بہادر شاہ ظفر

اتنا نہ اپنے جامے سے باہر نکل کے چل
دنیا ہے چل چلاؤ کا رستہ سنبھل کے چل

حیدر علی آتش

ایسی وحشت نہیں دل کو کہ سنبھل جاؤں گا
صورت پیرہنِ تنگ نکل جاؤں گا
شامِ ہجراں کسی صورت سے نہیں ہوتی صبح
منہ چھپا کر میں اندھیرے میں نکل جاؤں گا

شیخ ابراہیم ذوق

آنکھیں مری تلووں سے وہ مل جائے تو اچھا
ہے حسرت پابوس نکل جائے تو اچھا
فرقت میں تری تارِ نفس سینے میں میرے
کانٹا سا کھٹکتا ہے نکل جائے تو اچھا

مصطفٰیٰ خان شیفتہ

جی داغِ غمِ رشک سے جل جائے تو اچھا
ارمان عدو کا بھی نکل جائے تو اچھا
تم غیر کے قابو سے نکل آؤ تو بہتر
حسرت یہ مرے دل کی نکل جائے تو اچھا

مومن خان مومن

پھوڑا تھا دل نہ تھا یہ موے پر خلل گیا
جب ٹھیس سانس کی لگی دم ہی نکل گیا
جوں نکہتِ گل جنبش ہے جی کا نکل جانا
اے بادِ صبا میری کروٹ تو بدل جانا
اے دل وہ جو یاں آیا کیا کیا ہمیں ترسایا
تو نے کہیں سکھلایا قابو سے نکل جانا

فیض احمد فیض

آخرِ شب کے ہم سفر فیض نجانے کیا ہوئے
رہ گئی کس جگہ صبا، صبح کدھر نکل گئی
بات بس سے نکل چلی ہے
دل کی حالت سنبھل چلی ہے

باقی صدیقی

آدابِ چمن بھی سیکھ لیں گے
زنداں سے ابھی نکل رہے ہیں

جون ایلیا

اس نے مایوس کر دیا ہو گا
پھانس دل سے نکل گئی ہو گی

عبدالحمید عدم

عدمؔ خرابات کی سحر ہے کہ بارگاہ رموزِ ہستی
ادھر بھی سورج نکل رہا ہے ادھر بھی سورج نکل رہا ہے

قمر جلالوی

کون ساحل پہ دعا مانگ رہا ہے یا رب
بچ کے طوفان مری کشتی سے نکل جاتا ہے
موسیٰؑ سمجھے تھے ارماں نکل جائے گا
یہ خبر ہی نہ تھی طور جل جائے گا
کیا عیادت کو اس وقت آؤ گے تم
جب ہمارا جنازہ نکل جائے گا

عرفان صدیقی

میں خواب دیکھ رہا ہوں کہ وہ پکارتا ہے
اور اپنے جسم سے باہر نکل رہا ہوں میں
میں نے کی تھی صفِ اعدا سے مبارز طلبی
تیر لیکن صفِ یاراں سے نکل کر آیا

رئیس فروغؔ

جنگل سے آگے نکل گیا
وہ دریا کتنا بدل گیا
باتیں سڑک پر رہ جاتی ہیں
ساتھی دور نکل جاتے ہیں

بیان میرٹھی

اے جنوں ہاتھ کے چلتے ہی مچل جاؤں گا
میں گریبان سے پہلے ہی نکل جاؤں گا
وہ ہٹے آنکھ کے آگے سے تو بس صورت عکس
میں بھی اس آئنہ خانے سے نکل جاؤں گا
مجھ سے کہتا ہے مرا دود جگر صورت شمع
دل میں روکو گے تو میں سر سے نکل جاؤں گا
روکتا ہوں کبھی شوخی سے تو ہر طفل سرشک
رو کے کہتا ہے ابھی گھر سے نکل جاؤں گا
کون اٹھائے گا الٰہی شب غم کی افتاد
منہ کو آتا ہے کلیجہ کہ نکل جاؤں گا
کب تک کثافتوں میں رہے گا برنگ سرد
آب رواں کی طرح نکل اور نکل کے چل

زہرا نگاہ

رشتے سے محافظ کا خطرہ جو نکل جاتا
منزل پہ بھی آ جاتے نقشہ بھی بدل جاتا

ظہیر کاشمیری

وہ اک جھلک دکھا کے جدھر سے نکل گیا
اتنی تپش بڑھی کہ زمانہ پگھل گیا
وہ دور تھا تو ہجر کی گرمی سے تھے نڈھال
وہ آ گیا تو ہجر کا موسم نکل گیا

عبید اللہ علیم

عزیز اتنا ہی رکھو کہ جی سنبھل جائے
اب اس قدر بھی نہ چاہو کہ دم نکل جائے

جلیل مانک پوری

ہم تم ملے نہ تھے تو جدائی کا تھا ملال
اب یہ ملال ہے کہ تمنا نکل گئی
دشمن سے پھر گئی نگہِ یار شکر ہے
اک پھانس تھی کہ دل سے ہمارے نکل گئی

ثروت حسین

اک روز میں بھی باغ عدن کو نکل گیا
توڑی جو شاخ رنگ فشاں ہاتھ جل گیا

سلام مچھلی شہری

جہاں سے چھوڑ رہے ہو مجھے اندھیرے میں
وہیں سے راہِ محبت نکل تو سکتی ہے

شکیل بدایونی

مرے دل کو راس آیا نہ جمود غیر فانی
ملی راہ زندگانی مجھے خار سے نکل کر

اختر ہوشیارپوری

کہہ دے کوئی جا کے طائروں سے
چیونٹی کے بھی پر نکل رہے ہیں

احمد فراز

رہِ وفا میں حریف خرام کوئی تو ہو
سو اپنے آپ سے آگے نکل کے دیکھتے ہیں

امیر مینائی

کیا قصد جب کچھ کہوں ان کو جل کر
دبی بات ہونٹوں میں منہ سے نکل کر
نئی سیر دیکھو سوئے قاف چل کر
سرِ راہ بیٹھی ہیں پریاں نکل کر
یہ کہتی ہے وہ زلف عمرِ خضر سے
کہ مجھ سے کہاں جائے گی تو نکل کر
نہ آئیں گے وہ آج کی شب بھی شاید
کہ تارے چھپے پھر فلک پر نکل کر
حضور اس کی باتیں جو کیں ڈرتے ڈرتے
کھڑا ہو رہا دور مطلب نکل کر
چھپے حرف گیری سے سب عیب میرے
ہوئی پردہ ہر بات میں تہ نکل کر
کہے شعر امیر اس کمر کے ہزاروں
مگر رہ گئے کتنے پہلو نکل کر

شاذ تمکنت

اک خوف ہے کہ منزل نسیاں قریب ہے
تو وادی خیال سے آگے نکل نہ جائے
روؤں کہاں کہ راحت خلوت نہیں ہے شاذؔ
ہنسنے پہ بھی یہ شرط کہ آنسو نکل نہ جائے

فراق گورکھپوری

فراقؔ اک نئی صورت نکل تو سکتی ہے
بقول اس آنکھ کے دنیا بدل تو سکتی ہے
اگر تو چاہے تو غم والے شادماں ہو جائیں
نگاہِ یار یہ حسرت نکل تو سکتی ہے
شریک شرم و حیا کچھ ہے بد گمانی‌ٔ حسن
نظر اٹھا یہ جھجک سی نکل تو سکتی ہے

کیفی اعظمی

جس طرح ہنس رہا ہوں میں پی پی کے گرم اشک
یوں دوسرا ہنسے تو کلیجا نکل پڑے
مدت کے بعد اس نے جو کی لطف کی نگاہ
جی خوش تو ہو گیا مگر آنسو نکل پڑے

مجروح سلطان پوری

مرے کام آ گئیں آخرش یہی کاوشیں یہی گردشیں
بڑھیں اس قدر مری منزلیں کہ قدم کے خار نکل گئے

ناصر کاظمی

گلی گلی مری یاد بچھی ہے پیارے رستہ دیکھ کے چل
مجھ سے اتنی وحشت ہے تو میری حدوں سے دور نکل