مرزا غالب

جی ڈھونڈتا ہے پھر وہی فرصت، کہ رات دن
بیٹھے رہیں تصورِ جاناں کیے ہوئے

حیدر علی آتش

چھڑکاؤ کا ارادہ ہے چشمِ پر آب کا
گرد و غبار کوچۂِ جاناں سے دور ہوں
دل کے آئینے میں کر جوہر پنہاں پیدا
در و دیوار سے ہو صورت جاناں پیدا

داغ دہلوی

کیا ذوق ہے کہ شوق ہے سو مرتبہ دیکھوں
پھر بھی یہ کہوں جلوہ جاناں نہیں دیکھا
ملتا نہیں ہم کو دلِ گم گشتہ ہمارا
تو نے تو کہیں اے غمِ جاناں نہیں دیکھا

شیخ ابراہیم ذوق

پڑھ غزل اے ذوقؔ کوئی گرم سی اب تو نہ جا
جانب مضمون طرز تفتہ جاناں چھوڑ کر

مصحفی غلام ہمدانی

ہم آپ فنا ہو گئے اے ہستی موہوم
جوں موجِ تبسم لب جاناں سے نکل کر
ہوں منتظر لطف کھڑا کب سے ادھر دیکھ
کیا مجھ کو دل اے طرۂِ جاناں نہ ملے گا

مومن خان مومن

ناوک انداز جدھر دیدۂِ جاناں ہوں گے
نیم بسمل کئی ہوں گے کئی بے جاں ہوں گے
دل قابل محبت جاناں نہیں رہا
وہ ولولہ وہ جوش وہ طغیاں نہیں رہا

فیض احمد فیض

رحمتِ حق سے جو اس سمت کبھی راہ ملے
سوئے جنت بھی براہِ رہِ جاناں چلیے

باقی صدیقی

جاں دے کے اک تبسم جاناں خریدیے
یہ جنس ہے گراں مگر ارزاں خریدیے

عرفان صدیقی

کیا سیر ہے جاناں یہ ترا پیرہنِ تنگ
تن چاہیے پیراہنِ جاناں کے لیے بھی

رئیس فروغؔ

اوپر بادل نیچے پربت بیچ میں خواب غزالاں کا
دیکھو میں نے حرف جما کے نگر بنایا جاناں کا

احسان دانش

عشق کب اپنے مقاصد کا نگہباں نہ ہوا
کون سا غم ہے جو آخر غمِ جاناں نہ ہوا
غمِ دنیا غم عقبیٰ غمِ ہستی غم موت
کوئی غم بھی تو حریف غمِ جاناں نہ ہوا

اختر شیرانی

دل مہجور کو تسکین کا ساماں نہ ملا
شہرِ جاناں میں ہمیں مسکن جاناں نہ ملا
در جاناں پہ فدا کرتے دل و جاں اخترؔ
وائے بر‌‌ حال‌ دل و جاں در جاناں نہ ملا

اسرار الحق مجاز

اے شوقِ نظارہ کیا کہیے نظروں میں کوئی صورت ہی نہیں
اے ذوق تصور کیا کیجے ہم صورت جاناں بھول گئے

ظہیر کاشمیری

ڈھونڈے گی سر برہنہ ہمیں دشت ہجر میں
اک دن جنوں میں غیرت جاناں بھی آئے گی

جوش ملیح آبادی

فکر ہی ٹھہری تو دل کو فکر خوباں کیوں نہ ہو
خاک ہونا ہے تو خاک کوئے جاناں کیوں نہ ہو
زیست ہے جب مستقل آوارہ گردی ہی کا نام
عقل والو پھر طواف کوئے جاناں کیوں نہ ہو

حسرت موہانی

مجھ کو حیرت ہے ہوا کیا دمِ رخصت ہمدم
جان نکلی مرے پہلو سے کہ جاناں نکلا

سید ضمیر جعفری

کیا ہم کو ستائے گا غم گردشِ دوراں
ہم تجھ سے ابھی اے غمِ جاناں نہیں گزرے

سیف الدین سیف

بھرے بازار میں جنسِ وفا بے آبرو ہو گی
اٹھے گا اعتبار کوئے جاناں ہم نہ کہتے تھے

شکیل بدایونی

ہم ترک ربط و ضبط محبت کے باوجود
سو بار کھنچ کے کوچۂ جاناں میں آ گئے
ذرا حضرتِ دل کی جرأت تو دیکھو
یہ نظارۂ حسنِ جاناں کریں گے

فانی بدایونی

سجدہ کہتے ہیں در یار پہ مر جانے کو
قبلہ وہ سر ہے جو خاکِ رہ جاناں ہو جائے

احمد فراز

مدتوں سے یہی عالم نہ توقع نہ امید
دل پکارے ہی چلا جاتا ہے جاناں جاناں
ہم بھی کیا سادہ تھے ہم نے بھی سمجھ رکھا تھا
غمِ دوراں سے جدا ہے غمِ جاناں جاناں

فراق گورکھپوری

ہاتھ آئے تو وہی دامن جاناں ہو جائے
چھوٹ جائے تو وہی اپنا گریباں ہو جائے

قتیل شفائی

حادثے پھیل گئے سایۂ مژگاں کی طرح
غمِ دوراں بھی ملا ہے غمِ جاناں کی طرح