بہادر شاہ ظفر

بند ہے جس خانۂِ زنداں میں دیوانہ تیرا
اس کا دروازہ پری رو روز و شب کھلتا نہیں

داغ دہلوی

قیامت بپا ہو نزول بلا ہو
یہی آج کل روز و شب چاہتے ہیں

مصحفی غلام ہمدانی

ایسے ڈرے ہیں کس کی نگاہِ غضب سے ہم
بد خواب ہو گئے ہیں جو دو چار شب سے ہم
بوسہ نہ لے سکے کف پا کا ادب سے ہم
کاٹیں ہیں اس لیے کفِ افسوس شب سے ہم
جاوے قاصد ادھر تو یہ کہیو
راہ تکتا ہے روز و شب کوئی
بیٹھے بیٹھے جو ہو گیا وہ کھڑا
اک ستارہ سا شب زمیں سے اٹھا
مشوش شکل سے اس گل کی ظاہر
یہ ہوتا ہے کہیں وہ شب رہا ہے

مصطفٰیٰ خان شیفتہ

ایسی ہی بے قراری رہی متصل اگر
اے شیفتہ ہم آج نہیں بچتے شب تلک

فیض احمد فیض

تری امید ترا انتظار جب سے ہے
نہ شب کو دن سے شکایت، نہ دن کو شب سے ہے

یگانہ چنگیزی

ہو رہے گا سجدہ بھی جب کسی کی یاد آئی
یاد جانے کب آئے زندہ داری شب کیا

باقی صدیقی

صبح میں دیر وہئی جاتی ہے
کیا کہیں آج کی شب کیا ہو گا
تاریکی، سناٹا
توبہ ایسی شب سے
بے کلی بے سبب نہیں ہوتی
اتنی لمبی تو شب نہیں ہوتی
فکر جاں بے سبب نہیں ہوتی
اتنی لمبی ۔۔ تو شب نہیں ہوتی

قمر جلالوی

گو دورِ جام بزم میں تا ختمِ شب رہا
لیکن میں تشنہ لب کا وہی تشنہ لب رہا
وہ چودھویں کا چاند نہ آیا نظر قمر
میں اشتیاقِ دید میں تا ختمِ شب رہا

شکیب جلالی

روشن ہیں دل کے داغ، نہ آنکھوں کے شب چراغ
کیوں شام ہی سے بجھ گئے محفل کے سب چراغ

عرفان صدیقی

دبیز کہر ہے یا نرم دھوپ کی چادر
خبر نہیں ترے بعد اے غبارِ شب کیا ہے
تو اک چراغِ جہانِ دگر ہے کیا جانے
ہم اس زمین پہ کس طرح شب گذارتے ہیں
زمیں پر شورِ محشر روز و شب ہوتا ہی رہتا ہے
ہم اپنے گیت گائیں یہ تو سب ہوتا ہی رہتا ہے

احسان دانش

ہم پہ تو صبح سے روشن تھی یہ شام بے کیف
تم کو اس شام سے اندازۂ شب کچھ بھی نہیں

بشیر بدر

مثال وقت میں تصویر صبح و شام ہوں اب
مرے وجود پہ چھائی ہے شب تمہاری طرح

ضیا جالندھری

ٹھہر گیا ہے مرے دل میں اک زمانے سے
وہ وقت جس کی سحر بھی نہیں ہے شب بھی نہیں
یہ اجالا یہ دن کہاں ہوں میں
مجھ سے کچھ کہہ رہا تھا شب کوئی
میری منزل مجھے نہیں معلوم
صبح کوئی ہے اور شب کوئی

عبید اللہ علیم

وہ خواب خواب فضائے طرب نہیں آئی
عجیب ہی تھی وہ شب پھر وہ شب نہیں آئی

شاد عظیم آبادی

کسی حالت نہ ہم سے بڑھ سکے گی رات فرقت کی
کہ ہم بازی سیہ بختی میں بھی اس شب سے جیتے ہیں
یہاں تک سینہ تنگی سے ضعیف و زار ہے نالہ
چلا جو صبح کو وہ تا بہ لب شب تک نہیں آتا

عزیز حامد مدنی

آخر جھلک اٹھی وہ گریباں کے چاک سے
جس انتظارِ صبح میں گزری تھی میری شب
اس تازہ دم ہوا میں مرے ماہِ نیم ماہ
اس بام سے جدا نہ کبھی ہو طلوع شب
آنکھیں تو کھول دور تغیر ہے ہم نشیں
کچھ کھڑکیاں تو کھول گئی ہے ہوائے شب

احمد فراز

نظر بجھی تو کرشمے بھی روز و شب کے گئے
کہ اب تلک نہیں آئے ہیں لوگ جب کے گئے

فراق گورکھپوری

دنیا کو جگا دے جو عدم کو بھی سلا دے
سنتے ہیں کہ وہ روز وہ شب اور ہی کچھ ہے

قتیل شفائی

فراز بے خودی سے تیرا تشنہ لب نہیں اترا
ابھی تک اس کی آنکھوں سے خمارِ شب نہیں اترا

محسن احسان

پتے کی اک نہ کہی صبح کے اجالوں میں
یہ اور بات کہ ازبر حدیث شب تھی مجھے
میں اپنے وقت کا سقراط تو نہیں لیکن
جہاں پہ بات چھڑی پھر وہیں پہ شب تھی مجھے

محسن نقوی

صرف دن ڈھلنے پہ موقوف نہیں ہے محسنؔ
زندگی زلف کے سائے میں بھی شب کرتی ہے

ناصر کاظمی

کم فرصتئی خوابِ طرب یاد رہے گی
گزری جو ترے ساتھ وہ شب یاد رہے گی
پھر جس کے تصور میں برسنے لگیں آنکھیں
وہ برہمی صحبتِ شب یاد رہے گی
سفرِ منزلِ شب یاد نہیں
لوگ رخصت ہوے کب یاد نہیں
یاد آتا ہے روز و شب کوئی
ہم سے روٹھا ہے بے سبب کوئی
دن گزارا تھا بڑی مشکل سے
پھر ترا وعدۂ شب یاد آیا
آنچ آتی ہے ترے جسم کی عریانی سے
پیرہن ہے کہ سلگتی ہوئی شب ہے کوئی