مرزا غالب

مانع دشت نوردی کوئی تدبیر نہیں
ایک چکر ہے مرے پاؤں میں زنجیر نہیں

بہادر شاہ ظفر

کیا ہوا آگے اٹھائے گر ظفرؔ احسان عقل
اور اگر اب منت تدبیر پھر کھینچی تو کیا

مصحفی غلام ہمدانی

بعد مردن کی بھی تدبیر کیے جاتا ہوں
اپنی قبر آپ ہی تعمیر کیے جاتا ہوں
وحشت ہے میرے دل کو تو تدبیر وصل کر
پانو میں اس غزال کے زنجیر وصل کر
دیوانہ پن کا میرے جو کرتے نہیں علاج
تدبیر کرنے والوں کی تدبیر کیا ہوئی

مصطفٰی خان شیفتہ

چارہ گر فکر کر اس میں، کہ مقدر بدلے
ورنہ بے ہودہ اذیت پئے تدبیر نہ کھینچ

مرزا رفیع سودا

تجھ عشق کے مریض کی تدبیر شرط ہے
لیکن شفا کو گردشِ تقدیر شرط ہے

یگانہ چنگیزی

بیٹھا ہوں پاؤں توڑ کے تدبیر دیکھنا
منزل قدم سے لپٹی ہے تقدیر دیکھنا
ٹھوکریں کھلوائیں کیا کیا پائے بے زنجیر نے
گردشِ تقدیر نے جولانی تدبیر نے
کارواں کتنے بگولے بن کے غائب ہو گئے
خاک سے یکساں کیا جولاں گہ تدبیر نے
تنگ آنے لگے دیوانے گریبانوں سے
کچھ تو اے دستِ جنوں چاہیے تدبیر بہار
دوڑی جاتی ہے گھٹا سوئے چمن بادہ کشو
پردۂ غیب سے ہونے لگی تدبیر بہار
انجام کار پر نہیں کچھ اختیار یاسؔ
تقدیر سے خجل مری تدبیر ہو نہ جائے

عبدالحمید عدم

گناہ جرأت تدبیر کر رہا ہوں میں
یہ کس قماش کی تقصیر کر رہا ہوں میں

ماجد صدیقی

حشر کیا ہو گا بھلا جینے کی اس تدبیر کا
سوچ پر بھی ہے گماں جب حلقۂ زنجیر کا
سنگِ راہ کا توڑنا بھی تھا سر اپنا پھوڑنا
ہاں اثر دیکھا تو یوں اس تیشۂ تدبیر کا

حسرت موہانی

وصل اس بت بد خو کا میسر نہیں ہوتا
وابستۂ تقدیر ہے تدبیر ابھی تک

شان الحق حقی

یوں ہی ہو جاتا ہے قسمت سے کوئی غم بیدار
عشق کے ہاتھ میں تدبیر کہاں سے آئی

شکیل بدایونی

دل کے بہلانے کی تدبیر تو ہے
تو نہیں ہے تری تصویر تو ہے

فانی بدایونی

آہ سے یا آہ کی تاثیر سے
جی بہل جاتا کسی تدبیر سے
غم نصیبوں میں ہے فانیؔ غمِ دنیا ہو کہ عشق
دل کی تقدیر سے تدبیر بدل جاتی ہے

کیف بھوپالی

اودی گھٹا تو واپس ہو جا
آج کوئی تدبیر نہیں ہے

مجروح سلطان پوری

آہ جاں سوز کی محرومی تاثیر نہ دیکھ
ہو ہی جائے گی کوئی جینے کی تدبیر نہ دیکھ

محسن احسان

مری نوا مری تدبیر تک نہیں پہنچی
یہ میرے خواب کی تعبیر تک نہیں پہنچی