مرزا غالب

جب بہ تقریبِ سفر یار نے محمل باندھا
تپشِ شوق نے ہر ذرے پہ اک دل باندھا

امام بخش ناسخ

اب کہاں نالے کہ اس لیلیٰ کا مسکن دل ہوا
تھا جرس جو پیش ازیں وہ ان دنوں محمل ہوا
عاشق بے ننگ سے ہوتا ہے معشوقوں کو ننگ
پیرہن مجنوں کا پھٹ کر پردۂِ محمل ہوا

حیدر علی آتش

اے صبا تو ہی اڑا کر رخ لیلیٰ دکھلا
دست مجنوں نہیں تا پردۂِ محمل جاتا

داغ دہلوی

مرقد قیس پر اب تک بھی تو خار صحرا
انگلیوں سے یہ بتاتے ہیں وہ محمل آیا
جو ہوتی خوبصورت تو نہ چھپتی قیس سے لیلیٰ
مگر ایسے ہی ویسے پردۂِ محمل میں رہتے ہیں
پسِ پردہ بھی لیلیٰ ہاتھ رکھ لیتی ہے آنکھوں پر
غبار ناتوان قیس جب محمل سے ملتا ہے

مصحفی غلام ہمدانی

اس قافلے میں جاتے ہیں محمل تو ہزاروں
پر جس میں کہ لیلیٰ ہے وہ محمل نہیں معلوم
کس راہ گیا لیلیٰ کا محمل نہیں معلوم
ہے بادیہ ریگ اور ہمیں منزل نہیں معلوم
کوئی مجنوں سے ٹک جھوٹے ہی کہہ دے
کہ لیلیٰ کا ابھی محمل گیا ہے
نہ ناقہ اور نہ محمل رہا میں سودائی
ہنوز ناقہ و محمل سے بات کرتا ہوں
مجنون بے خرد نے دی جاں بہ ناامیدی
لیلیٰ کا دیکھتے ہی محمل تڑپ تڑپ کر

مصطفٰی خان شیفتہ

افسوس باد آہ سے ہل بھی نہ جائے اور
یوں ہو ہوا سے پردۂِ محمل کو اضطراب

مومن خان مومن

ہو صر صر فغاں سے نہ کیونکر وہ مضطرب
مشکل ہوا ہے پردۂِ محمل کو تھامنا

فیض احمد فیض

نگاہِ منتظر کب تک کرے گی آئینہ بندی
کہیں تو دشتِ غم میں یار کا محمل ٹھہر جائے

یگانہ چنگیزی

تصور نے دکھایا شاہد مقصود کا جلوہ
اتر آئی ہے لیلیٰ سر زمین دل پہ محمل سے
نظارۂ رخ لیلیٰ مبارک اے مجنوں
نگاہِ شوق نے پردے اٹھائے محمل کے
لیلیٰ کو بھلا دیکھے گا کن آنکھوں سے مجنوں
جب طاقت نظارۂ محمل نہیں رکھتا

جون ایلیا

اب کوچ کرو یارو صحرا سے کہ سنتے ہیں
صحرا میں اب آئندہ محمل نہیں آنے کا

قمر جلالوی

خموشی پر یہ حالت ہے خدا معلوم کیا کرتا
کوئی آواز آ جاتی اگر مجنوں کو محمل سے
نگاہِ قیس ٹکراتی رہے سارباں کب تک
یہ بندش بھی کسی دن پردۂ محمل سے ٹوٹے گی

احسان دانش

حسن کے پردے میں ہو سکتا نہیں ہرگز قرار
روزِ اول سے یہ لیلیٰ خوگر محمل نہیں
فشار ضبط سے لیلیٰ کہیں مجنوں نہ ہو جائے
نہ دیکھ اب سوئے محمل سوئے محمل دیکھنے والے

تلوک چند محروم

دل غم دیدہ روتا ہے تری صحرا نوردی پر
مگر اے قیس ہم لیلیٰ کو بھی محمل سمجھتے ہیں
وحشت فزا بہت تھی ہوا دشتِ قیس کی
پردہ کسی کا پردۂ محمل میں رہ گیا

جلیل مانک پوری

خدا جانے غبارِ راہ ہے یا قیس ہے لیلیٰ
کوئی آغوش کھولے پردۂ محمل سے ملتا ہے

خاطر غزنوی

وحشت میں ڈھونڈتا ہی رہا قیس عمر بھر
گم ہو گئیں بگولوں میں محمل کی دھڑکنیں

فانی بدایونی

پھر تو مضراب جنوں ساز انا لیلیٰ چھیڑ
ہائے وہ شور انا القیس کہ محمل سے اٹھا
جن خاک کے ذروں پر وہ سایۂ محمل تھا
جو خاک کا ذرہ تھا وحشت کدۂ دل تھا