مرزا غالب

غنچۂِ ناشگفتہ کو دور سے مت دکھا، کہ یوں
بوسے کو پوچھتا ہوں میں، منہ سے مجھے بتا کہ یوں

حیدر علی آتش

دیوانگی نے کیا کیا عالم دکھا دیے ہیں
پریوں نے کھڑکیوں کے پردے اٹھا دیے ہیں
کنعاں سے شہر مصر میں یوسف کو لے گئے
بازار میں بھی حسن کو آخر دکھا چکے

داغ دہلوی

زخمِ دل میں نہیں ہے قطرۂِ خوں
خوب ہم نے دکھا کے دیکھ لیا
تھا مرا منہ نہ قابل لبیک
کعبہ مجھ کو دکھا دیا تو نے

شیخ ابراہیم ذوق

تم چشم سرمگیں کو جو اپنی دکھا چلے
بیٹھے بٹھائے خاک میں ہم کو ملا چلے
واہ اے سوزِ دروں کوچے میں اس کے برق آہ
رات ہم کو ہر قدم مشعل دکھا کر لے گئی

مصحفی غلام ہمدانی

کپڑے بدل کے آئے تھے آگ مجھے لگا گئے
اپنے لباس سرخ کی مجھ کو بھڑک دکھا گئے
سحر کیا کہ ٹوٹکا آئی یہ وائے کیا بلا
ہائے یہ جی کدھر چلا زور ادا دکھا گئے
سو بار تم تو سامنے آ کر چلے گئے
دھوکا سا ایک ہم کو دکھا کر چلے گئے
خوابِ عدم سے میں ابھی چونکا ہوں دور ہو
اے صبحِ غم نہ اپنا مجھے منہ دکھا سرک

مومن خان مومن

تھی بد گمانی اب انہیں کیا عشق حور کی
جو آ کے مرتے دم مجھے صورت دکھا گئے
شعلۂِ دل کو ناز تابش ہے
اپنا جلوہ ذرا دکھا جانا

میر مہدی مجروح

چلمن کا الٹ جانا ظاہر کا بہانہ ہے
ان کو تو بہر صورت اک جلوہ دکھا جانا

باقی صدیقی

اک آئینہ نظر میں سما کر چلا گیا
تصویر میری مجھ کو دکھا کر چلا گیا

جون ایلیا

کسے ہے خواہش مرہم گری مگر پھر بھی
میں اپنے زخم دکھا لوں اگر اجازت ہو

جگر مراد آبادی

حسنِ ازل کی شان دکھا کر چلے گئے
اک واقعہ سا یاد دلا کر چلے گئے
سمجھا کے پستیاں مرے اوجِ کمال کی
اپنی بلندیاں وہ دکھا کر چلے گئے
شکست حسن کا جلوہ دکھا کے لوٹ لیا
نگاہ نیچی کیے سر جھکا کے لوٹ لیا
رہا خرابِ محبت ہی وہ جسے تو نے
خود اپنا دردِ محبت دکھا کے لوٹ لیا
کرشما سازی حسنِ ازل ارے توبہ
مرا ہی آئینہ مجھ کو دکھا کے لوٹ لیا

خواجہ میر درد

وحدت میں تیری حرف دوئی کا نہ آ سکے
آئینہ کیا مجال تجھے منہ دکھا سکے
دل مرا پھر دکھا دیا کن نے
سو گیا تھا جگا دیا کن نے

عبدالحمید عدم

خرد کے ٹوٹے ہوئے ستارے عدمؔ کہاں تک چراغ بنتے
جنوں کی روشن روش ہے آخر دلوں کو رستے دکھا رہی ہے
کرم کی صورت اول تو جاں گداز نہ تھی
کرم کا دوسرا پہلو دکھا کے مار دیا
عجیب رس بھرا رہزن تھا جس نے لوگوں کو
طرح طرح کی ادائیں دکھا کے مار دیا

قمر جلالوی

مرے بعد گر کے بجلی نہ قفس میں دل دکھا دے
مجھے قید کرنے والے مرا آشیاں جلا دے
وہ ہر اک سے پوچھتے ہیں کہ فدا ہے کیوں زمانہ
انہیں حسن کی خبر کیا کوئی آئینہ دکھا دے
کھلبلی مچ گئی تاروں میں قمر نے دیکھا
شب کو یہ چاند سی صورت جو دکھا دی تو نے

عرفان صدیقی

ایک جیسے ہیں سبھی گل بدنوں کے چہرے
کس کو تشبیہ کا آئینہ دکھا کر دیکھیں

الطاف حسین حالی

رایوں کے راج چھینے شاہونکے تاج چھینے
گردن کشوں کو اکثر نیچا دکھا کے چھوڑا

اختر شیرانی

پھر وہی ہم ہوں وہی دن ہوں وہی راتیں ہوں
عہدِ رفتہ کو پھر آئینہ دکھا دے آ کر

ادا جعفری

کیا پھر کسی نے قرض مروت ادا کیا
کیوں آنکھ بے سوال ہے دل پھر دکھا ہے کیا

بیان میرٹھی

ضدیں محبت سے ایسی آئیں خیال رکھا نہ اپنے گھر کا
بتوں نے کعبہ کو مفت ڈھایا کسی کے دل کو دکھا دکھا کر
کہیں نہ زلفوں سے کھل پڑا ہو مجھے ہے اندیشہ اپنے دل کا
کہ پرزے پرزے اڑا رہا تھا عدو کوئی شے دکھا دکھا کر
گوہر نابسودہ کو زلف میں مت دکھا کہ یوں
میری کمند شوق میں رات کے وقت آ کہ یوں

ضیا جالندھری

شمعِ حق شعبدۂ حرف دکھا کر لے جائے
کہیں تجھ کو ہی نہ تجھ سے کوئی آ کر لے جائے

عبید اللہ علیم

دکھتا ہے بدن کہ پھر ملے وہ
مل جائے تو روح کو دکھا دے
اے میرے خواب آ مری آنکھوں کو رنگ دے
اے میری روشنی تو مجھے راستا دکھا
یارب عطا ہو زخم کوئی شعر آفریں
اک عمر ہو گئی کہ مرا دل نہیں دکھا
شکستہ حال سا بے آسرا سا لگتا ہے
یہ شہرِ دل سے زیادہ دکھا سا لگتا ہے
دل ہی تھے ہم دکھے ہوئے تم نے دکھا لیا تو کیا
تم بھی تو بے اماں ہوئے ہم کو ستا لیا تو کیا

غلام محمد قاصر

غم کی تشریح بہت مشکل تھی
اپنی تصویر دکھا دی ہم نے

حسرت موہانی

اس حیلہ جو نے وصل کی شب ہم سے روٹھ کر
نیرنگ روزگار کا عالم دکھا دیا
روگ دل کو لگا گئیں آنکھیں
اک تماشا دکھا گئیں آنکھیں

شبلی نعمانی

مجھ کو لے جا کے مری آنکھ وہاں
اک تماشا سا دکھا لائی ہے

شکیل بدایونی

کمال حوصلۂ دل دکھا رہا ہوں میں
کسی سے رسمِ محبت بڑھا رہا ہوں میں

عزیز حامد مدنی

لباس تازہ کے خواہاں ہوئے ہیں ذرہ و سنگ
اک آئنہ ہے کوئی دور سے دکھا جاتا

فانی بدایونی

اف کہ گناہ گار ہم ہیں تو مگر خطا معاف
آٹھ پہر کے درد نے دل ہی تو ہے دکھا دیا

احمد فراز

میں خود کو بھول چکا تھا مگر جہاں والے
اداس چھوڑ گئے آئینہ دکھا کے مجھے

شاذ تمکنت

نہیں کہ زیست سے کچھ واسطہ پڑا ہی نہ ہو
میں کیسے مانوں ترا دل کبھی دکھا ہی نہ ہو

فراق گورکھپوری

نرم فضا کی کروٹیں دل کو دکھا کے رہ گئیں
ٹھنڈی ہوائیں بھی تری یاد دلا کے رہ گئیں

قتیل شفائی

محروم نظر ہے جو زمانہ
آئینہ اسے دکھا رہا ہوں
میں نے جو کیا فصل بہاراں کا تقاضا
اک پھول کی تصویر دکھا دی گئی مجھ کو

کلیم عاجز

تجھے سنگ دل یہ پتہ ہے کیا کہ دکھے دلوں کی صدا ہے کیا؟
کبھی چوٹ تو نے بھی کھائی ہے کبھی تیرا دل بھی دکھا ہے کیا؟
گو ستم نے تیرے ہر اک طرح مجھے ناامید بنا دیا
یہ مری وفا کا کمال ہے کہ نباہ کر کے دکھا دیا
تجھے اب بھی میرے خلوص کا نہ یقین آئے تو کیا کروں
ترے گیسوؤں کو سنوار کر تجھے آئنہ بھی دکھا دیا
تجھے سنگ دل یہ پتہ ہے کیا کہ دکھے دلوں کی صدا ہے کیا
کبھی چوٹ تو نے بھی کھائی ہے کبھی تیرا دل بھی دکھا ہے کیا
ترے ہاتھوں کی سرخی خود ثبوت اس بات کا دے ہے
کہ جو کہہ دے ہے دیوانہ وہ کر کے بھی دکھا دے ہے

کیفی اعظمی

آنکھوں میں نمی ہنسی لبوں پر
کیا حال ہے کیا دکھا رہے ہو

ناصر کاظمی

جدائیوں کے مرحلے بھی حسن سے تہی نہ تھے
کبھی کبھی تو شوق آئنے دکھا کے رہ گیا
دیارِ دل کی رات میں چراغ سا جلا گیا
ملا نہیں تو کیا ہوا وہ شکل تو دکھا گیا