بہادر شاہ ظفر

کیونکر نہ خاکسار رہیں اہلِ کیں سے دور
دیکھو زمیں فلک سے فلک ہے زمیں سے دور

داغ دہلوی

آدمی سب فرشتے بن جاتے
آسماں پر اگر زمیں بنتی

مصحفی غلام ہمدانی

لکھی غزل اس میں مصحفیؔ جلد
جس کو کہ نئی زمیں میں سمجھا
سجدہ کرے خدا کو تو کیجو سمجھ کے شیخ
اب بھی گڑے ہوئے ہیں ہزاروں زمیں میں بت

مصطفٰی خان شیفتہ

آج ہی کیا ہے فلک پر شکوۂِ فریادِ خلق
اے ستم گر! آفت روئے زمیں تو کب نہ تھا

فیض احمد فیض

فیض اوجِ خیال سے ہم نے
آسماں سندھ کی زمیں کی ہے

باقی صدیقی

کتنے اونچے تھے جہاں سے گویا
آسماں تھی ترے کوچے کی زمیں
حادثہ ہے کوئی ہونے والا
دل کی مانند دھڑکتی ہے زمیں
یہ آگ آگ ہوائیں یہ سرخ سرخ زمیں
مسافروں کے ارادے بدل نہ جائیں کہیں
لہر حالات کی اک زیر زمیں ہوتی ہے
زیست ہر بات پہ کیوں چیں بہ جبیں ہوتی ہے

جگر مراد آبادی

مجھ کو نہیں قبول دو عالم کی وسعتیں
قسمت میں کوئے یار کی دو گز زمیں رہے
سر دادگان عشق و محبت کی کیا کمی
قاتل کی تیغ تیز خدا کی زمیں رہے

عرفان صدیقی

کہیں خرابۂ جاں کے مکیں نہیں جاتے
درخت چھوڑ کے اپنی زمیں نہیں جاتے
بہت ملی تھیں دعائیں فلک نشینی کی
ہمارا کچھ بھی بدن کے سوا زمیں پہ نہیں

رئیس فروغؔ

اپنے آنگن کو کہوں
حادثوں کی سر زمیں

تلوک چند محروم

اڑے لاکھ اوج فلک پر یہ انساں
مقام آخر کار زیر زمیں ہے

جلیل مانک پوری

کچھ روز جلیلؔ اپنی رہی گر یہی حالت
ڈھونڈیں گے فلک اور نکالیں گے زمیں اور

سلام مچھلی شہری

روز پوجا کے لیے پھول سجاتا ہے سلامؔ
جانے کب اس کا خدا سوئے زمیں آئے گا

شبلی نعمانی

اثر کے پیچھے دل حزیں نے نشان چھوڑا نہ پھر کہیں کا
گئے ہیں نالے جو سوئے گردوں تو اشک نے رخ کیا زمیں کا

عزیز حامد مدنی

دو گز زمیں فریب وطن کے لیے ملی
ویسے تو آسماں بھی بہت ہیں زمیں بہت
ملول کچھ غم بالیدگی سے ہے ورنہ
سرشت گل کو ملال زمیں دروغ دروغ
وہ خاک انجم و مہتاب کو نصیب نہیں
جو موج مرگ و نمو کی زمیں میں ہوتی ہے

قیوم نظر

جو گل سرِ عرش بھی نہ کھلتے
وہ گل بھی کھلا دیے زمیں نے