مرزا غالب

نظارے نے بھی کام کیا واں نقاب کا
مستی سے ہر نگہ ترے رخ پر بکھر گئی

باقی صدیقی

شبنم کی طرح حیات کے خواب
کچھ اور نکھر گئے بکھر کے
توڑ کر سب حدود میخانہ
بوئے مے کی طرح بکھر ساقی

جون ایلیا

رقص ہے رنگ پر رنگ ہم رقص ہیں
سب بچھڑ جائیں گے سب بکھر جائیں گے
رہ گزر خیال میں دوش بدوش تھے جو لوگ
وقت کی گرد باد میں جانے کہاں بکھر گئے
نقش گروں سے چاہیے نقش و نگار کا حساب
رنگ کی بات مت کرو رنگ بہت بکھر رہا
اس کی یاد کی بادِ صبا میں اور تو کیا ہوتا ہو گا
یوں ہی میرے بال ہیں بکھرے اور بکھر جاتے ہوں گے
میں یعنی ازل کا آرمیدہ
لمحوں میں بکھر کے تھک گیا ہوں

شکیب جلالی

زنجیر بپا اگر گئے ہم
نغموں کی طرح بکھر گئے ہم

عرفان صدیقی

ہم یہاں تک خس و خاشاک بدن کو لے آئے
آگے اب کوئی بھی موسم ہو بکھر جانے کا
موجِ خوں بن کر کناروں سے گزر جائیں گے لوگ
اتنی زنجیروں میں مت جکڑو، بکھر جائیں گے لوگ

الطاف حسین حالی

ملے گا نہ گلچیں کو گل کا پتا
ہر اک پنکھڑی یوں بکھر جائے گی

احسان دانش

غنچوں کی طرح کھلے تھے کچھ لوگ
کرنوں کی طرح بکھر رہے ہیں

ادا جعفری

وہ دور کب تھا حریم جاں سے کہ لفظ و معنی کے ناز اٹھاتی
جو حرف ہونٹوں پہ آ نہ پائے وہ بن کے خوشبو بکھر گئے ہیں

بشیر بدر

سنگار دان میں رہتے ہو آئنے کی طرح
کسی کے ہاتھ سے گر کر بکھر گئے ہوتے

عبید اللہ علیم

کوئی غنچہ ہو کہ گل ہو کوئی شاخ ہو شجر ہو
وہ ہوائے گلستاں ہے کہ سبھی بکھر رہے ہیں
ہزار طرح کے صدمے اٹھانے والے لوگ
نہ جانے کیا ہوا اک آن میں بکھر سے گئے

ماجد صدیقی

پیار خوشبو ہے چھپائے نہ بنے
بات نکلی تو بکھر جائے گی
میں جو اس کے قدموں میں ریت سا بکھر جاتا
چاند سا بدن اس کا اور بھی نکھر جاتا
یہ زندگی ہے کہ انتشار خرام، ابرِ رواں کا ماجدؔ
یہ کیسا منظر نگاہ میں ہے کہ لحظہ لحظہ بکھر رہا ہے
جو مجتمع ہو رہا ہوں پل پل مجھے بتا میں بکھر نہ جاؤں
یہ تحفۂ زیست تجھ کو لوٹا کے تجھ پہ احسان دھر نہ جاؤں
لب پہ آئے، بکھر گئے نغمے
دل کو بے چین کر گئے نغمے
دھڑکنوں کی زباں سے نکلے تھے
پتھروں تک بکھر گئے نغمے

جوش ملیح آبادی

پریشاں بال کرتے ہیں انہیں شوخی سے مطلب ہے
بکھرتا ہے اگر شیرازۂ عالم بکھر جائے

شاد عظیم آبادی

موتیوں کا تھا خزانہ مری چشمِ تر میں
غم ہے دل کو انہیں دانوں کے بکھر جانے کا

عزیز حامد مدنی

وہی ایک سود و زیاں کا غم جو مزاج عشق سے دور تھا
وہ تری زباں پہ بھی آ گیا تو لگن ہی جی کی بکھر گئی
اسی زندگی کے ہزار افق اسی زندگی کے ہزار رخ
اسی اک خیال کی رو تھی وہ جو تری جبیں پہ بکھر گئی

فانی بدایونی

فانیؔ کی ذات سے غمِ ہستی کی تھی نمود
شیرازہ آج دفترِ غم کا بکھر گیا

شاذ تمکنت

میں اپنی راکھ کریدوں تو تیری یاد آئے
نہ آئی تیری صدا ورنہ میں بکھر جاتا

کلیم عاجز

زندگی میں ہے وہ الجھن کہ پریشاں ہو کر
زلف کی طرح بکھر جانے کو جی چاہے ہے

کیفی اعظمی

پیمانہ ٹوٹنے کا کوئی غم نہیں مجھے
غم ہے تو یہ کہ چاندنی راتیں بکھر گئیں

محبوب خزاں

آنکھوں میں نمک ہے تو نظر کیوں نہیں آتا
پلکوں پہ گہر ہیں تو بکھر کیوں نہیں جاتے

ناصر کاظمی

شہر سنسان ہے کدھر جائیں
خاک ہو کر کہیں بکھر جائیں
نہ ملا کر اداس لوگوں سے
حسن تیرا بکھر نہ جائے کہیں
صبح کا تارا ابھر کر رہ گیا
رات کا جادو بکھر کر رہ گیا