کر بھی بہت دور ہیں دوست
اپنے حالات سے مجبور ہیں دوست

اختر شیرانی

مجھے زندگی دور رکھتی ہے تجھ سے
جو تو پاس ہو تو اسے دور کر دوں

اسرار الحق مجاز

وہ نقاب آپ سے اٹھ جائے تو کچھ دور نہیں
ورنہ میری نگہِ شوق بھی مجبور نہیں
دل دھڑک اٹھتا ہے خود اپنی ہی ہر آہٹ پر
اب قدم منزلِ جاناں سے بہت دور نہیں
لاکھ چھپتے ہو مگر چھپ کے بھی مستور نہیں
تم عجب چیز ہو نزدیک نہیں دور نہیں

بشیر بدر

اچھا تمہارے شہر کا دستور ہو گیا
جس کو گلے لگا لیا وہ دور ہو گیا
محلوں میں ہم نے کتنے ستارے سجا دیئے
لیکن زمیں سے چاند بہت دور ہو گیا
صبح وصال پوچھ رہی ہے عجب سوال
وہ پاس آ گیا کہ بہت دور ہو گیا

ضیا جالندھری

پیڑ پت جھڑ میں لہو روتے ہیں افسردہ نہ ہو
شاخ میں نم ہے تو پھر موسمِ گل دور نہیں

ماجد صدیقی

ابر مانگا تھا کہ آندھی لے اڑی برگ و ثمر!
خوب اے موجِ ہوا! کلفت ہماری دور کی

تلوک چند محروم

شہر سے ایک طرف دور بہت
آج رویا دل مہجور بہت
موت ایام جوانی میں بھی
نظر آتی تھی مگر دور بہت

سیماب اکبر آبادی

زندان کائنات میں محصور کر دیا
محفل سے اپنی تم نے بہت دور کر دیا

شکیل بدایونی

دور ہیں وہ اور کتنی دور
پھر بھی مری نظروں کے حضور
وہم تعینات کا انجام دیکھنا
نزدیکیوں کو دور کیے جا رہا ہوں میں
وہ ہم سے دور ہوتے جا رہے ہیں
بہت مغرور ہوتے جا رہے ہیں
کبھی وہ پاس آئے جا رہے تھے
مگر اب دور ہوتے جا رہے ہیں

عزیز حامد مدنی

ایک ہی شہر میں رہتے بستے کالے کوسوں دور رہا
اس غم سے ہم اور بھی ہارے وہ بھی تو مجبور رہا
صبح سے چلتے چلتے آخر شام ہوئی آوارۂ دل
اب میں کس منزل میں پہنچا اب گھر کتنی دور رہا

فانی بدایونی

دل ہی میں نہیں رہتے آنکھوں میں بھی رہتے ہو
تم دور بھی رہتے ہو تو دور نہیں ہوتے
اٹھ کر چلے تو حشر بھی اٹھنا تھا کیا ضرور
ان کی گلی سے مدفن فانیؔ تو دور تھا

شاذ تمکنت

نفس نفس ہے ترے غم سے چور چور اب تک
نہ شام ہے نہ سویرا قریب دور اب تک

مجروح سلطان پوری

سنتے ہیں کہ کانٹے سے گل تک ہیں راہ میں لاکھوں ویرانے
کہتا ہے مگر یہ عزم جنوں صحرا سے گلستاں دور نہیں
مجروحؔ اٹھی ہے موجِ صبا آثار لیے طوفانوں کے
ہر قطرۂ شبنم بن جائے اک جوئے رواں کچھ دور نہیں

ناصر کاظمی

یار کی نگری کوسوں دور
کیسے کٹے گی بھاری رات
دیکھ محبت کا دستور
تو مجھ سے میں تجھ سے دور
دوست بچھڑتے جاتے ہیں
شوق لیے جاتا ہے دور
سورج ڈوب چلا ناصر
اور ابھی منزل ہے دور

نوح ناروی

ترا خیال مرے دل میں آ نہیں سکتا
کہ جس کو دور کیا اس کو دور میں نے کیا