مرزا غالب

شعلے سے نہ ہوتی، ہوسِ شعلہ نے جو کی
جی کس قدر افسردگی دل پہ جلا ہے

حیدر علی آتش

سو بار گل کو اس نے تلووں تلے ملا ہے
کٹوا کے سرو شمشاد اکثر جلا دیے ہیں
دو ابرو اور دو لب جاں بخش یار کے
زندوں کو قتل کر چکے مردے جلا چکے

داغ دہلوی

کتنی فرحت فزا تھی بوئے وفا
اس نے دل کو جلا کے دیکھ لیا
داغؔ نے خوب عاشقی کا مزا
جل کے دیکھا جلا کے دیکھ لیا

شیخ ابراہیم ذوق

برق میرا آشیاں کب کا جلا کر لے گئی
کچھ جو خاکستر بچا آندھی اڑا کر لے گئی
آگ میں ہے کون گر پڑتا مگر پروانے کو
آتش سوزِ محبت تھی جلا کر لے گئی

مصحفی غلام ہمدانی

وہ غریب و بے کس و زار تھا تجھے اس کا دیتا ہوں میں پتہ
ترے کشتہ کا وہ مزار تھا کہ چراغ جس میں جلا نہیں
بیٹھے ادا سے ایک پل ناز سے اٹھے پھر سنبھل
پہلو چرا گئے نکل جی ہی مرا جلا گئے
شعلہ شمع میں گرمی یہ کہاں سے آئی
اس کی گرمی سے تو فانوس جلا جاتا ہے

مومن خان مومن

اے جذبِ دل نہ تھم کہ نہ ٹھہرا وہ شعلہ رو
آیا تو گرم گرم ولیکن جلا گیا

فیض احمد فیض

رازِ الفت چھپا کے دیکھ لیا
دل بہت کچھ جلا کے دیکھ لیا

میر انیس

مسافرو شب اول بہت ہے تیرہ و تار
چراغِ قبر ابھی سے جلا نہیں رکھتے
ہر نفس آئینۂ دل سے یہ آتی ہے صدا
خاک تو ہو جا تو حاصل ہو جلا میرے لیے

باقی صدیقی

راہ میں شمع جلا بیٹھے ہیں
کس سے ہم آس لگا بیٹھے ہیں
رات اپنے سائے سائے میں چھپتا رہا ہوں میں
اتنے چراغ کوئی جلا کر چلا گیا
ہوش آیا تو تاریکی میں تھے باقیؔ
کتنی دیر چراغ جلا معلوم نہیں

جون ایلیا

تمہارے ہجر کی شب ہائے کار میں جاناں
کوئی چراغ جلا لوں اگر اجازت ہو

سراج الدین ظفر

داغِ فراق کے سوا حاصلِ عشق کچھ نہیں
پردۂ جان و دل میں یہ شمع جلا کے بھول جا

عبدالحمید عدم

بہت سے لوگوں کو غم نے جلا کے مار دیا
جو بچ رہے تھے انہیں مے پلا کے مار دیا

قمر جلالوی

مرے بعد گر کے بجلی نہ قفس میں دل دکھا دے
مجھے قید کرنے والے مرا آشیاں جلا دے
میں قفس میں مطمئن ہوں کہ سمجھ لیا ہے میں نے
یہ چمن نہیں کہ بجلی مرا آشیاں جلا دے
نہیں ہم ہی جب چمن میں تو چمن سے پھر غرض کیا
کوئی پھول توڑ ڈالے کوئی آشیاں جلا دے

عرفان صدیقی

وہم دکھلاتا تھا مجھ کو روشنی کی تیرگی
وہم ہی میرے اندھیرے پر جلا کرتا تھا رات
کون آتا ہے یہاں تیز ہواؤں کے سوا
اپنی دہلیز پہ اک شمع جلا کر دیکھیں
تیرے ویرانے میں ہونا تھا اجالا نہ ہوا
کیا ملا اے دلِ سفاک جلا کر اس کو
اک دیا شام خموشاں میں جلا بھی آئے
اور اک شمع تہہ خاک دبا بھی آئے

مجید امجد

جب آسماں پہ خداؤں کے لفظ ٹکراتے
میں اپنی سوچ کی بے حرف لو جلا رکھتا

جمال احسانی

اپنے ہمراہ جلا رکھا ہے
طاق دل پر جو دیا رکھا ہے

رئیس فروغؔ

لاکھوں ہی بار بجھ کے جلا درد کا دیا
سو ایک بار اور بجھا پھر جلا نہیں
دن بھر جگنو بنا رہا
شام ہوئی تو جلا نہیں
بہت اداس ہو دیوار و در کے جلنے سے
مجھے بھی ٹھیک سے دیکھو جلا تو میں بھی ہوں
دشت کی آگ بڑی چیز ہے آنکھوں کے لیے
شہر بھی خوب ہی جلتا ہے جلا کر دیکھو

احسان دانش

کچھ اس طرح سے تصور میں آ رہا ہے کوئی
چراغ روح میں جیسے جلا رہا ہے کوئی

اختر شیرانی

کس قدر تیرہ و تاریک ہے دنیائے حیات
جلوۂ حسن سے اک شمع جلا دے آ کر
آگ سی دل میں لگا جاتا ہے تیرا ہر خط
آ مرے خرمن ہستی کو جلا دے آ کر

بشیر بدر

مرے دل کی راکھ کرید مت اسے مسکرا کے ہوا نہ دے
یہ چراغ پھر بھی چراغ ہے کہیں تیرا ہاتھ جلا نہ دے
جب سحر چپ ہو ہنسا لو ہم کو
جب اندھیرا ہو جلا لو ہم کو

عالم تاب تشنہ

وصالِ یار کی خواہش میں اکثر
چراغِ شام سے پہلے جلا ہوں

عبید اللہ علیم

بنا گلاب تو کانٹے چبھا گیا اک شخص
ہوا چراغ تو گھر ہی جلا گیا اک شخص
آپ کے گھر میں ہر طرف منظر ماہ و آفتاب
ایک چراغِ شام اگر میں نے جلا لیا تو کیا

غلام محمد قاصر

دن اندھیروں کی طلب میں گزرا
رات کو شمع جلا دی ہم نے

فارغ بخاری

اب نہ بھٹکیں گے مسافر نئی نسلوں کے کبھی
ہم نے راہوں میں لہو اپنا جلا رکھا ہے