رخ داستانِ غم کا ادھر سے ادھر ہوا
یگانہ چنگیزی
قصہ کتابِ عمر کا کیا مختصر ہوا
رخ داستانِ غم کا ادھر سے ادھر ہوا
ماتم سرائے دہر میں کس کس کو رویے
اے وائے دردِ دل نہ ہوا دردِ سر ہوا
تسکینِ دل کو راز خودی پوچھتا ہے کیا
کہنے کو کہہ دوں اور اگر الٹا اثر ہوا
آزاد ہو سکا نہ گرفتار شش جہت
دل مفت بندۂ ہوسِ بال و پر ہوا
دنیا کے ساتھ دین کی بیگار الاماں
انسان آدمی نہ ہوا جانور ہوا
فردا کا دھیان باندھ کے کہتا ہے مجھ سے دل
تو میری طرح کیوں نہ وسیع النظر ہوا
فردا کو دور ہی سے ہمارا سلام ہے
دل اپنا شام ہی سے چراغِ سحر ہوا
مفعول فاعلات مفاعیل فاعِلن
مضارع مثمن اخرب مکفوف محذوف