انشاء اللہ خان انشا

جو کچھ کہ عرض کی ہے سو کر دکھاؤں گا میں
واہی نہ بات سمجھو یوں ہی کلامِ میرا
تو جو باتوں میں رکے گا تو یہ جانوں گا کہ سمجھا
مرے جان و دل کے مالک نے مرا کلام الٹا
تمہارے ہاتھوں کی انگلیوں کی یہ دیکھو پوریں غلام تیسوں
غرض کہ غش ہے اگر نہ مانو تو جھٹ اٹھا لے کلام تیسوں

داغ دہلوی

جب وہ بت ہم کلام ہوتا ہے
دل و دیں کا پیام ہوتا ہے
لیجے موسیٰ سے لن ترانی کی
اب تو ہم سے کلام ہوتا ہے
ایمان کی کہیں گے ایمان ہے ہمارا
احمد رسول تیرا مصحف کلام تیرا
واہ کیا منہ سے پھول جھڑتے ہیں
خوب رو ہو کے یہ کلام خراب
وفا کریں گے نباہیں گے بات مانیں گے
تمہیں بھی یاد ہے کچھ یہ کلام کس کا تھا
کیا طرز کلام ہو گئی ہے
ہر بات پیام ہو گئی ہے
آگے تو نہیں نہیں سنی تھی
اب تکیہ کلام ہو گئی ہے

مومن خان مومن

اعجاز جاں دہی ہے ہمارے کلام کو
زندہ کیا ہے ہم نے مسیحا کے نام کو
اس لبِ لعل کی شکایت ہے
کیوں کہ رنگیں نہ ہو کلام مرا

فیض احمد فیض

ہمیں سے اپنی نوا ہم کلام ہوتی رہی
یہ تیغ اپنے لہو میں نیام ہوتی رہی

باقی صدیقی

بند کیجے بیاض غم باقیؔ
سن چکے آپ کا کلام بہت

جون ایلیا

اب میں ہوں اک عذاب میں اور عجب عذاب میں
جنت پر سکوت میں مجھ سے کلام ہو گیا
داد و تحسین کا یہ شور ہے کیوں
ہم تو خود سے کلام کر رہے ہیں
معنی جاؤدان جاں کچھ بھی نہیں مگر زیاں
سارے کلیم ہیں زبوں سارا کلام رنج ہے

جگر مراد آبادی

تو ہزار عذر کرے مگر ہمیں رشک ہے اور ہی کچھ جگرؔ
تری اضطراب نگاہ سے ترے احتیاط کلام سے
میں نہیں بسمل خیام جگرؔ
حافظ خوش کلام نے مارا

عرفان صدیقی

سخن میں موسمِ گل ان کے نام سے آئے
پڑھوں سلام تو خوشبو کلام سے آئے

اسرار الحق مجاز

خامشی کا تو نام ہوتا ہے
ورنہ یوں بھی کلام ہوتا ہے
آنکھ سے آنکھ جب نہیں ملتی
دل سے دل ہم کلام ہوتا ہے

بشیر بدر

کوئی نغمہ دھوپ کے گاؤں سا کوئی نغمہ شام کی چھاؤں سا
ذرا ان پرندوں سے پوچھنا یہ کلام کس کا کلام ہے
نہیں میں میرؔ کے در پر کبھی نہیں جاتا
مجھے خدا سے غزل کا کلام لینا ہے

علی سردار جعفری

کوئی سردارؔ کب تھا اس سے پہلے تیری محفل میں
بہت اہلِ سخن اٹھے بہت اہل کلام آئے

ماجد صدیقی

ہمیں وہ لوگ، کہ ہم جنس جن سے کترائیں
ہمیں وہ لوگ، کہ یزداں سے بھی کلام کریں

تلوک چند محروم

ہمدم محاسبہ مرے اعمال کا نہ کر
اس کو خدا پہ چھوڑ کے میرا کلام دیکھ

ثروت حسین

میں جو گزرا سلام کرنے لگا
پیڑ مجھ سے کلام کرنے لگا

شکیل بدایونی

وہی اک خموش نغمہ ہے شکیلؔ جان ہستی
جو زبان پر نہ آئے جو کلام تک نہ پہنچے
لذت رنگینی اشعار کیا کہیے شکیلؔ
کچھ نہ کچھ احباب کو لطف کلام آ ہی گیا

عزیز حامد مدنی

حکایت حسنِ یار لکھنا حدیث مینا و جام کہنا
ابھی وہی کار عاشقاں ہے سکوت غم کا کلام کہنا

احمد فراز

اس نے نظر نظر میں ہی ایسے بھلے سخن کہے
میں نے تو اس کے پاؤں میں سارا کلام رکھ دیا

قابل اجمیری

یہ طرز فکر یہ رنگِ سخن کہاں قابلؔ
ترے کلام سے پہلے ترے کلام کے بعد

کلیم عاجز

تجھے کلیمؔ کوئی کیسے خوش کلام کہے
جو دن کو رات بتائے سحر کو شام کہے

محسن احسان

درشت کیوں تھا وہ اتنا کلام سے پہلے
کہ میرا نام نہ تھا اس کے نام سے پہلے
ہمارے درس محبت کا پوچھتے کیا ہو
کتابی چہرہ پڑھا ہے کلام سے پہلے

ناصر کاظمی

ہر آدمی نہیں شائستہِ رموزِ سخن
وہ کم سخن ہو مخاطب تو ہم کلام کریں
فرصت ہے اور شام بھی گہری ہے کس قدر
اس وقت کچھ کلام نہیں آپ سے مجھے