انشاء اللہ خان انشا

ہے خوشی سب طرح کی، ناحق کا
خطرۂِ انقلاب باقی ہے

مصحفی غلام ہمدانی

نہیں جائے شکوہ اس سے ہمیں مصحفیؔ ہمیشہ
یہ زمانے کا رہا ہے یوں ہی انقلاب الٹا

مومن خان مومن

آنکھ اس کی پھر گئی تھی دل اپنا بھی پھر گیا
یہ اور انقلاب ہوا انقلاب میں

فیض احمد فیض

نہ گئی تیرے غم کی سرداری
دل میں یوں روزِ انقلاب آئے

میر انیس

زمانہ ایک طرح پر کبھی نہیں رہتا
اسی کو اہلِ جہاں انقلاب سمجھے ہیں

جون ایلیا

بودش اک رو ہے ایک رو یعنی
اس کی فطرت میں انقلاب نہیں

جگر مراد آبادی

اے حسنِ یار شرم یہ کیا انقلاب ہے
تجھ سے زیادہ درد ترا کام یاب ہے

سراج الدین ظفر

اے وارثان سطوت پرویز ہوشیار
دامان وقت میں ہیں ابھی انقلاب اور
اک حسنِ بے نیاز جہاں تھا وہیں رہا
ورنہ ہر انقلاب کے بعد انقلاب ہے

حسرت موہانی

کل کے مقبول آج ہیں مردود
آہ اس دور انقلاب کے رنگ

سیماب اکبر آبادی

بدل گئیں وہ نگاہیں یہ حادثہ تھا اخیر
پھر اس کے بعد کوئی انقلاب ہو نہ سکا

شان الحق حقی

جہانِ دل میں ہوئے انقلاب اور ہی کچھ
مری نگاہ نے دیکھے تھے خواب اور ہی کچھ
ہوا ہے سیل سبک پا فشار باد سے گم
یہ آیا مرحلۂ انقلاب اور ہی کچھ

شکیل بدایونی

اٹھی پھر دل میں اک موج شباب آہستہ آہستہ
کچھ آیا زندگی میں انقلاب آہستہ آہستہ
زندگی کا درد لے کر انقلاب آیا تو کیا
ایک دوشیزہ پہ غربت میں شباب آیا تو کیا

فانی بدایونی

ہر گھڑی انقلاب میں گزری
زندگی کس عذاب میں گزری
جاتی نہیں خلش الم روزگار کی
اے آسماں ہوا وہ ترا انقلاب کیا

امیر مینائی

زمانہ وصل میں لیتا ہے کروٹیں کیا کیا
فراقِ یار کے دن ایک انقلاب نہ تھا
شبِ فراق میں کیوں یارب انقلاب نہ تھا
یہ آسمان نہ تھا یا یہ آفتاب نہ تھا

فراق گورکھپوری

فراقؔ وقت کے رخ سے الٹ رہی ہے نقاب
زمیں سے تا بہ فلک ہے اس انقلاب کی آنچ

ناصر کاظمی

بدلی نہ اس کی روح کسی انقلاب میں
کیا چیز زندہ بند ہے دل کے رباب میں