مرزا غالب

نسیمِ صبح جب کنعاں میں بوئے پیرہن لائ
پئے یعقوب ساتھ اپنے نویدِ جان و تن لائ
نسیمِ مصر کو کیا پیرِ کنعاں کی ہوا خواہی!
اسے یوسف کی بوئے پیرہن کی آزمائش ہے

امام بخش ناسخ

یہ جسم زار ہے یوں پیرہن کے پردے میں
کہ جیسے روح نہاں ہے بدن کے پردے میں

حیدر علی آتش

قبائے گل کو پھاڑا جب مرا گل پیرہن بگڑا
بن آئی کچھ نہ غنچے سے جو وہ غنچہ دہن بگڑا
رہی نفرت ہمیشہ داغ عریانی کو پھائے سے
ہوا جب قطع جامہ پر ہمارے پیرہن بگڑا
کوچۂِ دلبر میں میں بلبل چمن میں مست ہے
ہر کوئی یاں اپنے اپنے پیرہن میں مست ہے
نشۂ دولت سے منعم پیرہن میں مست ہے
مرد مفلس حالت رنج و محن میں مست ہے

شیخ ابراہیم ذوق

ہمدم وبالِ دوش نہ کر پیرہن مجھے
کانٹا سا ہے کھٹکتا مرا تن بدن مجھے
ہوں شمع یا کہ شعلہ خبر کچھ نہیں مگر
فانوس ہو رہا ہے مرا پیرہن مجھے
یہ دل وہ ہے کہ کر دے زمیں آسماں کو خاک
اک دم کو برق دے جو پنہا پیرہن مجھے

فیض احمد فیض

ترا جمال نگاہوں میں لے کے اٹھا ہوں
نکھر گئی ہے فضا تیرے پیرہن کی سی

سراج الدین ظفر

جیب سمن دریدہ گریبان لالہ چاک
محفوظ اس نظر سے کوئی پیرہن کہاں

قمر جلالوی

دامان آسماں کو تاروں سے کیا تعلق
ٹان کے لگے ہوئے ہیں بوسیدہ پیرہن میں

عرفان صدیقی

ہم کہاں کے یوسف ثانی تھے لیکن اس کا ہاتھ
ایک شب ہم کو بلائے پیرہن لگنے لگا

مجید امجد

امجد طریقِ مے میں ہے یہ احتیاط شرط
اک داغ بھی کہیں نہ سرِ پیرہن پڑے

احسان دانش

ہے علم کی نگاہ سے پنہاں رہ‌ عمل
کہتے نہیں کفن کو یہاں پیرہن ابھی
دمک رہا ہے جو نس نس کی تشنگی سے بدن
اس آگ کو نہ ترا پیرہن چھپائے گا

ادا جعفری

خوشبو کے تھامنے کو بڑھائے ہیں ہاتھ اداؔ
دامان آرزو بھی صبا پیرہن سا ہے

عبید اللہ علیم

نگاہ بوالہوساں ہائے کیا قیامت ہے
بدل رہے ہیں گل و لالہ پیرہن کیا کیا

حسرت موہانی

محتاج بوئے عطر نہ تھا جسم خوب یار
خوشبوئے دلبری تھی جو اس پیرہن میں تھی
اللہ ری جسم یار کی خوبی کہ خودبخود
رنگینیوں میں ڈوب گیا پیرہن تمام

رسا چغتائی

درِ قفس پہ جو آئے صبا تو پھر پہروں
بٹھا کے سامنے گل پیرہن کی بات کرو

احمد فراز

شگفتِ گل کی صدا میں رنگِ چمن میں آؤ
کوئی بھی رت ہو بہار کے پیرہن میں آؤ

امیر مینائی

اے روح، کیا بدن میں پڑی ہے بدن کو چھوڑ
میلا بہت ہوا ہے ، اب اس پیرہن کو چھوڑ

شاذ تمکنت

وہ نیاز و ناز کے مرحلے نگہ و سخن سے چلے گئے
ترے رنگ و بو کے وہ قافلے ترے پیرہن سے چلے گئے
مجھے تو یوں لگا ترشا ہوا تھا شعلہ کوئی
بدن ہی ایسا تھا کچھ پیرہن ہی ایسا تھا

مجروح سلطان پوری

تو اے بہار گریزاں کسی چمن میں رہے
مرے جنوں کی مہک تیرے پیرہن میں رہے
دشمن کی دوستی ہے اب اہل وطن کے ساتھ
ہے اب خزاں چمن میں نئے پیرہن کے ساتھ
جنون دل نہ صرف اتنا کہ اک گل پیرہن تک ہے
قد و گیسو سے اپنا سلسلہ دار و رسن تک ہے
میں ہم آغوش صنم تھا مگر اے پیر حرم
یہ شکن کیسے پڑی آپ کے پیرہن میں

محسن نقوی

تم اس کا حسن کبھی اس کی بزم میں دیکھو
کہ ماہتاب سدا شب کے پیرہن میں کھلا

ناصر کاظمی

سبز کھیتیوں پہ پھر نکھار آ گیا
لے کے زرد پیرہن بسنت آ گئی