بہادر شاہ ظفر

کیوں کہ ہم دنیا میں آئے کچھ سبب کھلتا نہیں
اک سبب کیا بھید واں کا سب کا سب کھلتا نہیں

داغ دہلوی

نہ جنت کی حسرت نہ حوروں کی پروا
نہ کوئی خوشی کا سبب چاہتے ہیں

مصحفی غلام ہمدانی

کہہ گیا کچھ تو زیرِ لب کوئی
جان دیتا ہے بے سبب کوئی

مصطفٰی خان شیفتہ

میں رشک سے چلا تو کہا بے سبب چلا
اس پر جو رہ گیا تو کہا، بے سبب رہا
یاں عجزِ بے ریا ہے نہ واں ناز دل فریب
شکرِ بجا رہا گلۂِ بے سبب تلک

فیض احمد فیض

کسی کا درد ہو کرتے ہیں تیرے نام رقم
گلہ ہے جو بھی کسی سے ترے سبب سے ہے

باقی صدیقی

ہر گھڑی فکر کہ اب کیا ہو گا
ایسے جینے کا سبب کیا ہو گا
بے کلی بے سبب نہیں ہوتی
اتنی لمبی تو شب نہیں ہوتی
فکر جاں بے سبب نہیں ہوتی
اتنی لمبی ۔۔ تو شب نہیں ہوتی

عرفان صدیقی

وہ ان دنوں تو ہمارا تھا، لیکن اب کیا ہے
پھر اس سے آج وہی رنجِ بے سبب کیا ہے
ذرا سا وقت کہیں بے سبب گذارتے ہیں
چلو یہ شام سرِ جوئے لب گذارتے ہیں
یہ ہم نے بھی سنا ہے عالمِ اسباب ہے دنیا
یہاں پھر بھی بہت کچھ بے سبب ہوتا ہی رہتا ہے

رئیس فروغؔ

دوپہر تک جو نہ چہکے پنچھی
کوئی ایسا ہی سبب لگتا ہے

احسان دانش

اپنی رسوائی کا احساس تو اب کچھ بھی نہیں
ہونٹ ہی سن ہیں خموشی کا سبب کچھ بھی نہیں
یہ جہاں عالمِ اسباب ہے ناداں نہ بنو
کون مانے گا تباہی کا سبب کچھ بھی نہیں

بشیر بدر

بلا رہا ہے زمانہ مگر ترستا ہوں
کوئی پکارے مجھے بے سبب تمہاری طرح

ضیا جالندھری

ہنسی میں چھپ نہ سکی آنسوؤں سے دھل نہ سکی
عجب اداسی ہے جس کا کوئی سبب بھی نہیں
اب جو روٹھے تو جاں پہ بنتی ہے
خوش ہوا مجھ سے بے سبب کوئی

عبید اللہ علیم

کیا ہے اپنے ہی قدموں نے پائمال بہت
یہ ہم میں کج کلہی بے سبب نہیں آئی

علی سردار جعفری

وہی ہے وحشت وہی ہے نفرت آخر اس کا کیا ہے سبب
انساں انساں بہت رٹا ہے انساں انساں بنے گا کب