مرزا غالب

سر اڑانے کے جو وعدے کو مکرر چاہا
ہنس کے بولے کہ ’ترے سر کی قسم ہے ہم کو!‘
قسم جنازے پہ آنے کی میرے کھاتے ہیں غالب
ہمیشہ کھاتے تھے جو میری جان کی قسم آگے
ہستی ہماری اپنی فنا پر دلیل ہے
یاں تک مٹے کہ آپ ہم اپنی قسم ہوئے

انشاء اللہ خان انشا

پھڑکتا آج بھی ہم کو نہ پرسوں کی طرح رکھئے
خدا کے واسطے کچھ یاد وہ اگلی قسم کیجے
تم اور بات مانو اجی سب نظر میں ہے
دانتوں تلے زبان دبانی قسم کے ساتھ
اپنے داتا کی حقیقت کے ہیں جلوہ تم میں
لمعۂِ نور تجلی کی قسم یا معبود
اچھا جو خفا ہم سے ہو تم اے صنم اچھا
لو ہم بھی نہ بولیں گے خدا کی قسم اچھا

بہادر شاہ ظفر

دیں کیا ہے بلکہ دیجیے ایمان بھی انہیں
زاہد یہ بت خدا کی قسم ایسے شخص ہیں
ہم دیکھتے ہیں تم میں خدا جانے بتو کیا
اس بھید کو اللہ کی قسم کہہ نہیں سکتے

مصحفی غلام ہمدانی

صحبت غیر کا انکار تو کرتے ہو ولے
کھاؤگے تم جو مرے سر کی قسم کیا ہو گا

مصطفٰی خان شیفتہ

خوبیِ بخت کہ پیمانِ عدو
اس کو ہنگامِ قسم یاد آیا

مومن خان مومن

جو آپ در سے اٹھا نہ دیتے کہیں نہ کرتا میں جبہہ سائی
اگرچہ یہ سر نوشت میں تھا تمہارے سر کی قسم نہ ہوتا

مرزا رفیع سودا

یہ رنجش میں ہم کو ہے بے اختیاری
تجھے تیری کھا کر قسم دیکھتے ہیں

قمر جلالوی

وہ دیکھ لو احباب لیے جاتے ہیں میت
لو کھاؤ مریض غمِ فرقت کی قسم اور
وہ فتنہ ساز دے کے گیا ہے یہ دم ابھی
آتا ہوں ہے کے گھر سے تیری قسم ابھی
ہمارے بعد جو چھوڑے ستم تو کیا ہو گا
خجل ہوئے پہ یہ توڑی قسم تو کیا ہو گا

عرفان صدیقی

کیا کسی کو بھولنا آسان ہے تم ہی بتاؤ
تم کو اپنے دلرباؤں کی قسم ہے دوستو

حسرت موہانی

بھلا دیتی ہیں سب رنج و الم حیرانیاں میری
تری تمکین بے حد کی قسم ایسا بھی ہوتا ہے

شان الحق حقی

تم اور طرح کے سہی ہم اور طرح کے
ہو جائیں بس اب قول و قسم اور طرح کے

احمد فراز

نبھاتا کون ہے قول و قسم تم جانتے تھے
یہ قربت عارضی ہے کم سے کم تم جانتے تھے

شاذ تمکنت

وعدہ و قول و قسم نے مجھے جینے نہ دیا
کیا ستم ہے کہ کرم نے مجھے جینے نہ دیا

فراق گورکھپوری

کیا مری زندگی تری
بھولی ہوئی قسم نہیں

قتیل شفائی

تو اور نہ آئے در زندان وفا تک
مر کر بھی یہ غم تیری قسم ساتھ رہے گا

ناصر کاظمی

دیکھ ناصر زمانے میں کوئی کسی کا نہیں
بھول جا اس کے قول و قسم صبر کر صبر کر