فیض احمد فیض

شاید اپنا بھی کوئی بیت حدی خواں بن کر
ساتھ جائے گا مرے یار جدھر جائیں گے

مرزا رفیع سودا

لے دیدۂ تر جدھر گئے ہم
ڈبرے جو تھے خشک بھر گئے ہم

یگانہ چنگیزی

نکالے عیب میں سو حسنِ حسن میں سو عیب
خیال ہی تو ہے جیسا بندھے جدھر گزرے

باقی صدیقی

دل کے ہر دریچے میں جھانکتے ہیں کچھ چہرے
خود کو راہ میں پایا رخ کیا جدھر اپنا

جگر مراد آبادی

مستانہ کر رہا ہوں رہ عاشقی کو طے
لے جائے جذب شوق مرا اب جدھر مجھے

خواجہ میر درد

جگ میں آ کر ادھر ادھر دیکھا
تو ہی آیا نظر جدھر دیکھا

شکیب جلالی

مانندِ صبا جدھر گئے ہم
کلیوں کو نہال کر گئے ہم

عرفان صدیقی

بستیوں کی شکل و صورت مختلف کتنی بھی ہو
آسماں لیکن وہی ہو گا جدھر جائیں گے لوگ
شہر و صحرا تو ہیں انسانوں کے رکھے ہوئے نام
گھر وہیں ہے دلِ دیوانہ جدھر ہے سائیں
ریت میں پھول کھلیں، سنگ سے چشمہ پھوٹے
زندگی اس کا اشارہ ہے جدھر بھی ہو جائے

جمال احسانی

کسی بھی دشت کسی بھی نگر چلا جاتا
میں اپنے ساتھ ہی رہتا جدھر چلا جاتا

اختر شیرانی

کس کی آنکھوں کا لیے دل پہ اثر جاتے ہیں
مے کدے ہاتھ بڑھاتے ہیں جدھر جاتے ہیں
بھولتی ہی نہیں دل کو تری مستانہ نگاہ
ساتھ جاتا ہے یہ مے خانہ جدھر جاتے ہیں
چشمِ حیراں میں سمائے ہیں یہ کس کے جلوے
طور ہر گام پہ رقصاں ہیں جدھر جاتے ہیں

ادا جعفری

ہر اک دریچہ کرن کرن ہے جہاں سے گزرے جدھر گئے ہیں
ہم اک دیا آرزو کا لے کر بطرز شمس و قمر گئے ہیں

عبید اللہ علیم

کبھی وہ جسم ہوا اور کبھی وہ روح تمام
اسی کے خواب تھے آنکھوں میں ہم جدھر سے گئے

ماجد صدیقی

پہنچے بہ کوئے دل کہ نظر سے گزر گئے
رنگینیاں بکھیر گئے تم جدھر گئے

ثروت حسین

ان راستوں میں نام و نسب کا نشاں نہ تھا
ہنگامۂ بہار میں خلقت جدھر گئی
دشت لے جائے کہ گھر لے جائے
تیری آواز جدھر لے جائے

شاد عظیم آبادی

بھول نہ اس کو دھن ہے جدھر کی چونک مسافر رات نہیں ہے
شکل نمایاں ہو گی سحر کی چونک مسافر رات نہیں ہے

شکیل بدایونی

غنچوں سے پیار کر کے یہ عزت ہمیں ملی
چومے قدم بہار نے گزرے جدھر سے ہم
ہیں دلیل کم نگاہی اختلافات نظر
زندگی کا ایک ہی رخ ہے جدھر سے دیکھیے

عزیز حامد مدنی

وہ غریبِ شہر کہے بھی کیا جو تری زباں سے ہے بے خبر
مگر ایک راہِ سخن بھی ہے کہ یہ زندگی ہے جدھر گئی

ناصر کاظمی

اہلِ دل آنکھ جدھر کھولیں گے
اک دبستانِ ہنر کھولیں گے