مرزا غالب

محرم نہیں ہے تو ہی نوا ہائے راز کا
یاں ورنہ جو حجاب ہے ، پردہ ہے ساز کا
تاراجِ کاوشِ غمِ ہجراں ہوا، اسدؔ!
سینہ، کہ تھا دفینہ گہر ہائے راز کا

داغ دہلوی

جن کو اپنی خبر نہیں اب تک
وہ مرے دل کا راز کیا جانیں

شیخ ابراہیم ذوق

آہ و فغاں نہ کر جو کھلے ذوقؔ دل کا حال
ہر نالہ اک کلید در گنج راز ہے

مصحفی غلام ہمدانی

آہ ہم راز کون ہے اپنا
بخت ناساز کون ہے اپنا
ازبسکہ خونِ دل کا کھاتا ہے جوش ہر دم
مشکل ہوا ہے ہم کو اخفائے راز کرنا

مصطفٰی خان شیفتہ

کچھ امتیاز مجھ کو نہ مے کا نہ سارکا
ناچار ہوں کہ حکم نہیں کشفِ راز کا
بارے عجیب بات تو پھیلی جہان میں
پایا کسی نے گو ثمر افشائے راز کا

مومن خان مومن

پردہ نشیں کے عشق میں پردہ دری نہ ہو کہیں
ہوتی ہیں بے حجابیاں جان نہفتہ راز میں
محفل میں تم اغیار کو دز دیدہ نظر سے
منظور ہے پنہاں نہ رہے راز تو دیکھو
غیروں پہ کھل نہ جائے کہیں راز دیکھنا
میری طرف بھی غمزۂِ غماز دیکھنا

فیض احمد فیض

سوزش دردِ دل کسے معلوم
کون جانے کسی کے عشق کا راز
عشق دل میں رہے تو رسوا ہو
لب پہ آئے تو راز ہو جائے
عمر بے سود کٹ رہی ہے فیض
کاش افشائے راز ہو جائے

یگانہ چنگیزی

پردۂ ہجر وہی ہستی موہوم تھی یاسؔ
سچ ہے پہلے نہیں معلوم تھا یہ راز مجھے

باقی صدیقی

میری آمد نہ گراں گزری ہو
اس خموشی میں کوئی راز تو ہے
کب تک راز رہے گا راز
ساری دنیا ہے غماز
ہمرازوں کے سینوں میں
ڈھونڈ رہا ہوں اپنا راز

قمر جلالوی

مرتے مرتے بھی کہا کچھ نہ مریضِ غم نے
پاس یہ تھا کہ مسیحا کا عیاں راز نہ ہو
اب التماسِ دید کروں تو گناہ گار
واقف میں ہو گیا ترے پردے کے راز سے
اللہ ان کو عشق کی کیونکر خبر ہوتی
واقف نہ تھا کوئی بھی مرے دل کے راز سے

عرفان صدیقی

خیال میں ترا کھلنا مثال بندِ قبا
مگر گرفت میں آنا تو راز ہو جانا

احسان دانش

ہنگامۂ خودی سے تو بے نیاز ہو جا
گم ہو کے بے خودی میں آگاہ راز ہو جا
سینے میں سوز بن کر کب تک چھپا رہے گا
عنوان رازداری تفصیل راز ہو جا

اسرار الحق مجاز

آپ کی مخمور آنکھوں کی قسم
میری مے خواری ابھی تک راز ہے
ہنس دیے وہ میرے رونے پر مگر
ان کے ہنس دینے میں بھی اک راز ہے
ہم کو رسوا نہ کر زمانے میں
بسکہ تیرا ہی راز ہیں ہم لوگ

عبید اللہ علیم

اول اول بول رہے تھے خواب بھری حیرانی میں
پھر ہم دونوں چلے گئے پاتال سے گہرے راز میں چپ