مرزا غالب

رحمت اگر قبول کرے ، کیا بعید ہے
شرمندگی سے عذر نہ کرنا گناہ کا
تم جانو، تم کو غیر سے جو رسم و راہ ہو
مجھ کو بھی پوچھتے رہو تو کیا گناہ ہو

انشاء اللہ خان انشا

حرم سے دیر میں یاں آب و دانہ لے آیا
بہ رب کعبہ مرا اس میں کچھ گناہ نہیں
عاشق مجھے جان کرتے ہیں قتل
تقصیر و گناہ دیکھئے گا

حیدر علی آتش

کیوں محبت بڑھائی تھی تم سے
ہم گناہ گار بے گناہ ہو تم

داغ دہلوی

قریب مے کدہ مجھ کو جو خانقاہ ملے
گلے ثواب کے کیا کیا مرے گناہ ملے
سب اہل حشر جب اپنے کیے کو پائیں گے
بڑا مزا ہو جو مجھ کو مرا گناہ ملے

مصحفی غلام ہمدانی

زنداں کی تو اپنے سیر تو کر
شاید کوئی بے گناہ نکلے
تھی نگاہ پہلے تو اس کی ووں کہیں دوستی میں ہوا ہے یوں
دیا اس نے دل کہیں اور کیوں یہی مصحفیؔ کا گناہ ہے
کس واسطے بولتا نہیں تو
کیا مجھ سے ہوا گناہ ظالم

مومن خان مومن

مومنؔ اس ذہن بے خطا پر حیف
فکر آمرزش گناہ نہ کی

میر مہدی مجروح

جب بوسہ لے لیا تو نہیں گالیوں کا رنج
تعزیر محو ہو گئی شوق گناہ میں

یگانہ چنگیزی

چلتا نہیں فریب کسی عذر خواہ کا
دل ہے بغل میں یا کوئی دفتر گناہ کا
ثابت ہوا کسی پہ نہ جرمِ وفا کبھی
پردہ کھلا نہ عشق سراپا گناہ کا

جگر مراد آبادی

دل میں کسی کے راہ کیے جا رہا ہوں میں
کتنا حسیں گناہ کیے جا رہا ہوں میں
معصومی جمال کو بھی جن پہ رشک ہے
ایسے بھی کچھ گناہ کیے جا رہا ہوں میں
یوں زندگی گزار رہا ہوں ترے بغیر
جیسے کوئی گناہ کیے جا رہا ہوں میں

عبدالحمید عدم

بے سبب کیوں تباہ ہوتا ہے
فکرِ فردا گناہ ہوتا ہے

جلیل مانک پوری

میزاں کھڑی ہوئی مرے آگے نہ روزِ حشر
دبنا پڑا اسے مرے بار گناہ سے
کثرت سے مے جو پی ہے نظر ہے مآل پر
رعشہ نہیں ہے کانپ رہا ہوں گناہ سے

حفیظ جالندھری

خاموش ہو گئیں جو امنگیں شباب کی
پھر جرأت گناہ نہ کی ہم بھی چپ رہے

شاد عظیم آبادی

تا عمر آشنا نہ ہوا دل گناہ کا
خالق بھلا کرے تری ترچھی نگاہ کا
جی بھر کے دیکھ لوں تو کر اس جرم پر شہید
یوں اپنے سر پہ خون نہ لے بے گناہ کا
بہتر کہیں تھے مجھ سے وہ مے خوار ساقیا
حیلہ جو ڈھونڈتے رہے عفو گناہ کا
رکھا جناں میں بھی ہمیں مغموم تا ابد
اقرار ہم سے لے کے ہمارے گناہ کا

شکیل بدایونی

رحمتوں سے نباہ میں گزری
عمر ساری گناہ میں گزری

عزیز حامد مدنی

اک شب خود نمائی میں عصمت بے مقام نے
کتنے سوال کر لیے رمز گناہ کے لیے
میری خود آ گہی بھی کی تیرے وصال نے طلب
ہجر ہزار شب کے بعد ایک گناہ کے لیے