انشاء اللہ خان انشا

جتنے ہیں ناسوت کی ابد ہوت بھاگیں ہو کے بھوت
ایک چٹکی بھر جو کر بیٹھے بھبوت اپنا مدد

مومن خان مومن

مر گئے اس کے لب جاں بخش پر
ہم نے علاج آپ ہی اپنا کیا
دعوی تکلیف سے جلاد نے
روزِ جزا قتل پھر اپنا کیا
جب کہا یار سے دکھا صورت
ہنس کے بولا کہ دیکھو اپنا منہ
یہ عذر امتحان جذبِ دل کیسا نکل آیا
میں الزام اس کو دیتا تھا قصور اپنا نکل آیا
ہے دل میں غبار اس کے گھر اپنا نہ کریں گے
ہم خاک میں ملنے کی تمنا نہ کریں گے

باقی صدیقی

تیری محفل کے چراغوں کے تلے
کچھ نشاں ملتا ہے اپنا ہم کو
کام آتے نہیں تماشائی
ایک ساتھی ہو اور اپنا ہو
یہی تسکین کی صورت ہے تو پھر
چار دن غم کو بھی اپنا دیکھو
دنیا کسی نسبت سے مجھے یاد رکھے
دشمن ہوں تو دشمن مجھے اپنا کہہ دے
کبھی گل سے ، کبھی بوئے گل سے
کچھ پتا ملتا تھا اپنا پہلے
آ گیا ہر رنگ اپنا سامنے
کارواں اک آ کے ٹھہرا سامنے

الطاف حسین حالی

جو لاکھ غیروں کا غیر کوئی، نہ جاننا اس کو غیر ہرگز
جو اپنا سایہ بھی ہو تو اس کو تصور اپنا نہ کیجیے گا

رئیس فروغؔ

کہیں ملتے ہیں تو مل لیتے ہیں
رنج کہتے نہیں اپنا اپنا

بشیر بدر

پرکھنا مت پرکھنے میں کوئی اپنا نہیں رہتا
کسی بھی آئنے میں دیر تک چہرہ نہیں رہتا

رسا چغتائی

ہر اک درویش کا قصہ الگ ہے
مگر طرزِ بیاں اپنا الگ ہے
ہے کوئی یہاں شہر میں ایسا کہ جسے میں
اپنا نہ کہوں اور وہ اپنا مجھے سمجھے

سلام مچھلی شہری

مرا ہی عکس سہی پھر بھی وہ فرشتہ ہے
جو غیر ہو کے بھی اپنا دکھائی دینے لگے

احمد فراز

دل بھی پاگل ہے کہ اس شخص سے وابستہ ہے
جو کسی اور کا ہونے دے نہ اپنا رکھے

فراق گورکھپوری

بھلا دیں ایک مدت کی جفائیں اس نے یہ کہہ کر
تجھے اپنا سمجھتے تھے تجھے اپنا سمجھتے ہیں
نہ یگانے ہیں نہ بیگانے تری محفل میں
نہ کوئی غیر یہاں ہے نہ کوئی اپنا ہے
رفتہ رفتہ غیر اپنی ہی نظر میں ہو گئے
واہ ری غفلت تجھے اپنا سمجھ بیٹھے تھے ہم

کلیم عاجز

انہیں اپنے بھی لگتے ہیں پرائے
پرایا بھی ہمیں اپنا لگے ہے

ناصر کاظمی

اس دنیا میں اپنا کیا ہے
کہنے کو سب کچھ اپنا ہے