مرزا غالب

یہ عمر بھر جو پریشانیاں اٹھائی ہیں ہم نے
تمہارے آئیو اے طرہ ہائے خم بہ خم آگے
کٹے تو شب کہیں کاٹے تو سانپ کہلاوے
کوئی بتاؤ کہ وہ زلفِ خم بہ خم کیا ہے

انشاء اللہ خان انشا

نفی اثبات کی شاغل جو قلندر ہیں سو وہ
اپنی گردن کو نہیں کرتے ہیں خم یا معبود

بہادر شاہ ظفر

کجی جن کی طبیعت میں ہے کب ہوتی وہ سیدھی ہے
کہو شاخِ گل تصویر سے کس طرح خم نکلے

حیدر علی آتش

محبت کا تری بندہ ہر اک کو اے صنم پایا
برابر گردن شاہ و گدا دونوں کو خم پایا
بجا کرتے ہیں عاشق طاق ابرو کی پرستاری
یہی محراب دیر و کعبہ میں بھی ہم نے خم پایا
اپنی راحت کے لیے کس کو گوارا ہے یہ رنج
گھر بنا کر گردن محراب کو خم کیجیے
آسماں شوق سے تلواروں کا مینہ برسا دے
مہِ نو نے ترے ابرو کا کیا خم پیدا

داغ دہلوی

طبیعت کی کجی ہرگز مٹائے سے نہیں مٹتی
کبھی سیدھے تمہارے گیسوئے پر خم بھی ہوتے ہیں

مومن خان مومن

مگر رقیبوں نے سر اٹھایا کہ یہ نہ ہوتا تو بے مروت
نظر سے ظاہر حیا نہ ہوتی حیا سے گردن میں خم نہ ہوتا

مرزا رفیع سودا

اکڑ سے نہیں کام سنبل کی ہم کو
کسی زلف کا پیچ و خم دیکھتے ہیں

باقی صدیقی

تو اپنے گنہگار کو توفیق عمل دے
ہوتا ہے زباں سے سرتسلیم بھی خم کیا
زلزلہ کوئی ادھر سے گزرا
تیری دیوار میں خم دیکھتے ہیں
آرزو راستے میں چھوڑ گئی
ہم ہیں اور زندگی کے پیچ و خم
مسافران محبت کا انتظار نہ کر
کہ دل میں آ گئے راہوں کے پیچ و خم اب تو

جون ایلیا

دوسری ہار کی ہوس ہے سو ہم
سر تسلیمِ خم نہیں کرتے
تم نے ہمارے دل میں بہت دن سفر کیا
شرمندہ ہیں کہ اس میں بہت خم ملے تمہیں

شکیب جلالی

دیکھتی رہ گئی محرابِ حرم
ہائے انسان کی انگڑائی کا خم

اسرار الحق مجاز

بہت مشکل ہے دنیا کا سنورنا
تری زلفوں کا پیچ و خم نہیں ہے
بہ ایں سیلِ غم و سیلِ حوادث
مرا سر ہے کہ اب بھی خم نہیں ہے

احمد راہی

وہ آستان شہی ہو کہ آستانۂ دوست
یہ اب کہیں سر تسلیم خم نہیں کرتے

تلوک چند محروم

یہ کس سے آج برہم ہو گئی ہے
کہ زلفِ یار پر خم ہو گئی ہے

جوش ملیح آبادی

دائمی آلام کا خوگر بنا کر روح کو
ناگہانی حادثوں کی گردنیں خم کیجیے
کنارا کر رہا ہے روح سے ہیجان سرتابی
کہ گردن جستجو کے شوق میں خم ہوتی جاتی ہے

حفیظ ہوشیارپوری

شہد شکن ہونٹوں کی لرزش عشرت باقی کا گہوارہ
دائرہ امکان تمنا نرم لچکتی بانہوں کے خم
اس دور میں تشنہ کام ساقی
ہم جیسے کئی خم آشنا ہیں

رسا چغتائی

اب ایسے سرکش قامت پر
کیوں تیغِ مژہ خم رہتی ہے

عزیز حامد مدنی

سب پیچ و تاب شوق کے طوفان تھم گئے
وہ زلف کھل گئی تو ہواؤں کے خم گئے
کبھی تیری کبھی دستِ جنوں کی بات چلتی ہے
یہ افسانے تو زلفِ خم بہ خم ہوتے ہی رہتے ہیں

احمد فراز

فرار اس گمرہی پر کیا کسی کو دوش دینا
کہ راہ عاشقی کے بیچ و خم تم جانتے تھے

شاذ تمکنت

ایک سائے کا کرم ہے تپش جاں پہ ہنوز
ایک دیوار کے خم نے مجھے جینے نہ دیا

قتیل شفائی

جس در سے ندامت کے سواِ کچھ نہیں ملتا
اس در پہ ترا سر بھی جو خم ہے تو مجھے کیا

مجروح سلطان پوری

سوال ان کا جواب ان کا سکوت ان کا خطاب ان کا
ہم ان کی انجمن میں سر نہ کرتے خم تو کیا کرتے