مرزا غالب

محابا کیا ہے ، میں ضامن، ادھر دیکھ
شہیدانِ نگہ کا خوں بہا کیا
سات اقلیم کا حاصل جو فراہم کیجے
تو وہ لشکر کا ترے نعل بہا ہوتا ہے

بہادر شاہ ظفر

تیرے دانتوں کے تصور سے نہ تھا گر آب دار
جو بہا آنسو وہ در بے بہا کیونکر ہوا

حیدر علی آتش

بے یار بام پر جو وحشت میں چڑھ گیا ہوں
پرنالے روتے روتے میں نے بہا دیے ہیں
روتے روتے جان جاوے گی فراقِ یار میں
اشک کا دریا مرا مردہ بہا لے جائے گا
بوسے لے گا دست تیغِ قاتل بے باک کے
آتشؔ مقتول اپنا خوں بہا لے جائے گا

شیخ ابراہیم ذوق

میرا خوں ہے ترے کوچے میں بہا یاد رہے
یہ بہا وہ نہیں جس کا نہ بہا یاد رہے
بہا دیا مرا خوں اس نے اپنے کوچے میں
اسی کو یارو دیت سمجھو خوں بہا سمجھو

مصحفی غلام ہمدانی

جس کو وہ زلف مار ڈالے ہے
سرِ مو خوں بہا نہیں ملتا
آئے کبھی جو باغ میں دیوانگان دشت
آنکھوں سے جوئے خون بہا کر چلے گئے
گئے وے دن کہ تمنا ہمیں اک اشک کی تھی
اب تو ان آنکھوں سے دریا سا بہا جاتا ہے
کچھ ہے سرخی سی آج پلکوں پر
قطرۂِ خوں کوئی بہا ہو گا

مصطفٰی خان شیفتہ

فنائے عاشقاں عینِ بقا ہے
دیت زندوں کی کیسی، خون بہا کیا

فیض احمد فیض

گنو سب حسرتیں جو خوں ہوئی ہیں تن کے مقتل میں
مرے قاتل حسابِ خوں بہا ایسے نہیں ہوتا

مرزا رفیع سودا

عشق کس ذات کا عقرب ہے کہ لگتے ہی نیش
دل کے ساتھ آنکھوں سے پانی ہو بہا کیا کیا کچھ

جگر مراد آبادی

یادش بخیر جب وہ تصور میں آ گیا
شعر و شباب و حسن کا دریا بہا گیا
میں قطرہ ہوں لیکن بہ آغوش دریا
ازل سے ابد تک بہا جا رہا ہوں

سراج الدین ظفر

آئے خزاں میں جو کبھی یاد تجھے بہار کی
ساغر چشمِ تر سے دو اشک بہا کے بھول جا

عبدالحمید عدم

کسی نے حسن تغافل سے جاں طلب کر لی
کسی نے لطف کے دریا بہا کے مار دیا

قمر جلالوی

مرا خاموش رہ کر بھی انہیں سب کچھ سنا دینا
زباں سے کچھ نہ کہنا دیکھ کر آنسو بہا دینا
مجھے پھول سے زیادہ ہے قفس میں یادِ شبنم
جو چمن میں چار آنسو مرے نام پر بہا دے

عرفان صدیقی

تم اپنی مملکت میں جرم کر دو زندگی، ورنہ
سبھی مانگیں گے اپنا خون بہا آہستہ آہستہ
پتھر تھے کہ گوہر تھے ، اب اس بات کا کیا ذکر
اک موج بہرحال بہا لے گئی ہم کو

مجید امجد

کہنہ یادوں کے برف زاروں سے
ایک آنسو بہا، بہا تنہا

ادا جعفری

دامان چاک چاک گلوں کو بہانہ تھا
دل کا جو رنگ تھا وہ نظر سے چھپا نہ تھا
دامان چاک چاک گلوں کو بہانہ تھا
ورنہ نگاہ و دل میں کوئی فاصلہ نہ تھا
کدھر سے سنگ چلا تھا اداؔ کہاں پہنچا
جو ایک ٹھیس سے ٹوٹیں انہیں بہا نہ ملے

بشیر بدر

مجھ کو ان سچی باتوں سے اپنے جھوٹ بہت پیارے ہیں
جن سچی باتوں سے اکثر انسانوں کا خون بہا ہے
خون کا کام رواں رہنا ہے
جس جگہ چاہو بہا لو ہم کو

ضیا جالندھری

تیری اقدار پر کاہ نہیں ہیں کہ جوں ہی
کوئی لہر اٹھے انہیں ساتھ بہا کر لے جائے

غلام محمد قاصر

یاد اشکوں میں بہا دی ہم نے
آ کہ ہر بات بھلا دی ہم نے

ماجد صدیقی

ہر ایک شخص کا حق کچھ نہ کچھ ہے مجھ پہ ضرور
میں اپنے قتل کا کس کس کو خوں بہا دوں گا

حسرت موہانی

پیہم دیا پیالۂ مے برملا دیا
ساقی نے التفات کا دریا بہا دیا

رسا چغتائی

کب نہ جانے ابل پڑے چشمہ
کب یہ صحرا مجھے بہا لے جائے

خاطر غزنوی

جفائیں بخش کے مجھ کو مری وفا مانگیں
وہ میرے قتل کا مجھ ہی سے خوں بہا مانگیں

شاد عظیم آبادی

ٹھہر تو جا رخ جاناں پہ اے نگہ کچھ دیر
سند نہیں فقط آنسو بہا کے رہ جانا

فانی بدایونی

کسی کے ایک اشارے میں کس کو کیا نہ ملا
بشر کو زیست ملی موت کو بہانہ ملا

شاذ تمکنت

حیات راس نہ آئے اجل بہانہ کرے
ترے بغیر بھی جینا پڑے خدا نہ کرے

ناصر کاظمی

شفقی ہو گئی دیوارِ خیال
کس قدر خون بہا ہے اب کے