انشاء اللہ خان انشا

گالی سہی ادا سہی چینِ جبیں سہی
یہ سب سہی پر ایک نہیں کی نہیں سہی

داغ دہلوی

نہ چمکتی جو حسن کی تقدیر
کیوں تری چاند سی جبیں بنتی

مصحفی غلام ہمدانی

اک خلق کی سر نوشت بانچی
اپنا نہ خطِ جبیں میں سمجھا

مصطفٰیٰ خان شیفتہ

ادھر مائل کہاں وہ مہ جبیں ہے
فلک کو مجھ سے کیوں پرخاش و کیں ہے
آج ہی ٹیکہ لگانے سے لگے کیا چار چاند
بے تکلف، بے تکلف مہ جبیں تو کب نہ تھا

مرزا رفیع سودا

مثل نقشِ قدم یہ رکھتی ہے
تیرے در سے مری جبیں اخلاص

باقی صدیقی

چیں بہ جبیں ہو
کتنے حسیں ہو
کیا آپ کی رفتار کا شعلہ ہے زمانہ
رکھ دیتے ہیں ہر نقش زمانہ پہ جبیں لوگ
لہر حالات کی اک زیر زمیں ہوتی ہے
زیست ہر بات پہ کیوں چیں بہ جبیں ہوتی ہے

جگر مراد آبادی

ذات و صفات حسن کا عالم نظر میں ہے
محدود سجدہ کیا مرا ذوق جبیں رہے

عرفان صدیقی

میں تم سے ملنے کو اس شہرِ شب سے آتا ہوں
جہاں تم ایسے ستارہ جبیں نہیں جاتے
اداس خشک لبوں پر لرز رہا ہو گا
وہ ایک بوسہ جو اب تک مری جبیں پہ نہیں
چراغِ گنبد و محراب بجھ گئے ہیں تمام
تو اک ستارۂ داغ جبیں ملا ہے مجھے

رئیس فروغؔ

سارے پربت بن گئے
میرے دشمن کی جبیں

ادا جعفری

کہیں نقشِ پا کوئی موجِ رنگ نہیں تھی میں
میں وہ سوچ ہوں جسے اعتبار جبیں ملا

بہزاد لکھنوی

نقوشِ پا کے صدقے بندگی عشق کے قرباں
مجھے ہر سمت اپنی ہی جبیں معلوم ہوتی ہے
کسی کے پائے نازک پر جھکی ہے اور نہیں اٹھتی
مجھے بہزادؔ یہ اپنی جبیں معلوم ہوتی ہے

جلیل مانک پوری

دیتی ہے مزہ ناصیہ سائی ترے در پر
اک سجدہ جو کرتا ہوں تو کہتی ہے جبیں اور

سلام مچھلی شہری

اپنے خوابوں کے دریچوں میں جلا لو شمعیں
اور یہ سوچ لو اک ماہ جبیں آئے گا
پھر نگار چمن وادی فردائے بہار
گل بدست مہ و انجم بہ جبیں آئے گا

سیماب اکبر آبادی

دردِ سر ان کے لیے کیوں ہے مرا عجز و نیاز
میرے سجدوں سے وہ کیوں چیں بہ جبیں ہوتے ہیں

شبلی نعمانی

بھلی تھی تقدیر یا بری تھی یہ راز کس طرح سے عیاں ہو
بتوں کو سجدے کیے ہیں اتنے کہ مٹ گیا سب لکھا جبیں کا

عزیز حامد مدنی

ضرور کوئی نظر ہے حریف خود نگری
وہ اور بزم میں چیں بر جبیں دروغ دروغ

فانی بدایونی

گم ہیں رہ تسلیم میں طالب بھی طلب بھی
سجدہ ہی در یار ہے سجدہ ہی جبیں ہے