مرزا غالب

شب ہوئی، پھر انجم رخشندہ کا منظر کھلا
اس تکلف سے کہ گویا بتکدے کا در کھلا

یگانہ چنگیزی

واں نقاب اٹھی کہ صبح حشر کا منظر کھلا
یا کسی کے حسن عالم تاب کا دفتر کھلا
کوئے جاناں کا سماں آنکھوں کے آگے پھر گیا
صبح جنت کا جو اپنے سامنے منظر کھلا
خنجرِ قاتل سے جنت کی ہوا آنے لگی
اور بہار زخم سے فردوس کا منظر کھلا

جون ایلیا

کتنی آنکھیں ہوئیں ہلاک نظر
کتنے منظر نہیں رہے آباد
دل نے کیا ہے قصدِ سفر گھر سمیٹ لو
جانا ہے اس دیار سے منظر سمیٹ لو
بس اک غبار طور گماں کا ہے تہ بہ تہ
یعنی نظر بھی کچھ نہیں منظر بھی کچھ نہیں

شکیب جلالی

رنگ بھرتے ہیں خلاؤں میں ہیولے کیا کیا
پیش کرتی ہیں عجب خواب کا منظر یادیں

عرفان صدیقی

سرمہ ہے جب سے خاکِ درِ بوترابؑ کی
آنکھوں میں ہے قبالۂ منظر لکھا ہوا
روشن ہوا یہ شام کے منظر کو دیکھ کر
کرتا ہے سرفراز خدا سر کو دیکھ کر
اپنے بھولے ہوئے منظر کی طرف لوٹ چلو
گم شدہ تیرو، کسی سر کی طرف لوٹ چلو
روشن رہے گھروں میں چراغ غم حسین
جلتے ہوئے خیام کے منظر کا واسطہ
تو تاجدار تاب و تب روزگار کا
مجھ کو بھی اک قبالۂ منظر، علیؑ علیؑ
جسم و جاں کی آگ سے منظر بہ منظر روشنی
اس کا پیکر روشنی، میرا مقدر روشنی
ہر اک تصویر کو کھڑکی سے باہر کیسے پھینکو گے
نگاہوں سے جو چپکے ہیں وہ منظر کیسے پھینکو گے
رات اک شہر نے تازہ کیے منظر اپنے
نیند آنکھوں سے اڑی کھول کے شہپر اپنے

جمال احسانی

کب دل کے آئنے میں وہ منظر نہیں رہا
آنکھوں کے سامنے جو کہ پل بھر نہیں رہا

بشیر بدر

بھیگی ہوئی آنکھوں کا یہ منظر نہ ملے گا
گھر چھوڑ کے مت جاؤ کہیں گھر نہ ملے گا

عالم تاب تشنہ

اٹھتے ہوئے طوفان کا منظر نہیں دیکھا
دیکھو مجھے گر تم نے سمندر نہیں دیکھا

غلام محمد قاصر

آفاق میں پھیلے ہوئے منظر سے نکل کر
چاہا تجھے موجود و میسر سے نکل کر
اداسی مو قلم ہے نقش میں رنگِ ملال ابھرا
تمناؤں کے پس منظر سے دل کے پیش منظر تک
کہیں لوگ تنہا کہیں گھر اکیلے
کہاں تک میں دیکھوں یہ منظر اکیلے
جانے کیسے زلزلے ان آنکھوں میں آن بسے
پردہ اٹھنے لگتا ہے تو منظر گرتے ہیں

فارغ بخاری

کوئی تو نیم وا دریچوں سے
دیکھے اس رتجگے کے منظر کو

اختر امام رضوی

میں تشنۂ دیدار کہ جھونکا ہوں ہوا کا
وہ جھیل میں اترے ہوئے منظر کی طرح ہے

ثروت حسین

تا دیر رہا ذائقۂ مرگ لبوں پر
اک نیند کے ٹوٹے ہوئے منظر سے نکل کر

رسا چغتائی

سارے منظر چھپ سکتے ہیں
ایسا منظر آ سکتا ہے

اختر ہوشیارپوری

شام تنہائی دھواں اٹھتا برابر دیکھتے
پھر سر شب چاند ابھرنے کا بھی منظر دیکھتے
تمام نقش پرندوں کی طرح اترے ہیں
کہ کاغذوں پہ کھلے پانیوں کا منظر ہے

افضل منہاس

کرب کے شہر سے نکلے تو یہ منظر دیکھا
ہم کو لوگوں نے بلایا ہمیں چھو کر دیکھا

احمد فراز

ہر تماشائی فقط ساحل سے منظر دیکھتا
کون دریا کو الٹتا کون گوہر دیکھتا

کیف بھوپالی

تھوڑا سا عکس چاند کے پیکر میں ڈال دے
تو آ کے جان رات کے منظر میں ڈال دے

محسن نقوی

ہم جو پہنچے سرِ مقتل تو یہ منظر دیکھا
سب سے اونچا تھا جو سر نوک سناں پر دیکھا
اب تک مری یادوں سے مٹائے نہیں مٹتا
بھیگی ہوئی اک شام کا منظر تری آنکھیں