انشاء اللہ خان انشا

کمر باندھے ہوئے چلنے کو یاں سب یار بیٹھے ہیں
بہت آگے گئے باقی جو ہیں تیار بیٹھے ہیں

داغ دہلوی

تمہاری آنکھ مرے دل سے لے سبب بے وجہ
ہوئی ہے لڑنے کو تیار دیکھتے جاؤ

مصحفی غلام ہمدانی

ہو عزمِ سفر تجھ کو تو اے مصحفیؔ اب بھی
چلنے کے لیے قافلے تیار کھڑے ہیں
مانی شبیہ یار پہ مت آپ کو مٹا
لوں گا بنا میں تجھ سے جو تیار ہو سو ہو

باقی صدیقی

زندگی اتنی گراں بار نہیں
ہم ابھی مرنے کو تیار نہیں

جگر مراد آبادی

یہ مصرع کاش نقش ہر در و دیوار ہو جائے
جسے جینا ہو مرنے کے لیے تیار ہو جائے

عرفان صدیقی

ہو صبح کہ سر دینے پہ تیار ہیں ہم بھی
خیموں میں بہت دیر سے بیدار ہیں ہم بھی
دوسرا چہرہ اس آئینے میں دکھلائی نہ دے
دل کو اپنے لیے تیار کیا ہے اس نے

جوش ملیح آبادی

نوید عیش سے اے دل ذرا ہشیار ہو جانا
کسی تازہ مصیبت کے لیے تیار ہو جانا
وہ ان کے دل میں شوق خودنمائی کا خیال آنا
وہ ہر شے کا تبسم کے لیے تیار ہو جانا

سیماب اکبر آبادی

مجھ سے مرا افسانۂ ماضی نہ سنو تم
افسانہ نیا پھر کوئی تیار نہ ہو جائے

افضل منہاس

دشمن نظر پڑا تو مٹیں رنجشیں تمام
لڑنے کو سارا شہر ہی تیار ہو گیا

اکبر حمیدی

دیکھنے کو کوئی تیار نہیں ہے بھائی
دشت بھی بے در و دیوار نہیں ہے بھائی

قتیل شفائی

ملاحوں نے ساحل ساحل موجوں کی توہین تو کر دی
لیکن پھر بھی کوئی بھنور تک جانے کو تیار نہیں ہے

کیف بھوپالی

زمانے سے کہو کچھ صاعقہ رفتار ہو جائے
ہمارے ساتھ چلنے کے لیے تیار ہو جائے

نوح ناروی

ہے نام دلِ مضطر جس کا کہتے ہیں جسے سب جان حزیں
مرنے کے لیے مٹنے کے لیے تیار ہوئی تیار ہوا
مقتل میں جفائیں ڈھانے پر مقتل میں جفائیں سہنے پر
قاتل کی نظر بسمل کا جگر تیار ہوئی تیار ہوا