مرزا غالب

جب توقع ہی اٹھ گئی غالبؔ
کیوں کسی کا گلہ کرے کوئی

انشاء اللہ خان انشا

صاحب کے ہرزہ پن سے ہر ایک کو گلہ ہے
میں جو نباہتا ہوں میرا ہے حوصلہ ہے

حیدر علی آتش

دوستوں سے اس قدر صدمے اٹھائے جان پر
دل سے دشمن کی عداوت کا گلہ جاتا رہا

داغ دہلوی

تم ملوگے نہ وہاں بھی ہم سے
حشر سے پہلے گلہ کرتے ہیں
اس نے احسان جتا کر یہ کہا
''آپ کس منہ سے گلہ کرتے ہیں
کچھ اور بھی تجھے اے داغ بات آتی ہے
وہی بتوں کی شکایت وہی گلہ دل کا
کیا ہم اس بد گماں سے بات کریں
جو ستائش کو بھی گلہ جانے

مصطفٰی خان شیفتہ

جفا و جور کا اس سے گلہ کیا
جو پوچھے مہربانی کیا، وفا کیا
اس جنبشِ ابرو کا گلہ ہو نہیں سکتا
دل گوشت ہے ناخن سے جدا ہو نہیں سکتا

یگانہ چنگیزی

ہوا سے وادی وحشت میں باتیں کرتے ہو
بھلا یہاں کوئی سنتا بھی ہے گلہ دل کا

باقی صدیقی

حکمِ حاکم ہے کہ خاموش رہو
بولو اب کوئی گلہ ہے کہ نہیں

جون ایلیا

کیسے کہیں کہ تجھ کو بھی ہم سے ہے واسطہ کوئی
تو نے تو ہم سے آج تک کوئی گلہ نہیں کیا
بے ملے ہی بچھڑ گئے ہم تو
سو گلے ہیں کوئی گلہ ہی نہیں
ہوں عجب عیش غم کی حالت میں
اب کسی سے کوئی گلہ ہی نہیں
دل ترا پیشۂ گلہ کام خراب کر گیا
ورنہ تو ایک رنج کی حالت بے گلہ بھی تھی

رئیس فروغؔ

ہاتھ ہمارے سب سے اونچے ہاتھوں ہی سے گلہ بھی ہے
گھر ایسے کو سونپ دیا جو آگ بھی ہے اور ہوا بھی ہے

ادا جعفری

کچھ لوگ شرمسار خدا جانے کیوں ہوئے
ان سے تو روح عصر ہمیں کچھ گلہ نہ تھا

ماجد صدیقی

حق بجانب تھا مجھ سے وہ اغماض میں
اس سے میرا کچھ ایسا گلہ بھی نہ تھا

جلیل مانک پوری

وصل میں وہ چھیڑنے کا حوصلہ جاتا رہا
تم گلے سے کیا ملے سارا گلہ جاتا رہا
ایک تو آنکھیں دکھائیں پھر یہ شوخی سے کہا
کہیے اب تو کم نگاہی کا گلہ جاتا رہا
مڑ کے قاتل نے نہ دیکھا وار پورا ہو گیا
کشتگان نیم بسمل کا گلہ جاتا رہا

حسرت موہانی

راہ و رسمِ وفا وہ بھول گئے
اب ہمیں بھی کوئی گلہ نہ رہا
عشق جب شکوہ سنج حسن ہوا
التجا ہو گئی گلہ نہ رہا

فانی بدایونی

بیداد کے خوگر تھے فریاد تو کیا کرتے
کرتے تو ہم اپنا ہی کچھ تم سے گلہ کرتے

احمد فراز

مزاج ہم سے زیادہ جدا نہ تھا اس کا
جب اپنے طور یہی تھے تو کیا گلہ اس کا
سنگ دل ہے وہ تو کیوں اس کا گلہ میں نے کیا
جب کہ خود پتھر کو بت، بت کو خدا میں نے کیا
زندگی سے یہی گلہ ہے مجھے
تو بہت دیر سے ملا ہے مجھے
ہم نے مدت سے کوئی ہجو نہ واسوخت کہی
وہ سمجھتے ہیں ہمیں ان سے گلہ ہے سو کہاں
کہا تھا کس نے کہ عہدِ وفا کرو اس سے
جو یوں کیا ہے تو پھر کیوں گلہ کرو اس سے

اقبال ساجد

چپ چاپ گھر کے صحن میں فاقے بچھا دیے
روزی رساں سے ہم نے گلہ کچھ نہیں کیا

امیر مینائی

اٹھو گلے سے لگا لو، مٹے گلہ دل کا
ذرا سی بات میں ہوتا ہے فیصلہ دل کا
جب تلک تم تھے کشیدہ دل تھا شکووں سے بھرا
جب گلے سے مل گئے ، سارا گلہ جاتا رہا
ہائے وہ صبح شبِ وصل، ان کا کہنا شرم سے
اب تو میری بے وفائی کا گلہ جاتا رہا

قتیل شفائی

سنا ہے اس کو محبت دعائیں دیتی ہے
جو دل پہ چوٹ تو کھائے مگر گلہ نہ کرے