مرزا غالب

اسے کون دیکھ سکتا، کہ یگانہ ہے وہ یکتا
جو دوئی کی بو بھی ہوتی تو کہیں دو چار ہوتا
نالے دل کھول کے دو چار کروں یا نہ کروں
یہ بھی اے چرخِ ستمگار! کروں یا نہ کروں

امام بخش ناسخ

وہ صبح سینۂِ صد چاک میں ہے داغ جنوں
کہ جس سے دیدۂِ خورشید بھی دو چار نہ ہو
ہم کو سارے گلشن آفاق میں
بس پسند آئے یہی دو چار رنگ
گلعذاروں کی جو محفل میں گیا وہ گلِ تر
ہو گئے زرد جو دو چار تو دو چار سفید
دونوں عالم میں اگر ایک نہیں شعبدہ‌ باز
جمع کیوں کر ہوئے اضداد یہ چار آپ سے آپ

انشاء اللہ خان انشا

کہاں گردشِ فلک کی چین دیتی ہے سنا انشاؔ
غنیمت ہے کہ ہم صورت یہاں دو چار بیٹھے ہیں
جب گدگداتے ہیں تجھے ہم اور ڈھب سے تب
سہتے ہیں گالیاں تری نا چار چار پانچ

حیدر علی آتش

اٹھ گئے وصل کی شب پیشتر از یار قدم
آگے ہم عمرِ رواں سے بھی چلے چار قدم
اہل عالم میں ہوں میں زندوں میں مردوں کی طرح
بڑھ چلیں لاکھ مگر ساتھ ہیں دو چار قدم

مصحفی غلام ہمدانی

شعرِ تر پڑھنے سے یاروں میں ہمیں کیا حاصل
مگر اتنا ہے کہ دو چار ہنسے اور روئے
فتنہ ہے یا پری ہے جادو ہے یا بلا ہے
آنکھوں سے یہ کیا ہے کس کی دو چار مجھ کو
کوچہ ہے ترا وعدہ گہ خلق کہ جس میں
دو چار جو بیٹھے ہیں تو دو چار کھڑے ہیں
جی پر یہی ٹھنی ہے تو آج اس کو چھیڑ کر
کھانی مجھے بھی گالیاں دو چار ہو سو ہو
گر یہ بھی ہو سکے نہ تو کہتا ہے مصحفیؔ
دو چار کر لے قید میں دو چار مار ڈال
شیوہ ہر چند کہ اپنا نہیں طالب علمی
تو بھی موجود ہیں ہم کرنے کو دو چار سے بحث
تودے جہاں تھے اس کے شہیدوں کی خاک کے
تیر اس نے مارے ناز سے دو چار ہر طرف
تجھ بن تو ہم نے وے بھی با خامشی ادا کیں
یاد آئیاں جو باتیں دو چار بیٹھے بیٹھے

مصطفٰیٰ خان شیفتہ

روز خوں ہوتے ہیں دو چار ترے کوچے میں
ایک ہنگامہ ہے اے یار ترے کوچے میں
شیفتہ ایک نہ آیا تو نہ آیا کیا ہے
روز آ رہتے ہیں دو چار ترے کوچے میں

مومن خان مومن

کرتا ہے قتلِ عام وہ اغیار کے لیے
دس بیس روز مرتے ہیں دو چار کے لیے
غیروں سے اس نے ہرگز چھوڑی نہ ہاتھا پائی
جب تک اجل کا صدمہ دو چار تک نہ پہنچا

یگانہ چنگیزی

حیا کی بات ہے اب تک قفس میں زندہ ہوں
چمن میں جاؤں تو نرگس سے آنکھ چار نہ ہو
یہ ذرا سی اک جھلک نے دل و جاں کو یوں جلایا
تری برقِ حسن سے پھر کوئی کیا دو چار ہوتا

جگر مراد آبادی

مجھے دیں نہ غیظ میں دھمکیاں گریں لاکھ بار یہ بجلیاں
مری سلطنت یہ ہی آشیاں مری ملکیت یہ ہی چار پر

قمر جلالوی

مری محبت سے جلنے والے لگاتے ہیں دو چار باتیں
یقین کس کس کا تم کرو گے ہزار منہ ہیں ہزار باتیں
قمر شبِ انتظار ہم نے سحرا انہیں وحشتوں میں کر دی
کبھی چراغوں سے چار باتیں کبھی ستاروں سے چار باتیں
لاتا نہیں کوئی مری تربت پہ چار پھول
نا پیدا ایسے ہو گئے پروردگار پھول
جاتی نہیں شباب میں بھی کم سنی کی بو
ہاروں میں ان کے چار ہیں کلیاں تو چار پھول

شکیب جلالی

آ کے پتھر تو مرے صحن میں دو چار گرے
جتنے اس پیڑ کے پھل تھے ‘ پسِ دیوار گرے

شبلی نعمانی

باغ کی سیر کو جاتے تو ہو پر یاد رہے
سبزہ بیگانہ ہے دو چار نہ ہونے پائے

شکیل بدایونی

دشمن خوئے وفا رسمِ محبت کے حریف
وہی کیا اور بھی دو چار نظر آتے ہیں

احمد فراز

شہر کا شہر ہی ناصح ہو تو کیا کیجیے گا
ورنہ ہم رند تو بھڑ جاتے ہیں دو چار کے ساتھ
اہلِ وفا کے باب میں اتنی ہوس نہ رکھ
اس قحط زارِ عشق میں دو چار ہی سہی

محسن احسان

حیرتی ہوں وہ مسلماں کو مسلماں کرنے
سرِ بازار نکل آتے ہیں دو چار کے ساتھ