مرزا غالب

مجھے اس سے کیا توقع بہ زمانۂِ جوانی
کبھی کودکی میں جس نے نہ سنی مری کہانی
کر دیا ضعف نے عاجز غالب
ننگِ پیری ہے جوانی میری
عیاں ہیں حال و قالِ شیخ سے اندازِ دلچسپی
مگر رندِ قدح کش کا ابھی دورِ جوانی ہے

امام بخش ناسخ

پیری میں بھی ملتا ہے جو کمسن کوئی محبوب
کرتی ہے وہیں عود جوانی مرے دل کی

انشاء اللہ خان انشا

صدقہ صدقہ کیوں نہ ہو جاؤں بھلا غش کھا کے میں
دیکھ گدرائی ہوئی اٹھتی جوانی آپ کی

حیدر علی آتش

جس کو کہتے ہیں چودھویں کا چاند
تیری تصویر ہے جوانی کی
سفیدی مو کی ہو کافور ہر چند
کوئی مٹتا ہے یہ داغ جوانی
ناز و انداز و ادا میں ہے ترقی دہ چند
فتنہ طفلی تھی قیامت ہے جوانی تیری

مصحفی غلام ہمدانی

گھڑی گھڑی نہ کریں ہم پہ مہربانی آپ
کہ حسن رکھتے ہیں اور عالم جوانی آپ
سخن میں کامرانی کر رہا ہوں
ضعیفی میں جوانی کر رہا ہوں

مرزا رفیع سودا

کیا کیا ملے لیلیٰ منشاں خاک میں سوداؔ
گو اپنے بھی محبوب کی دیکھی نہ جوانی

سراج الدین ظفر

ازل سے جستجو کی سرگرانی لے کے آیا ہوں
تلاشِ حسن ہے شمع جوانی لے کے آیا ہوں
ظفرؔ کیا تاب لائے کوئی طوفان محبت کی
ہوا کے سامنے شمع جوانی لے کے آیا ہوں

عبدالحمید عدم

لباس حشر میں کچھ ہو تو اور کیا ہو گا
بجھا سا ایک چھناکا تری جوانی کا

احسان دانش

عمرِ رفتہ کی کہانی کیا ہے
ایک تہمت ہے جوانی کیا ہے
عہدِ پیری میں رلاتی ہے لہو
ہائے کمبخت جوانی کیا ہے
ایک موہوم سا طوفان خودی
کچھ نہیں جوش جوانی کیا ہے

اختر شیرانی

لا پلا ساقی شراب ارغوانی پھر کہاں
زندگانی پھر کہاں ناداں جوانی پھر کہاں
پھول چن جی کھول کر عیش و طرب کے پھول چن
موسمِ گل پھر کہاں فصل جوانی پھر کہاں
سرور آرا شراب ارغوانی اب بھی ہوتی ہے
مرے قدموں میں دنیا کی جوانی اب بھی ہوتی ہے

بہزاد لکھنوی

بہزادؔ کا وہ عالم بھی خوب ہی عالم تھا
بہزادؔ کی نظروں میں ہر چیز جوانی تھی
ترے عشق میں زندگانی لٹا دی
عجب کھیل کھیلا جوانی لٹا دی
کچھ اس طرح ظالم نے دیکھا کہ ہم نے
نہ سوچا نہ سمجھا جوانی لٹا دی
اداؤں کو دیکھا نگاہوں کو دیکھا
ہزاروں طرح سے جوانی لٹا دی
جہاں کوئی دیکھا حسیں جلوہ آرا
وہیں ہم نے اپنی جوانی لٹا دی
جوانی کے جذبوں سے اللہ سمجھے
جوانی جو دیکھی جوانی لٹا دی
تمہیں پر سے بہزادؔ نے بے خودی میں
کیا دل تصدق جوانی لٹا دی
میرا دل تاکا گیا جور و جفا کے واسطے
جب کہ پورے رنگ پر ان کی جوانی ہو چکی

بشیر بدر

اے پیر خرد منداں دل کی بھی ضرورت ہے
یہ شہر غزالاں ہے یہ ملک جوانی ہے
اک ذہن پریشاں میں خواب غزلستاں ہے
پتھر کی حفاظت میں شیشے کی جوانی ہے

عبید اللہ علیم

لمحہ لمحہ خواب دکھائے اور سو سو تعبیر کرے
لذت کم آزار بہت ہے جس کا نام جوانی ہے

تلوک چند محروم

جوانی اور بوئے گل میں یا رب کیا تعلق تھا
کہ بوئے گل سے پیری میں جوانی یاد آتی ہے

جلیل مانک پوری

بہاریں لٹا دیں جوانی لٹا دی
تمہارے لیے زندگانی لٹا دی
نہ کی حسن کی قدر اے ماہِ کامل
فقط رات بھر میں جوانی لٹا دی
عجب حوصلہ ہم نے غنچہ کا دیکھا
تبسم پہ ساری جوانی لٹا دی

ثروت حسین

قسم اس آگ اور پانی کی
موت اچھی ہے بس جوانی کی

حسرت موہانی

تمنا نے اس روئے زیبا کو دیکھا
کہ تصویر حسن جوانی کی دیکھی

سیماب اکبر آبادی

افسوس گزر گئی جوانی
وہ لمحۂ کیف و شادمانی
سیمابؔ کرو اب اللٰہ اللٰہ
تا چند یہ ماتم جوانی

فانی بدایونی

غرورِ حسن کا صدقہ کوئی جاتا ہے دنیا سے
کسی کی خاک میں ملتی جوانی دیکھتے جاؤٔ

احمد فراز

ہم نے اندوہ زمانہ سے نہ خم کھایا ہے
شاید اب یوں ہے کہ آشوبِ جوانی کم ہے
کیوں اہلِ شوق سر بگریباں ہیں دوستو
کیوں خوں بہ دل ہے عہدِ جوانی کوئی لکھو

اقبال ساجد

پھر آئے گا وہ مجھ سے بچھڑنے کے واسطے
بچپن کا دور پھر سے جوانی میں آئے گا

امیر مینائی

دیکھ او نادان کہ پیری کا زمانہ ہے قریب
کیا لڑکپن ہے کہ کرتا ہے جوانی پر گھمنڈ
طبعِ شاعر آ کے زوروں پر کرے کیوں کر نہ ناز
سب کو ہوتا ہے جوانی میں جوانی پر گھمنڈ

فراق گورکھپوری

شعلۂ دل ہے یہ کہ شعلہِ ساز
یا ترا شعلۂ جوانی ہے
سر بہ سر یہ فراز‌ مہر و قمر
تیری اٹھتی ہوئی جوانی ہے
ان سے ایسے میں جو نہ ہو جائے
نو جوانی ہے نو جوانی ہے
مے کدوں کے بھی ہوش اڑنے لگے
کیا تری آنکھ کی جوانی ہے
رات بھی نیند بھی کہانی بھی
ہائے کیا چیز ہے جوانی بھی
دل میں اک ہوک بھی اٹھی اے دوست
یاد آئی تری جوانی بھی

نوح ناروی

حسن کو شکلیں دکھانی آ گئیں
شوخیاں لے کر جوانی آ گئیں
خیال میں اک نہ اک مزے کی نئی کہانی ہے اور ہم ہیں
ابھی تمنا ہے اور دل ہے ابھی جوانی ہے اور ہم ہیں
یہ عشقِ پر حسن کی عنایت یہ حسن سے عشق کی ارادت
ہماری حسرت ہے اور تو ہے تری جوانی ہے اور ہم ہیں
ابھی سے توبہ ابھی سے تقویٰ ابھی سے کیا فکر دین و عقبیٰ
نئی امنگیں نئی ترنگیں نئی جوانی ہے اور ہم ہیں