مرزا غالب

جلا ہے جسم جہاں، دل بھی جل گیا ہو گا
کریدتے ہو جو اب راکھ جستجو کیا ہے

حیدر علی آتش

اگر میں خاک بھی ہوں گا تو آتشؔ گرد باد آسا
رکھے گی مجھ کو سرگشتہ کسی کی جستجو برسوں
اس شش جہت میں خوب تری جستجو کریں
کعبے میں چل کے سجدہ تجھے چار سو کریں
پیدا کریں جو تجھ کو انہیں کو ہے دسترس
پامرد ہیں وہی جو تری جستجو کریں
مری طرح سے مہ و مہر بھی ہیں آوارہ
کسی حبیب کی یہ بھی ہیں جستجو کرتے

داغ دہلوی

ہمارا دل اسے اب ڈھونڈتا ہے
تھکے ہیں پاؤں جس کی جستجو سے
دستِ دعا کو ملتی ہے تاثیر عرش سے
جو ہاتھ سے ہو پاؤں سے وہ جستجو نہ ہو
اب کے مل کر دیکھیے کیا رنگ ہو
پھر ہماری جستجو ہونے لگی

شیخ ابراہیم ذوق

پھرا گر آسماں تو شوق میں تیرے ہے سرگرداں
اگر خورشید نکلا تیرا گرم جستجو نکلا
سراغ عمرِ گزشتہ کا کیجیے گر ذوقؔ
تمام عمر گزر جائے جستجو کرتے

مصحفی غلام ہمدانی

مذہب کی میرے یار اگر جستجو کریں
مرتے ہوئے مرا نہ سوئے قبلہ رو کریں
ہر چند تو ہمیشہ پیشِ نظر ہے اس پر
چھٹ تیری جستجو کے کچھ جستجو نہیں یاں

مصطفٰی خان شیفتہ

بے طاقتی نے کام سے یہ کھو دیا کہ بس
دلِ گم ہوا ہے اور سرِ جستجو نہیں

فیض احمد فیض

نہیں نگاہ میں منزل تو جستجو ہی سہی
نہیں وصال میسر تو آرزو ہی سہی

مرزا رفیع سودا

گل کی نہ تخم مرغِ چمن کر سکے تلاش
ہم خام فطرتوں سے تری جستجو نہ ہو

یگانہ چنگیزی

دلیل راہ دل شب چراغ تھا تنہا
بلند و پست میں گزری ہے جستجو کرتے
فلک نے بھول بھلیوں میں ڈال رکھا تھا
ہم ان کو ڈھونڈتے یا اپنی جستجو کرتے

جون ایلیا

کس قدر دور سے لوٹ کر آئے ہیں یوں کہو عمر برباد کر آئے ہیں
تھا سراب اپنا سرمایۂ جستجو تم کہاں جاؤ گے ہم کہاں جائیں گے
بھٹکتا پھر رہا ہوں جستجو بن
سراپا آرزو ہوں آرزو بن

خواجہ میر درد

ہم تجھ سے کس ہوس کی فلک جستجو کریں
دل ہی نہیں رہا ہے کہ کچھ آرزو کریں
مرا جی ہے جب تک تری جستجو ہے
زباں جب تلک ہے یہی گفتگو ہے

قمر جلالوی

قمر یہ کیا خبر تھی وہ ہمارے دل میں رہتے ہیں
رہی جن کے لیے دیر و حرم میں جستجو برسوں
حقیقت جب تجھے معلوم اے دیوانہ خو ہو گی
جب ان کی جستجو کے بعد اپنی جستجو ہو گی
لحد میں جا کے بھی ہم مے کی جستجو کرتے
فرشتے پوچھتے کچھ، ہم سبو سبو کرتے

مجید امجد

عزمِ نظر نہیں، ہوسِ جستجو نہیں
کوئی بھی اب شریکِ غمِ آرزو نہیں
زندگی کی راحتیں ملتی نہیں، ملتی نہیں
زندگی کا زہر پی کر جستجو میں گھومیے

اختر شیرانی

مسرت آہ تو بستی ہے کن ستاروں میں
زمیں پہ عمر ہوئی تیری جستجو کرتے
پکار اٹھتا وہ آ کر دلوں کی دھڑکن میں
ہم اپنے سینے میں گر اس کی جستجو کرتے

ادا جعفری

ورنہ انسان مر گیا ہوتا
کوئی بے نام جستجو ہے ابھی

زہرا نگاہ

ساتھ ساتھ چلنے کی کس قدر تمنا تھی
ساتھ ساتھ کھونے کی کیسی جستجو کی تھی

ضیا جالندھری

اے دل نشیں تلاش تری کو بہ کو نہ تھی
اپنے سے اک فرار تھا وہ جستجو نہ تھی

عالم تاب تشنہ

مآلِ عمر محبت ہے بس یہی تشنہؔ
مری تلاش تھا وہ اس کی جستجو میں تھا

فارغ بخاری

کب آفتاب ڈھلے اور چاندنی چھٹکے
کسی کو اب یہ سرِ شام جستجو بھی نہیں

تلوک چند محروم

کہاں کہاں ترے محرومؔ کو بقول‌‌ سرورؔ
کشاں کشاں لیے پھرتی ہے جستجو تیری
نظر اٹھا دلِ ناداں یہ جستجو کیا ہے
اسی کا جلوہ تو ہے اور روبرو کیا ہے

جلیل مانک پوری

عمر گزری تلاش میں لیکن
گرمی ہائے جستجو ہے وہی

حسرت موہانی

نہ سمجھے دل فریب آرزو کو
نہ ہم چھوڑیں تمہاری جستجو کو

فانی بدایونی

وہ یہیں ہیں جو وہ کہیں بھی نہیں
آئیے دل میں جستجو تو کریں

احمد فراز

تیرے بغیر بھی تو غنیمت ہے زندگی
خود کو گنوا کے کون تری جستجو کرے

اقبال ساجد

سفر کا بوجھ اٹھانے سے پیشتر ساجدؔ
مزاج دان رہِ جستجو بھی ہونا تھا

قابل اجمیری

کہیں ہجوم حوادث میں کھو کے رہ جاتا
جمالِ یار مری جستجو سے روشن ہے

محسن احسان

میری متاعِ زندگی خواہش زخم ہی تو ہے
میرے جنوں کے سلسلے لذت جستجو سے ہیں
خود اپنی ذات کی تشہیر کو بہ کو کیے جائیں
خدا ملے نہ ملے اس کی جستجو کیے جائیں

محسن نقوی

عذاب دید میں آنکھیں لہو لہو کر کے
میں شرمسار ہوا تیری جستجو کر کے