مرزا غالب

باوجودِ یک جہاں ہنگامہ پیرا ہی نہیں
ہیں ’’چراغان شبستان دل پروانہ‘‘ ہم

بہادر شاہ ظفر

شعلۂِ حسن چمن میں نہ دکھایا اس نے
ورنہ بلبل کو بھی پروانہ بنایا ہوتا

حیدر علی آتش

روز و شب اس شمعِ رو کو بھیجتا ہوں خط شوق
نامہ بر دن کو کبوتر رات کو پروانہ ہے
اب نہیں اے یار جوبن کو ترے بیم زوال
خط مشکیں حسن کی جاگیر کا پروانہ ہے
سمجھتے ہیں مرے دل کی وہ کیا نافہم و ناداں ہیں
حضور شمع بے مطلب نہیں پروانہ آتا ہے
گریاں ہے اگر شمع تو سر دھنتا ہے شعلہ
معلوم ہوا سوختہ پروانہ ہے اس کا

داغ دہلوی

رخِ روشن کے آگے شمع رکھ کر وہ یہ کہتے ہیں
ادھر جاتا ہے دیکھیں یا ادھر پروانہ آتا ہے

شیخ ابراہیم ذوق

عشق کو نشوونما منظور ہے کب ورنہ سبز
تخم اشک شمع ہو خاکستر پروانہ میں

یگانہ چنگیزی

آساں نہیں ہے آگ میں دانستہ کودنا
دیوانہ شوقِ وصل میں پروانہ ہو گیا

قمر جلالوی

حفاظت کے لیے اجڑی ہوئی محفل میں بیٹھے ہیں
اڑا دی گر کسی نے خاکِ پروانہ تو کیا ہو گا

عرفان صدیقی

جسم سے روح تلک راہ نوردی کے لیے
ہو عنایت مرے ہونٹوں کو بھی پروانۂ لب
تم کیا شررِ عشق لیے پھرتے ہو صاحب
اس سے تو زیادہ پرِ پروانہ اٹھا لے

احسان دانش

ہر دو جانب احتیاط اچھی ہے جب تک ہو سکے
یوں تو میں آگاہ سب تم شمع ہو پروانہ ہم
دامنِ دل شبنم و گل سے پکڑ لیتا ہے آگ
خلقۃً ہم ہیں جواب فطرت پروانہ ہم
رنگ لایا ہے برائے ‌ دیدۂ انجام جو
شمع ہر ہر ذرۂ خاک پرِ پروانہ تھا
دید کے قابل تماشا تھا یہ ہنگام سحر
شمع کا ہر سانس محو ماتم پروانہ تھا

اختر شیرانی

بظاہر ہم ہیں بلبلِ کی طرح مشہور ہرجائی
مگر دل میں گداز فطرت پروانہ رکھتے ہیں

بہزاد لکھنوی

شمعِ سوزاں کچھ خبر بھی ہے تجھے او مست غم
حسن محفل ہے جبھی جب تک کہ پروانہ رہے
میں ڈھونڈ رہا ہوں مری وہ شمع کہاں ہے
جو بزم کی ہر چیز کو پروانہ بنا دے

جلیل مانک پوری

ہوتی کہاں ہے دل سے جدا دل کی آرزو
جاتا کہاں ہے شمع کو پروانہ چھوڑ کر

سیماب اکبر آبادی

شمع ایوان حرم ہو یا چراغ طاق دیر
ہم کو دونوں سے تعلق ہے کہ ہیں پروانہ ہم
دل جلا پھر خود جلے پھر ساری دنیا جل اٹھی
سوز لائے تھے بمقدار پرِ پروانہ ہم
آج وہ بزم میں خود شمع بنے بیٹھے ہیں
ہے کوئی مدعی سوز جو پروانہ بنے

شاد عظیم آبادی

جو شمع ہوا کرتی ہے روشن سرِ بازار
اس شمع پہ گرتا نہیں پروانہ ہمارا

شکیل بدایونی

ہے برق سرِ طور سے دل شعلہ بداماں
شمع سرِ محفل ہوں میں پروانہ نہیں ہوں
اہلِ جنوں کو تاب کہاں سوز حسن کی
جلتے ہی شمع خاک میں پروانہ مل گیا

فانی بدایونی

جلوۂ عشق حقیقت تھی حسنِ مجاز بہانہ تھا
شمع جسے ہم سمجھے تھے شمع نہ تھی پروانہ تھا

امیر مینائی

طور پر کہتی ہے یہ شمع تجلی کی زباں
سرمۂ حسن ہے خاکسترِ پروانۂ عشق
ہم تھے اور چہرۂ ِ محبوب کا نظارہ امیر
شعلۂ حسن تھا جس روز نہ پروانۂ عشق

کلیم عاجز

بگڑتا کیا ہے پروانے کا جل کر خاک ہونے میں
کہ پھر پروانے ہی کی خاک سے پروانہ بنتا ہے
امید ایسی نہ تھی محفل کے ارباب بصیرت سے
گناہ شمع کو بھی جرم پروانہ بنا دیں گے

کیف بھوپالی

ختم ہوئی سب رات کی محفل
ایک پرِ پروانہ پڑا ہے

مجروح سلطان پوری

اے رخِ زیبا بتا دے اور ابھی ہم کب تلک
تیرگی کو شمع تنہائی کو پروانہ کہیں

ناصر کاظمی

صبح دم دیکھا تو سارا باغ تھا گل کی طرف
شمع کے تابوت پر رویا نہ پروانہ کوئی