مرزا غالب

باغ میں مجھ کو نہ لے جا ورنہ میرے حال پر
ہر گلِ تر ایک ’’چشمِ خوں فشاں‘‘ ہو جائے گا
ہے خوں جگر جوش میں دل کھول کے روتا
ہوتے جو کئی دیدۂِ خو نبانہ فشاں اور
ہے ننگِ سینہ دل اگر آتش کدہ نہ ہو
ہے عاردل نفس اگر آذر فشاں نہیں
بلا سے !گر مژۂِ یار تشنۂِ خوں ہے
رکھوں کچھ اپنی ہی مژگانخوں فشاں کے لیے

داغ دہلوی

زبانِ خار ہوئی تر ہماری وحشت سے
کہ چھالے پھوٹے بھی چشمِ خوں فشاں کی طرح

مصحفی غلام ہمدانی

صوت بلبل جگر میں سالتی تھی
خندۂ گل نمک فشاں بھی تھا
کس روز جراحتوں پہ دل کی
اشکوں سے نمک فشاں نہیں ہم
شفقی رنگ پہ مت بھولیو اپنے اے ابر
چشم خشک اور مژۂِ اشک فشاں اور ہی ہے

مصطفٰی خان شیفتہ

اس شمعِ رو کی بزم میں مانع نہ تھا کوئی
ہوتی سبک جو نالۂِ آتش فشاں کی طرح
ہم بے نشان اور وفا کا نشاں ہنوز
ہے خاکِ تن ہوا و ہوا خوں فشاں ہنوز
اے موجۂِ نسیم ذرا اور ٹھہر جا
ہے خاک پر ہماری وہ دامن فشاں ہنوز
ہم بوئے دوست تجھ کو سنگھائیں گے شیفتہؔ
محو شمیم طرۂِ عنبر فشاں نہ ہو

مرزا رفیع سودا

پہنچا نہ کوئی مرغ کبھو اپنے چمن تک
جز طائر حسرت کہ وہ یاں بال فشاں ہے

عرفان صدیقی

تجھ کو بھی اے ہوائے شب جی کا زیاں بہت ہوا
بجھ تو گیا مگر چراغ شعلہ فشاں بہت ہوا

مجید امجد

روش روش پہ ہیں نکہت فشاں گلاب کے پھول
حسیں گلاب کے پھول، ارغواں گلاب کے پھول

علی سردار جعفری

تر ہو گی زمیں اور ابھی خون بشر سے
روئے گا ابھی دیدۂ خونابہ فشاں اور

فارغ بخاری

خرد بھی نا مہرباں رہے گی شعور بھی سر گراں رہے گا
ان آندھیوں میں مرا جنون وفا مگر ضو فشاں رہے گا

تلوک چند محروم

نہ کیوں ہم دیدۂ خوں بار سے گل کاریاں کر لیں
رہیں آخر بہ امید بہارِ گل فشاں کب تک

جلیل مانک پوری

رنگِ محفل ترا بڑھانے کو
آئے ہم چشمِ خوں فشاں لے کر

جوش ملیح آبادی

للہ الحمد کہ دل شعلہ فشاں ہے اب تک
پیر ہے جسم مگر طبع جواں ہے اب تک

حفیظ ہوشیارپوری

وہی اس گوشۂ داماں کی حقیقت جانے
جو مرے دیدۂ خوں نابہ فشاں تک پہنچے

شان الحق حقی

رخ رہا تا بہ سحر اور ہی جانب اپنا
اور تھا مطلعِ انوار فشاں اور طرف

احمد فراز

یہ آندھیاں ہیں تو شہرِ وفا کی خیر نہیں
زمانہ خاک فشاں ہے قریب آ جاؤ

قابل اجمیری

شامِ غم کی ظلمتیں ہیں اور صحرائے حیات
دیدۂ بیدار کو انجم فشاں کرتے چلو

محسن احسان

ہمارا کیا ہے کہ بس ہم ہیں ایک مشتِ غبار
کھلی فضا جو ملی پر فشاں ہوا ہے یہ دل

ناصر کاظمی

دل مرا شب چراغ تھا جس کو
مژۂ خوں فشاں نے چھین لیا