مرزا غالب

مقطعِ سلسلۂِ شوق نہیں ہے یہ شہر
عزمِ سیرِ نجف و طوفِ حرم ہے ہم کو

انشاء اللہ خان انشا

ہم معتکف خلوت بت خانہ ہیں اے شیخ
جاتا ہے تو جا تو پئے طوفِ حرم اچھا

حیدر علی آتش

ہمارا کعبۂِ مقصود تیرا طاق ابرو ہے
تری چشم سیہ کو ہم نے آہوئے حرم پایا

داغ دہلوی

تماشائے دیر و حرم دیکھتے ہیں
تجھے ہر بہانے سے ہم دیکھتے ہیں

مصطفٰی خان شیفتہ

شعلۂِ زخم سے اے صید فگن
داغ آہوئے حرم یاد آیا

فیض احمد فیض

خیر، ہیں اہلِ دیر جیسے ہیں
آپ اہلِ حرم کی بات کرو
رقصِ مے تیز کرو، ساز کی لے تیز کرو
سوئے مے خانہ سفیرانِ حرم آتے ہیں

مرزا رفیع سودا

غرض کفر سے کچھ نہ دیں سے ہے مطلب
تماشائے دیر و حرم دیکھتے ہیں

باقی صدیقی

دیکھئے کون سی منزل ہمیں اپناتی ہے
راندۂ میکدہ و دیر و حرم ہیں ہم لوگ

قمر جلالوی

رہِ محبت میں دل کو کب تک فریبِ دیرو حرم نہ ہوتا
ہزاروں سجدے بھٹکتے پھرتے جو تیرا نقشِ قدم نہ ہوتا
یہ مئے ہے ذرا سوچ لے اے شیخِ حرم اور
تو پہلے پہل پیتا ہے کم اور ارے کم اور
ہوتا قمر کثرت و وحدت میں بڑا فرق
بت خانے بہت سے ہیں نہیں ہے تو حرم اور
ان کے لیے تو کھیل ہے دنیا کا انقلاب
چاہیں تو بتکدے کو بنا دیں حرم ابھی
قصۂ برہمن و شیخ کو بس رہنے دو
آج تک فیصلۂ دیر و حرم ہوتا ہے
گر حسیں دل میں نہ ہوں عظمت دل بڑھ جائے
بت کدہ تو انہیں باتوں سے حرم ہوتا ہے
نگاہِ دنیائے عاشقی میں وجودِ دل محترم نہ ہوتا
اگر خدائی بتوں کی ہوتی تو دیر ہوتا حرم نہ ہوتا
یہ سوچتا ہوں سر جھکاتے ہیں پئے سجدہ
سمٹ کے آ گئے دیرو حرم تو کیا ہو گا

شکیب جلالی

دیکھتی رہ گئی محرابِ حرم
ہائے انسان کی انگڑائی کا خم

بہزاد لکھنوی

مری نظروں میں اب باقی نہیں ہے ذوق کفر و دیں
میں اک مرکز پہ اب دیر و حرم محسوس کرتا ہوں

احمد راہی

قیام دیر و طواف حرم نہیں کرتے
زمانہ ساز تو کرتے ہیں ہم نہیں کرتے

شکیل بدایونی

مرا کفر حاصل زہد ہے مرا زہد حاصل کفر ہے
مری بندگی وہ ہے بندگی جو رہین دیر و حرم نہیں
چھیڑ دی میں نے اگر روداد حسنِ شش جہت
نا مکمل قصۂ دیر و حرم رہ جائے گا

فانی بدایونی

دیر میں یا حرم میں گزرے گی
عمر تیرے ہی غم میں گزرے گی

فراق گورکھپوری

اور ہی ہے مقام دل
دیر نہیں حرم نہیں

قتیل شفائی

میں نے تو پکارا ہے محبت کے افق سے
رستے میں ترے سنگِ حرم ہے تو مجھے کیا
اندیشۂ ارباب حرم ساتھ رہے گا
جنت بھی ملے گی تو یہ غم ساتھ رہے گا

ناصر کاظمی

تیرے قدموں سے جاگیں گے اجڑے دلوں کے ختن
پاشکستہ غزالِ حرم صبر کر صبر کر