مرزا غالب

شب کو کسی کے خواب میں آیا نہ ہو کہیں
دکھتے ہیں آج اس بتِ نازک بدن کے پاؤں

امام بخش ناسخ

یہ جسم زار ہے یوں پیرہن کے پردے میں
کہ جیسے روح نہاں ہے بدن کے پردے میں

حیدر علی آتش

اپنے صفائے سینہ کا حیران کار ہے
دیکھا نہیں ہے آئنے نے وہ بدن ہنوز
اثر اکسیر کا یمن قدم سے تیری پایا ہے
جذامی خاکِ رہ مل کر بناتے ہیں بدن بگڑا
ارادہ میرے کھانے کا نہ اے زاغ و زغن کیجو
وہ کشتہ ہوں جسے سونگھے سے کتوں کا بدن بگڑا
دستِ قدرت نے بنایا ہے تجھے اے محبوب
ایسا ڈھالا ہوا سانچے میں بدن ہے کس کا
ایک عالم کو ترے عشق میں سکتا ہو گا
صاف آئینہ سے شفاف بدن ہے کس کا

شیخ ابراہیم ذوق

دکھلا نہ خال ناف تو اے گل بدن مجھے
ہر لالہ یاں ہے نافۂِ مشکِ ختن مجھے
ہمدم وبالِ دوش نہ کر پیرہن مجھے
کانٹا سا ہے کھٹکتا مرا تن بدن مجھے

مصحفی غلام ہمدانی

جلوہ گر اس کا سراپا ہے بدن آئنے میں
نظر آتا ہے ہمیں سرو چمن آئنے میں
شب دیکھ مہِ تاباں تھا مصحفیؔ تو حیراں
کیا اس میں بھی کچھ نقشہ اس سیم بدن کا تھا

فیض احمد فیض

نیسم تیرے شبستاں سے ہو کے آئی ہے
مری سحر میں مہک ہے ترے بدن کی سی

عرفان صدیقی

اس نے کیا دیکھا کہ ہر صحرا چمن لگنے لگا
کتنا اچھا اپنا من‘ اپنا بدن لگنے لگا
کبھی شراب، کبھی انگبیں، کبھی زہراب
وصال کیا ہے کسی کے بدن کا جادو ہے
میں تیری منزل جاں تک پہنچ تو سکتا ہوں
مگر یہ راہ بدن کی طرف سے آتی ہے
احوال ترا شامِ بدن میں بھی وہی ہے
باطن کی چمک سانولے پن میں بھی وہی ہے
اس کی آنکھوں میں بھی رقصاں ہے وہی گرمیِ شوق
غالباً محرمِ اسرار بدن وہ بھی ہے

مصطفیٰ زیدی

اب تو چبھتی ہے ہوا برف کے میدانوں کی
ان دنوں جسم کے احساس سے جلتا تھا بدن
فن کار خود نہ تھی مرے فن کی شریک تھی
وہ روح کے سفر میں بدن کی شریک تھی

رئیس فروغؔ

درد کی موج سبک سیر میں بہہ جاؤں گا
چاہے وہ جان سے چاہے وہ بدن سے آئے
لڑکیاں روشنیاں کاریں دکانیں شامیں
انہی چیزوں میں کہیں میرا بدن ہے لوگو

احسان دانش

حصار ضبط ہے ابرِ رواں کی پرچھائیں
ملال روح کو کب تک بدن چھپائے گا
کھلے گا باد نفس سے جو رخ پہ نیل کنول
اسے کہاں ترا اجلا بدن چھپائے گا

عبید اللہ علیم

شکستِ جاں سے سوا بھی ہے کار فن کیا کیا
عذاب کھینچ رہا ہے مرا بدن کیا کیا

ثروت حسین

بجھی روح کی پیاس لیکن سخی
مرے ساتھ میرا بدن بھی تو ہے

حسرت موہانی

تاثیر برقِ حسن جو ان کے سخن میں تھی
اک لرزش خفی مرے سارے بدن میں تھی

احمد فراز

ہر کوئی ناوک و ترکش کی دکاں پوچھتا ہے
کسی گاہک کو مگر اپنا بدن یاد نہیں

امیر مینائی

اے روح، کیا بدن میں پڑی ہے بدن کو چھوڑ
میلا بہت ہوا ہے ، اب اس پیرہن کو چھوڑ

شاذ تمکنت

آج اس طرح ملا تو کہ لہو جاگ اٹھا
یوں تو آتی رہی خوشبوئے بدن پہلے بھی

فراق گورکھپوری

رس میں ڈوبا ہوا لہراتا بدن کیا کہنا
کروٹیں لیتی ہوئی صبحِ چمن کیا کہنا
باغ جنت پہ گھٹا جیسے برس کے کھل جائے
یہ سہانی تری خوشبوئے بدن کیا کہنا
جیسے لہرائے کوئی شعلہ کمر کی یہ لچک
سر بسر آتش سیال بدن کیا کہنا

مجروح سلطان پوری

سرشک رنگ نہ بخشے تو کیوں ہو بار مژہ
لہو حنا نہیں بنتا تو کیوں بدن میں رہے

محسن نقوی

غزلوں کی دھنک اوڑھ مرے شعلہ بدن تو
ہے میرا سخن تو مرا موضوعِ سخن تو
خمار موسم خوشبو حد چمن میں کھلا
مری غزل کا خزانہ ترے بدن میں کھلا

ناصر کاظمی

آیا گیا نہ میں کہیں صبح سے شام ہو گئی
جلنے لگے ہیں ہاتھ کیوں ٹوٹ رہا ہے کیوں بدن