امام بخش ناسخ

طفلی میں تھی اک دایہ ہیں اب چار کے کاندھے
آغاز سے کیا خوب ہے انجام ہمارا

حیدر علی آتش

طفلی کے گریہ کا یہ کھلا حال وقت مرگ
آغاز ہی میں روتے تھے انجام کے لیے

مصطفٰی خان شیفتہ

شمع کی طرح اٹھے ہم بھی جب
دشمنِ تیرہ سر انجام آیا
بس کہ آغازِ محبت میں ہوا کام اپنا
پوچھتے ہیں ملکُ الموت سے انجام اپنا

مومن خان مومن

حوریں نہیں مومنؔ کے نصیبوں میں جو ہویں
بت خانے ہی سے کیوں یہ بد انجام نکلتا

باقی صدیقی

فسون آرزو ٹوٹے نہ ٹوٹے
ہمارے سامنے ہے دل کا انجام

سراج الدین ظفر

اٹھو اے شب کے غزالو کہ سحر سے پہلے
چند لمحات خوش انجام ابھی باقی ہیں

عبدالحمید عدم

گل نوحہ کناں و صنم دست بہ سینہ
اللہ غنی! لمحۂ انجام ہمارا
ستارے سو گئے انگڑائی لے کر
کہ افسانے کا انجام آ رہا تھا

قمر جلالوی

ہم اسے پہلی محبت کی نظر کہتے ہیں
جس کے آغاز کا انجام بدل جاتا ہے

احسان دانش

حوصلے مایوس ذوق جستجو ناکام ہے
یہ دل‌ نا محرم انجام کا انجام ہے

ادا جعفری

باقی نہ رہے ساکھ اداؔ دشتِ جنوں کی
دل میں اگر اندیشۂ انجام ہی آئے

اسرار الحق مجاز

کسی معصوم پر بیداد کا الزام کیا معنی
یہ وحشت خیز باتیں عشق بد انجام رہنے دے

سدرشن فاکر

الفت کا جب کسی نے لیا نام رو پڑے
اپنی وفا کا سوچ کے انجام رو پڑے

ظہیر کاشمیری

اک اور بھی حسرت ہے پس حسرتِ دیدار
اک اور بھی آغاز ہے انجام کے آگے

احمد راہی

دل کی بیتابی کا آخر کہیں انجام تو ہے
میری قسمت میں نہیں دہر میں آرام تو ہے

تلوک چند محروم

غفلت میں کٹی جاتی ہے محرومؔ جوانی
اچھا نظر آتا نہیں انجام تمہارا

سیف الدین سیف

وفا انجام ہوتی جا رہی ہے
محبت خام ہوتی جا رہی ہے

سیماب اکبر آبادی

ہاں نہیں سیمابؔ مجھ کو اپنی ہستی پر غرور
جانتا ہوں میں مری دنیا فنا انجام ہے

شاد عظیم آبادی

ہمیشہ کیا یوں ہی قسمت میں ہے گنتی گنا دینا
کوئی نالہ نہ لب پر لائق انجام آئے گا
کسی کو کیا خبر اے صبح وقتِ شام کیا ہو گا
خدا جانے ترے آغاز کا انجام کیا ہو گا
وہ سمجھے کہ ہم نے مار لیا ہم سمجھے ملیں گے آخر وہ
ملتے ہی نگہ کے دونوں خوش آغاز سے وہ انجام سے ہم

شکیل بدایونی

اے محبت ترے انجام پہ رونا آیا
جانے کیوں آج ترے نام پہ رونا آیا

فانی بدایونی

جلوہ و دل میں فرق نہیں جلوے کو ہی اب دل کہتے ہیں
یعنی عشق کی ہستی کا آغاز تو ہے انجام نہیں
اک جبر ہے یہ زندگی عشق کہ فانیؔ
ہم مفت بھی یہ عیش غم انجام نہ لیتے

احمد فراز

خوش ہو اے دل کہ محبت تو نبھا دی تو نے
لوگ اجڑ جاتے ہیں انجام سے پہلے پہلے

فراق گورکھپوری

روح لرزاں آنکھ محوِ دید دلِ ناکام تھا
عشق کا آغاز بھی شائستۂ انجام تھا

قتیل شفائی

منکر نہیں کوئی بھی وفا کا مگر قتیلؔ
دنیا کے سامنے مرا انجام بھی تو ہے
آئینہ دارِ محبت ہوں کہ ارباب وفا
اپنے غم کو مرے انجام سے پہچانتے ہیں

کلیم عاجز

چھوٹی ہے نہ چھوٹے گی کبھی پیار کی عادت
میں خوب سمجھتا ہوں جو انجام ہے پیارے
بھولے سے کوئی نام وفا کا نہیں لیتا
دنیا کو ابھی یاد ہے انجام ہمارا