انشاء اللہ خان انشا

سوچئے تو سہی ہٹ دھرمی نہ کیجے صاحب
چٹکیوں میں مجھے کب آپ اڑا سکتے ہیں
گھر سے باہر تمہیں آنا ہے اگر منع تو آپ
اپنے کوٹھے پہ کبوتر تو اڑا سکتے ہیں

حیدر علی آتش

اللٰہ رے فروغ اس رخسار آتشیں کا
شمعوں کے رنگ مثل کافور اڑا دیے ہیں
کاٹ کر پر بھی مجھے صیاد بے قابو نہ چھوڑ
ناتواں ہوں باد کا جھوکا اڑا لے جائے گا
دیوانہ جانتے ہیں ترا ہوشیار انہیں
جامے کو جسم کے بھی جو پرزے اڑا چکے

شیخ ابراہیم ذوق

ہم لطف سیر باغ جہاں خاک اڑا چلے
شوق وصال دل میں لیے یار کا چلے
کیا لے چلے گلی سے تری ہم کو جوں نسیم
آئے تھے سر پہ خاک اڑانے اڑا چلے
دنیا میں جب سے آئے رہا عشق گل رخاں
ہم اس جہاں میں مثلِ صبا خاک اڑا چلے
برق میرا آشیاں کب کا جلا کر لے گئی
کچھ جو خاکستر بچا آندھی اڑا کر لے گئی

مصحفی غلام ہمدانی

کون اس باغ سے اے بادِ صبا جاتا ہے
رنگِ رخسار سے پھولوں کے اڑا جاتا ہے
دل کے دھڑکوں کا یہ عالم ہے کہ بے منت دست
پرزے ہو ہو کے گریبان اڑا جاتا ہے
یہ آئیں ہیں تو ایک دن آسماں کو
جلا کر کھپا کر اڑا کر رہیں گی

باقی صدیقی

کوئی کانٹا ہے یا کوئی گل ہے
دل کا دامن اڑا ہے رستے میں

جگر مراد آبادی

ناصح فسانہ اپنا ہنسی میں اڑا گیا
خوش فکر تھا کہ صاف یہ پہلو بچا گیا
نہ جانے کہاں سے نہ جانے کدھر کو
بس اک اپنی دھن میں اڑا جا رہا ہوں
تری مست نظریں غضب ڈھا رہی ہیں
یہ عالم ہے جیسے اڑا جا رہا ہوں

سراج الدین ظفر

اس کے حریمِ ناز تک کوئی پہنچ سکا کہاں
راہ گزار شوق کی خاک اڑا کے بھول جا

قمر جلالوی

یہ پتہ بتا رہے ہیں رہِ عشق کے بگولے
کہ ہزاروں تم سے پہلے یہاں خاک اڑا گئے ہیں

عرفان صدیقی

آگ میں رقص کیا، خاک اڑا دی ہم نے
اب کے تو شہر میں اک دھوم مچا دی ہم نے
آگ میں رقص کیا خاک اڑا دی ہم نے
موج میں آئے تو اک دھوم مچا دی ہم نے
اور ہم ڈھونڈتے رہ جائیں گے خوشبو کا سراغ
ابھی لے جائے گی اک موج اڑا کر اس کو
تم کیسے گرے آندھی میں چھتنار درختو!
ہم لوگ تو پتے تھے ، اڑا لے گئی ہم کو
میں تو اک بادل کا ٹکڑا ہوں، اڑالے چل مجھے
تو جہاں چاہے وہاں موجِ ہوا لے چل مجھے
تو بہت دیر میں دیوانہ بنانے نکلی
ہم تو اے باؤلی رت خاک اڑا بھی آئے