مرزا غالب

قضا نے تھا مجھے چاہا خرابِ بادۂِ الفت
فقط خراب لکھا، بس نہ چل سکا قلم آگے
لکھتے رہے جنوں کی حکایاتِ خوں چکاں
ہر چند اس میں ہاتھ ہمارے قلم ہوئے

انشاء اللہ خان انشا

اب چھیڑ چھاڑ کی غزل انشاؔ اک اور لکھ
ہیں لاکھ شوخیاں تری نوکِ قلم کے ساتھ

بہادر شاہ ظفر

مرے مضمون سوزِ دل سے خط سب جل گیا میرا
قلم سے حرف جو نکلے شرر ہی یک قلم نکلے

حیدر علی آتش

ہوا ہرگز نہ خط شوق کا ساماں درست آتشؔ
سیاہی ہو گئی نایاب اگر ہم نے قلم پایا

مصحفی غلام ہمدانی

تصویر تو اس کی زلف کی دیکھ
نقاش یہ چین کا قلم ہے

فیض احمد فیض

دربار میں اب سطوت شاہی کی علامت
درباں کا عصا ہے کہ مصنف کا قلم ہے

مرزا رفیع سودا

نوشتے کو میرے مٹاتے ہیں رو رو
ملائک جو لوح و قلم دیکھتے ہیں

باقی صدیقی

اک سجدہ کیا میں نے فقط شعر کی صورت
ورنہ مری تخیل ہے کیا، میرا قلم کیا
کھا گئے قحط جنوں میں باقیؔ
بیچ کر لوح و قلم دیوانے

شکیب جلالی

جب بھی اوہام مقابل آئے
مثلِ شمشیر چلی نوکِ قلم

الطاف حسین حالی

جادو رقم تو مانیں، ہم دل سے تم کو حالیؔ
کچھ کر کے بھی دکھائے زورِ قلم تمہارا

ادا جعفری

بہت دنوں تو ہواؤں کا ہم نے رخ دیکھا
بڑے دنوں میں متاع قلم کو پہچانے
بہت دنوں تو ہواؤں کا ہم نے رخ دیکھا
بڑے دنوں میں متاع قلم کو پہچانے

بشیر بدر

مجھ سے کیا بات لکھانی ہے کہ اب میرے لیے
کبھی سونے کبھی چاندی کے قلم آتے ہیں