مرزا غالب

سراپا رہن عشق و ناگزیرِ الفتِ ہستی
عبادت برق کی کرتا ہوں اور افسوس حاصل کا
دل سے ہوائے کشتِ وفا مٹ گئی کہ واں
حاصل سواے حسرتِ حاصل نہیں رہا
ہجومِ غم سے یاں تک سر نگونی مجھ کو حاصل ہے
کہ تارِ دامن و تارِ نظر میں فرق مشکل ہے
بس ہجومِ نا امیدی خاک میں مل جائے گی
یہ جو اک لذت ہماری سعیِ بے حاصل میں ہے

امام بخش ناسخ

نام نیک اہل حکومت کو کہاں حاصل ہوا
خلق میں مشہور اک نوشیرواں عادل ہوا

داغ دہلوی

گنج قاروں کے سوا بھی ہے عدم میں سب کچھ
ہائے دنیا میں نہ اس ملک کا حاصل آیا
سراغ مہر و الفت غیر کے دل میں نہ پائیں گے
عبث وہ رات دن اس سعیِ بے حاصل میں رہتے ہیں

مصحفی غلام ہمدانی

اے مصحفیؔ افسوس کہ اس ہستی پہ ہم کو
تحصیل وفاداری کا حاصل نہیں معلوم
فرقت میں اس کی تو نے اے مصحفیؔ بتا تو
جز اشکِ خوں کیا کیا حاصل تڑپ تڑپ کر

جگر مراد آبادی

جا بھی اے ناصح کہاں کا سود اور کیسا زیاں
عشق نے سمجھا دیا ہے عشق کا حاصل مجھے

قمر جلالوی

سکوں بہر محبت میں ہمیں حاصل تو کیا ہو گا
کوئی طوفاں ہو گا ناخدا ساحل تو کیا ہو گا
دونوں ہیں ان کے ہجر کا حاصل لیے ہوئے
دل کو ہے درد، درد کو ہے دل لیے ہوئے

عرفان صدیقی

زہرۂ فکر کم آمیز بہت ہے ، عرفانؔ
کم سے کم اس کا تعارف تو تمہیں حاصل ہے
اس نے جو مل کر ہم کو سکھایا
حاصل نہ کرنا، حاصل نہ ہونا
عشق میں جان کہ تن کوئی تو کندن بن جائے
ورنہ یہ راکھ ہی اس آگ کا حاصل ہے تو کیا
وہ ستم گر تمہیں تسخیر کیا چاہتا ہے
خاک بن جاؤ اور اس شخص کو حاصل ہو جاؤ

احسان دانش

زندگی میں اس کو کیف زندگی حاصل نہیں
جس کا دل راز و نیازِ عشق کے قابل نہیں
ناسزا ہے اس کے جلووں کی نزاکت کے لیے
وہ غم حاصل جو تیرے عشق کے حاصل میں ہے
وصل کا خواب کجا لذت دیدار کجا
ہے غنیمت جو ترا درد بھی حاصل ہو جائے
قابلِ رشک بنے زندگی عشق اس کی
جس کی تو زندگی عشق کا حاصل ہو جائے

بہزاد لکھنوی

یوں تو جو چاہے یہاں صاحب محفل ہو جائے
بزم اس شخص کی ہے تو جسے حاصل ہو جائے
تجھ کو اپنی ہی قسم یہ تو بتا دے مجھ کو
کیا یہ ممکن ہے کبھی تو مجھے حاصل ہو جائے
فتنہ گر شوق سے بہزادؔ کو کر دے پامال
اس سے تسکین دلی گر تجھے حاصل ہو جائے

عالم تاب تشنہ

آرزو نایافت کی ہے سلسلہ در سلسلہ
ہے نمود کرب لا حاصل بھی حاصل کے قریب

تلوک چند محروم

کسی کی یاد کو ہم زیست کا حاصل سمجھتے ہیں
اسی کو راحتِ جاں اور سکونِ دل سمجھتے ہیں
ملتا ہے مشکلوں سے کسی کے حضور کا
وہ ایک لحظہ زیست کا حاصل کہیں جسے

سیماب اکبر آبادی

کمال علم و تحقیق مکمل کا یہ حاصل ہے
ترا ادراک مشکل تھا ترا ادراک مشکل ہے

فانی بدایونی

اختیار ایک ادا تھی مری مجبوری کی
لطف سعیِ عمل اس مطلب حاصل سے اٹھا

امیر مینائی

کچھ وصل کے وعدے سے بھی حاصل نہیں ہوتا
خوش اب تو خوشی سے بھی میرا دل نہیں ہوتا
یہ شعر وہ فن ہے کہ امیر اس کو جو برتو
حاصل یہی ہوتا ہے کہ حاصل نہیں ہوتا

قتیل شفائی

تھی ہم آغوشی مگر کچھ بھی مجھے حاصل نہ تھا
وہ اک ایسا لمس تھا جس میں بدن شامل نہ تھا
ہم نے کاٹے پیڑ تو سایوں کی یاد آنے لگی
لیکن اب حرفِ ندامت سے بھی کچھ حاصل نہ تھا

ناصر کاظمی

گزر گئے ہیں جو خوشبوئے رائگاں کی طرح
وہ چند روز مری زندگی کا حاصل تھے