مرزا غالب

ہے وصل ہجر عالمِ تمکین و ضبط میں
معشوقِ شوخ و عاشقِ دیوانہ چاہیے

حیدر علی آتش

حسن سے رتبہ ہے اپنے عشق کامل کا بلند
آستانہ پر پری ہے بام پر دیوانہ ہے
شہرۂِ آفاق مجھ سا کون سا دیوانہ ہے
ہند میں میں ہوں پرستاں میں مرا افسانہ ہے
خوشی سے اپنی رسوائی گوارا ہو نہیں سکتی
گریباں پھاڑتا ہے تنگ جب دیوانہ آتا ہے
حسن پری اک جلوۂِ مستانہ ہے اس کا
ہشیار وہی ہے کہ جو دیوانہ ہے اس کا
آوارگی نکہتِ گل ہے یہ اشارہ
جامے سے وہ باہر ہے جو دیوانہ ہے اس کا

شیخ ابراہیم ذوق

وحشت و ناآشنائی مستی و بیگانگی
یا تری آنکھوں میں دیکھی یا ترے دیوانہ میں

یگانہ چنگیزی

آئینہ دیکھتا ہے گریباں کو پھاڑ کر
وحشی اب اپنا آپ ہی دیوانہ ہو گیا

سراج الدین ظفر

رہین بیم ہستی ہے دلِ دیوانہ برسوں سے
ہوا کی زد میں ہے اپنا چراغ خانہ برسوں سے

عبدالحمید عدم

افسانہ چاہتے تھے وہ افسانہ بن گیا
میں حسن اتفاق سے دیوانہ بن گیا
حسن ایک اختیار مکمل ہے آپ نے
دیوانہ کر دیا جسے دیوانہ بن گیا

قمر جلالوی

بہارِ گل بنے بیٹھے ہو تم غیروں کی محفل میں
کوئی ایسے میں ہو جائے دیوانہ تو کیا ہو گا
اندھیری رات، زنداں، پاؤں میں زنجیریں، تنہائی
اس عالم میں نہ مر جائے گا دیوانہ تو کیا ہو گا
ابھی تو مطمئن ہو ظلم کا پردہ ہے خاموشی
اگر منہ سے بول اٹھا یہ دیوانہ تو کیا ہو گا

احسان دانش

کرتے کرتے امتزاج کعبہ و بت خانہ ہم
اس جگہ پہنچے کہ ہو کر رہ گئے دیوانہ ہم
دیر پا نکلی نہ فانوس خرد کی روشنی
بڑھ گئی وحشت بالآخر ہو گئے دیوانہ ہم
اب حقیقت کیا کہیں کس سے کہیں کیوں کر کہیں
کچھ تو دیکھا ہے کہ جس سے ہو گئے دیوانہ ہم

اختر شیرانی

دل میں خیال نرگس جانانہ آ گیا
پھولوں سے کھیلتا ہوا دیوانہ آ گیا
معلوم کس کو قیس کی دیوانگی کی شان
ہنگامہ سا بپا ہے کہ دیوانہ آ گیا
سوئے کلکتہ جو ہم بہ دلِ دیوانہ چلے
گنگناتے ہوئے اک شوخ کا افسانہ چلے
حسرت و شوق کے عالم میں چلے یوں اخترؔ
مسکراتا ہوا جیسے کوئی دیوانہ چلے

بہزاد لکھنوی

ہے خرد مندی یہی باہوش دیوانہ رہے
ہے وہی اپنا کہ جو اپنے سے بیگانہ رہے
آخرش کب تک رہیں گی حسن کی نادانیاں
حسن سے پوچھو کہ کب تک عشق دیوانہ رہے
دیوانہ بنانا ہے تو دیوانہ بنا دے
ورنہ کہیں تقدیر تماشہ نہ بنا دے

جلیل مانک پوری

پھر بوئے زلفِ یار نے آ کر ستم کیا
پھر چل دیا مجھے دلِ دیوانہ چھوڑ کر

حفیظ جالندھری

بظاہر سادگی سے مسکرا کر دیکھنے والو
کوئی کم بخت ناواقف اگر دیوانہ ہو جائے
دیوانگی ہے عقل نہیں ہے کہ خام ہو
دیوانہ ہر لحاظ سے دیوانہ چاہیے

سیماب اکبر آبادی

طالب ہوں میں اس ایک نگاہ دو اثر کا
جو ہوش میں لا کر مجھے دیوانہ بنا دے
کہہ دو کہ بہار آئے تو بے کار نہ بیٹھے
دیوانہ بنے یا مجھے دیوانہ بنا دے
دیوانگی عشق بڑی چیز ہے سیمابؔ
یہ اس کا کرم ہے جسے دیوانہ بنا دے
جب ہمیں دیوانہ بننا ہے تو کیسی مصلحت
مصلحت کو بھی بنا لیں گے ترا دیوانہ ہم
حسن کے دل میں جگہ پاتے ہی دیوانہ بنے
ہم ابھی راز بنے ہی تھے کہ افسانہ بنے

شاد عظیم آبادی

فریاد کناں ہیں کسی پازیب کے دانے
توڑے کہیں زنجیر نہ دیوانہ ہمارا

شکیل بدایونی

دنیا کی روایات سے بیگانہ نہیں ہوں
چھیڑو نہ مجھے میں کوئی دیوانہ نہیں ہوں
الزام جنوں دیں نہ مجھے اہلِ محبت
میں خود یہ سمجھتا ہوں کہ دیوانہ نہیں ہوں

عزیز حامد مدنی

اک خیال زلف جاناں اک ہوائے پیچ پیچ
اک نہ اک زنجیر سر رکھتی ہے دیوانہ مجھے

فانی بدایونی

فانیؔ کو کیسا ہی سہی پھر بھی تجھی سے نسبت تھی
دیوانہ تھا تھا کس کا تیرا ہی دیوانہ تھا

امیر مینائی

معتقد کون نہیں کون نہیں اس کا مرید
پیر ہفتاد و دو ملت کا ہے دیوانۂ عشق
زلفِ معشوق نہ گھٹ جائے ادب کا ہے مقام
بڑھ چلیں اتنے نہ موئے سر دیوانۂ عشق

فراق گورکھپوری

بس اتنے پر ہمیں سب لوگ دیوانہ سمجھتے ہیں
کہ اس دنیا کو ہم اک دوسری دنیا سمجھتے ہیں
ہوش کی توفیق بھی کب اہلِ دل کو ہو سکی
عشق میں اپنے کو دیوانہ سمجھ بیٹھے تھے ہم

کلیم عاجز

آشنا غم سے ملا راحت سے بیگانہ ملا
دل بھی ہم کو خوبی قسمت سے دیوانہ ملا
سب نے دامن چاک رکھا ہے بقدر احتیاج
ہم کو دیوانوں میں بھی کوئی نہ دیوانہ ملا
غزل سن کر مری کہنے لگے وہ
مجھے یہ شخص دیوانہ لگے ہے
نگاہ کم سے میری چاک دامانی کو مت دیکھو
ہزاروں ہوشیاروں میں کوئی دیوانہ بنتا ہے
نہ اتنا چھیڑ کر اے وقت دیوانہ بنا ہم کو
ہوئے دیوانے ہم تو سب کو دیوانہ بنا دیں گے

کیف بھوپالی

حرج نہ ہو تو دیکھتے چلئے
راہ میں اک دیوانہ پڑا ہے

کیفی اعظمی

آج پھر ٹوٹیں گی تیرے گھر کی نازک کھڑکیاں
آج پھر دیکھا گیا دیوانہ تیرے شہر میں

محبوب خزاں

کیوں نہ ہو مجھ سے شکایت تمہیں تم وہ ہو کہ پھر
اسے جیتا بھی نہ چھوڑو جسے دیوانہ کرو

مجروح سلطان پوری

دار پر چڑھ کر لگائیں نعرۂ زلف صنم
سب ہمیں باہوش سمجھیں چاہے دیوانہ کہیں

ناصر کاظمی

پھول برسائے یہ کہہ کر اس نے
میرا دیوانہ ہے دیوانۂ گل
خلوتوں میں روئے گی چھپ چھپ کے لیلائے غزل
اس بیاباں میں نہ اب آئے گا دیوانہ کوئی