انشاء اللہ خان انشا

غزل اور قافیوں میں نہ کہی سو کیوں کہ انشاؔ
کہ ہوا نے خود بخود آ ورقِ کتاب الٹا

حیدر علی آتش

جو سطر ہے وہ گیسوئے حور بہشت ہے
خال پری ہے نقطہ ہماری کتاب کا
نو آسماں ہیں صفحۂِ اول کے نو لغت
کونین اک دو ورقہ ہے اپنی کتاب کا

داغ دہلوی

نہ دیکھو داغؔ کا دیوان دیکھو
سمجھ میں یہ کتاب آئے نہ آئے

مصحفی غلام ہمدانی

سیپارۂ دل کو دیکھ اس نے
پوچھا بھی نہ یہ کتاب کیا ہے
سر لوح اس کی صورت کہیں لکھ گیا تھا مانی
اسے دیکھ کر نہ میں نے ورقِ کتاب الٹا
معلوم نہیں کہ اپنا دیواں
ہے مرثیہ یا کتاب کیا ہے
جو کسی نے 'قیس و لیلیٰ' اسے لا کے دی مصور
نہ حیا کے مارے اس نے ورقِ کتاب الٹا
مصحفیؔ تھا ز بسکہ عاشق شعر
مرتے مرتے رہی کتاب میں جان

جون ایلیا

تو جو پڑھتا ہے بوعلی کی کتاب
کیا یہ عالم کوئی کتاب نہیں
ہم کتابی سدا کے ہیں لیکن
حسب منشا کوئی کتاب نہیں
تم پر میں صحیفہ ہائے کہنہ
اک تازہ کتاب رکھ رہا ہوں

جگر مراد آبادی

دل کہ جس پر ہیں نقش رنگارنگ
اس کو سادہ کتاب ہونا تھا
ہم پہ نازل ہوا صحیفۂ عشق
صاحبان کتاب ہیں ہم لوگ

شکیب جلالی

کب سے ہیں ایک حرف پہ نظریں جمی ہوئی
وہ پڑھ رہا ہوں جو نہیں لکھا کتاب میں
چوما ہے میرا نام لبِ سرخ سے شکیبؔ
یا پھول رکھ دیا ہے کسی نے کتاب میں

عرفان صدیقی

سجے سجائے صحفیے خراب کرتے ہیں
یہ کون ہیں جو لہو کو کتاب کرتے ہیں
اس ایک شخص کو مجھ سے حجاب کتنا ہے
پڑھا ہوا وہ دلوں کی کتاب کتنا ہے

احسان دانش

جواز مے کا مخالف اگر ہے اے واعظ
کہاں لکھا ہے دکھا لا اٹھا کتاب اٹھا

بشیر بدر

ادب نہیں ہے یہ اخبار کے تراشے ہیں
گئے زمانوں کی کوئی کتاب دے جاؤ

ظہیر کاشمیری

دل مر مٹا تلاوت رخسارِ یار میں
مرحوم طفلگی سے ہی اہلِ کتاب تھا
وہ حسن کس قدر ادب آموز تھا ظہیرؔ
قد خامۂ رواں تھا تو چہرہ کتاب تھا

غلام محمد قاصر

بارود کے بدلے ہاتھوں میں آ جائے کتاب تو اچھا ہو
اے کاش ہماری آنکھوں کا اکیسواں خواب تو اچھا ہو
ہر سال کی آخری شاموں میں دو چار ورق اڑ جاتے ہیں
اب اور نہ بکھرے رشتوں کی بوسیدہ کتاب تو اچھا ہو

ماجد صدیقی

تھا حرف حرف کیا وہ نگاہوں پہ آشکار
منظر وہ کیا تھا مدِ مقابل کتاب سا

رسا چغتائی

حرف تازہ ورق ورق لکھوں
سادہ دل کی کتاب بھی دیکھوں

اختر ہوشیارپوری

یہ راستے تو مری ہتھیلی کے ترجماں ہیں
میں ان لکیروں میں زندگی کی کتاب دیکھوں

احمد فراز

مگر کبھی کوئی دیکھے کوئی پڑھے تو سہی
دل آئینہ ہے تو چہرہ کتاب جیسا ہے

امیر مینائی

سمجھا ہے تو جو غیبت پیرِ مغاں حلال،
واعظ، بتا یہ مسئلہ ہے کس کی کتاب میں؟

شاذ تمکنت

ارے جسے ورق چہرہ چہرہ یاد ہو شاذؔ
بھلا وہ آدمی درس کتاب کیا لیتا
ہمیں برتنے میں کچھ احتیاط لازم تھی
دلوں کا حال شکستہ کتاب جیسا تھا

محسن نقوی

کبھی وصل میں محسنؔ دل ٹوٹا کبھی ہجر کی رت نے لاج رکھی
کسی جسم میں آنکھیں کھو بیٹھے کوئی چہرہ کھلی کتاب ہوا

ناصر کاظمی

لفظوں میں بولتا ہے رگِ عصر کا لہو
لکھتا ہے دستِ غیب کوئی اس کتاب میں