مرزا غالب

کی اس نے گرم سینۂِ اہلِ ہوس میں جا
آوے نہ کیوں پسند کہ ٹھنڈا مکان ہے

داغ دہلوی

فتنہ بنا زمین پہ ہر ذرہ خاک کا
نکلے ہیں بہر سیر وہ جس دم مکان سے
فتنہ گر کیا مکان سے نکلا
آسماں آسمان سے نکلا
وہم آتے ہیں دیکھیے کیا ہو
وہ اکیلا مکان سے نکلا
پڑ گیا جو زباں سے تیری حرف
پھر نہ اپنے مکان سے نکلا
لو قیامت اب آئی وہ کافر
بن بنا کر مکان سے نکلا
یوں ہے منظور خانہ ویرانی
مول میرا مکان لیتے ہیں

مصحفی غلام ہمدانی

سفر اس دل سے کر گئے غم و درد
یار سونا مکان چھوڑ گئے

میر مہدی مجروح

ان کا بے وجہ نہیں ٹوٹ کے ہونا برباد
ڈھونڈے ہے اپنے مکینوں کو مکان دہلی

یگانہ چنگیزی

ایسی آزاد روح اس تن میں
کیوں پرانے مکان میں آئی

جون ایلیا

ہے نسیم بہار گرد آلود
خاک اڑتی ہے اس مکان میں کیا

جگر مراد آبادی

آ کہ تجھ بن بہت دنوں سے یہ دل
ایک سونا مکان ہے پیارے

شکیب جلالی

مرا خزانہ ہے محفوظ میرے سینے میں
میں سو رہوں گا یونہی چھوڑ کر مکان کھلا
چاندنی جھانکتی ہے گلیوں میں
کوئی سایہ مکان سے نکلا

عرفان صدیقی

نہ وہ خواب ہیں نہ سراب ہیں نہ وہ داغ ہیں نہ چراغ ہیں
یہ میں کس گلی میں پہنچ گیا، یہ میں کس مکان میں آ گیا
سرائے وہم میں کس کو پکارتا ہوں میں
یہ نیم شب‘ یہ سکوت مکانِ گمشدگاں
کیوں نہ تم میرے دل میں بس جاؤ
اس گلی میں مکان ملتے ہیں
آتے جاتے ہزارہا سیلاب!
ساحلوں پر مکان بھی، ہم بھی
یہ شہر پھونکنے والے کسی کے دوست نہیں
کسے خیال کہ تیرا مکان بیچ میں ہے

مجید امجد

سب تری ہی اماں میں شب بیدار
مورچے بھی، مکان بھی، ہم بھی

جمال احسانی

چراغ سامنے والے مکان میں بھی نہ تھا
یہ سانحہ مرے وہم و گمان میں بھی نہ تھا
تیری یاد اور تیرے دھیان میں گزری ہے
ساری زندگی ایک مکان میں گزری ہے
دریچہ ایک ہولے ہولے کھل گیا
جب اس گلی کے سب مکان سو گئے

بشیر بدر

عمارتوں کی بلندی پہ کوئی موسم کیا
کہاں سے آ گئی کچے مکان کی خوشبو

جلیل مانک پوری

دل میں کیسے وہ بے تکلف ہیں
ان کا اپنا مکان ہے گویا

رسا چغتائی

دیکھنا کیا مکان کی جانب
اب یہاں بیٹھ کر مکان سے دور
چلتے چلتے زمین رک سی گئی
ناگہاں اک مکان کے آگے

اکبر حمیدی

ان آنگنوں میں ہیں برسوں سے ایک سے دن رات
یہی رکا ہوا لمحہ ہر اک مکان میں ہے

محسن نقوی

جن اشکوں کی پھیکی لو کو ہم بے کار سمجھتے تھے
ان اشکوں سے کتنا روشن اک تاریک مکانِ ہوا