مرزا غالب

میں نے مجنوں پہ لڑکپن میں اسدؔ
سنگ اٹھایا تھا کہ سر یاد آیا
آہ کو چاہیے اک عمر اثر ہونے تک
کون جیتا ہے تری زلف کے سر ہونے تک
اے ساکنان کوچۂِ دل دار دیکھنا
تم کو کہیں جو غالب آشفتہ سر ملے

امام بخش ناسخ

سر رہے یا جائے کچھ ہم میکشوں کو ڈر نہیں
کون سا مینائے مے اے محتسب بے سر نہیں

انشاء اللہ خان انشا

نیند مستوں کو کہاں اور کدھر کا تکیہ
خشت خم خانہ ہے یاں اپنے تو سر کا تکیہ
یہ تو حاصل ہے کہاں بھیج دے لیکن مجھ کو
جس میں بالوں کی ہو بو تیرے ہو سر کا تکیہ
جب تلک آپ نہ جاگیں گے رہے گا یوں ہی
سرکے گا تب ہی کہ جب کہیے گا سرکا تکیہ

بہادر شاہ ظفر

اٹھایا عشق میں کیا کیا نہ دردِ سر میں نے
حصول پر مجھے اس دردِ سر سے کچھ نہ ہوا

حیدر علی آتش

رنجِ دنیا سے فراغ ایذا دہندوں کو نہیں
کب تپ شیرا اتری کس دن دردِ سر جاتا رہا
کچھ تو ہمیں حقیقت شمس و قمر کھلے
کس کج کلہ کے عشق میں پھرتے ہیں سر کھلے
کوتہ ہے اس قدر مرے قد پر ردائے عیش
ڈھانکوں جو پاؤں کو تو یقیں ہے کہ سر کھلے
پاپوش ہم نے ماری ہے دستار و تاج پر
سودائے زلفِ یار میں رہتے ہیں سر کھلے

داغ دہلوی

ہم نے ان کے سامنے اول تو خنجر رکھ دیا
پھر کلیجا رکھ دیا دل رکھ دیا سر رکھ دیا
نہیں رکھنے دیتے جہاں پاؤں ہم کو
اسی آستانے پہ سر دیکھ لینا
محبت کا اثر جاتا کہاں ہے
ہمارا دردِ سر جاتا کہاں ہے
دل کے نالوں سے جگر دکھنے لگا
یاں تلک روئے کہ سر دکھنے لگا

شیخ ابراہیم ذوق

گیا شیطان مارا ایک سجدہ کے نہ کرنے میں
اگر لاکھوں برس سجدے میں سر مارا تو کیا مارا
شمع بھی کم نہیں کچھ عشق میں پروانے سے
جان دیتا ہے اگر وہ تو یہ سر دیتی ہے
اک صدمہ دردِ دل سے مری جان پر تو ہے
لیکن بلا سے یار کے زانو پہ سر تو ہے
اے ذوقؔ وقت نالے کے رکھ لے جگر پہ ہاتھ
ورنہ جگر کو روئے گا تو دھر کے سر پہ ہاتھ

مصحفی غلام ہمدانی

کل یار کی گلی میں ڈھونڈا جو مصحفیؔ کو
اک لاش تو پڑی تھی پر اس کا سر نہ دیکھا
افسانۂِ عشق کس سے کہیے
اس بات میں دردِ سر بہت ہے
وائے دنیا کہ رلتے پھرتے ہیں
خاک میں کاسہ ہائے سر سب کے
مقتل میں یہ تماشا اس کے نیا میں دیکھا
ایدھر کو دھڑ پڑے ہیں اودھر کو سر پڑے ہیں

مصطفٰی خان شیفتہ

وہ دن گئے کہ ربطِ سر و سنگ تھا بہم
شکرانے کے سجود ہیں اور اپنا سر ہے آج

مومن خان مومن

کثرت سجدہ سے وہ نقشِ قدم
کہیں پامال سر نہ ہو جائے

فیض احمد فیض

پاپوش کی کیا فکر ہے ، دستار سنبھالو
پایاب ہے جو موج گزرجائے گی سر سے

مرزا رفیع سودا

دل میں ترے جو کوئی گھر کر گیا
سخت مہم تھی کہ وہ سر کر گیا

یگانہ چنگیزی

ماتم سرائے دہر میں کس کس کو رویے
اے وائے دردِ دل نہ ہوا دردِ سر ہوا

باقی صدیقی

ایسا وار پڑا سر کا
بھول گئے رستہ گھر کا
لے گیا بچا کر وہ دل کے ساتھ سر اپنا
جس نے تیرے ایما پر طے کیا سفر اپنا
عنایت ایک تہمت بن نہ جائے
نظر کے ساتھ جھک جائے نہ سر بھی
کچھ بھی پایا نہ دردِ سر کے سوا
گئے جس در پہ تیرے در کے سوا
کب نہ اس شہر میں پتھر برسے
کب نہ اس شہر میں سر یاد آیا
دل جلا دھوپ میں ایسا اب کے
پاؤں یاد آئے نہ سر یاد آیا
جب سایہ آدمی کا پڑا سر کا آدمی
اپنی ہوا میں اڑتا ہے بے پر کا آدمی
خود سے آگے قدم نہیں جاتا
مرحلہ دل کا سر کریں کیسے
کیا محبت سے تعلق تجھ کو
یہ بلا بھی مرے سر آئی ہے
کیا کبھی اس کا بھی آیا ہے خیال
کیوں ترے شوریدہ سر چپ ہو گئے

جون ایلیا

تھا رن بھی زندگی کا عجب طرفہ ماجرا
یعنی اٹھے تو پاؤں مگر جونؔ سر گئے
عجب الزام ہوں زمانے کا
کہ یہاں سب کے سر گیا ہوں میں
اپنے سر اک بلا تو لینی تھی
میں نے وہ زلف اپنے سر لی ہے
یہ شخص آج کچھ نہیں پر کل یہ دیکھیو
اس کی طرف قدم ہی نہیں سر بھی آئیں گے
خیالوں کی آمد میں یہ خارزار
ہے تیروں کی یلغار تو سر چھپا
شمشیر میری، میری سپر کس کے پاس ہے
دو میرا خود پر مرا سر کس کے پاس ہے
طفلان کوچہ گرد کے پتھر بھی کچھ نہیں
سودا بھی ایک وہم ہے اور سر بھی کچھ نہیں
نسبت میں ان کی جو ہے اذیت وہ ہے مگر
شہ رگ بھی کوئی شے نہیں اور سر بھی کچھ نہیں
کچھ بھی ہو قتل گاہ میں حسن بدن کا ہے ضرر
ہم نہ کہیں سے آئیں گے دوش پہ سر لیے بغیر

جگر مراد آبادی

عشق ہی تنہا نہیں شوریدہ سر میرے لیے
حسن بھی بیتاب ہے اور کس قدر میرے لیے
اللٰہ اللٰہ میں بھی کیا نازک دماغ عشق ہوں
نکہتِ گل بھی ہے وجہ دردِ سر میرے لیے

خواجہ میر درد

ہم نے کس رات نالہ سر نہ کیا
پر اسے آہ کچھ اثر نہ کیا

سراج الدین ظفر

دن کو بحر و بر کا سینہ چیر کر رکھ دیجیے
رات کو پھر پائے گل رویاں پہ سر رکھ دیجیے

قمر جلالوی

جاؤ بھی شبِ وعدہ رکھا خوب پریشاں
رہنے دو قسم کھا گئے جھوٹی مرے سر کی

شکیب جلالی

موجِ غم اس لیے شاید نہیں گزری سر سے
میں جو ڈوبا تو نہ ابھروں گا کبھی ساگر سے

عرفان صدیقی

یہ فاصلوں کے کڑے کوس مملکت میری
مرے غبار، مرے تاجِ سر سلام تجھے
یہ شہرِ ذات بہت ہے ‘ اگر بنایا جائے
تو کائنات کو کیوں دردِ سر بنایا جائے
یہ کرشمہ کبھی ہوتے نہیں دیکھا ہم نے
سر بھی شانوں پہ رہے معرکہ سر بھی ہو جائے
ہم نے کہا نہ تھا کہ ہیں مشکل کشا علی
وہ معرکے جو بس کے نہ تھے سر بھی ہو گئے
میرا میدان غزل نیزہ و سر کا ٹھہرا
رہنے والا جو شہیدوں کے نگر کا ٹھہرا
آج تک گریہ کناں ہے اسی حسرت میں فرات
کاش ہوتا در شبیر پہ سر پانی کا
کوئی دشوار نہیں شیوۂ شوریدہ سری
ہاں اگر ہے تو ذرا خوف ہے سر جانے کا
خواب میں بھی میری زنجیرِ سفر کا جاگنا
آنکھ کیا لگنا کہ اک سودائے سر کا جاگنا
کچھ تو چٹانوں سے نکلے جوئے خوں یا جوئے شیر
پتھروں کے بیچ رہنا ہے تو سر کیا دیکھنا
تم جو کچھ چاہو وہ تاریخ میں تحریر کرو
یہ تو نیزہ ہی سمجھتا ہے کہ سر میں کیا تھا
یہ آسودہ جو ہے ‘ میری ہوس ہے
مرا سودائے سر ایسا نہیں تھا
کون مانے گا کہ اس ترکِ طلب کے باوجود
پہلے ہم لوگوں میں کچھ سودائے سر جیسا بھی تھا
اک ذرا خم ہو کے میں پیش ستم گر بچ گیا
میری پگڑی گر گئی لیکن مرا سر بچ گیا
پھر کوئی خیمہ کسی اذنِ عقوبت کا شکار
پھر کوئی نیزہ کسی دولتِ سر کا وارث
روشن ہوا یہ شام کے منظر کو دیکھ کر
کرتا ہے سرفراز خدا سر کو دیکھ کر
مجھے کھنچی ہوئی تلوار سونپنے والے
میں کیا کروں کہ طرفدار سر کا میں بھی ہوں
وہی عصا کا خدا ہے ‘ وہی سمندر کا
وہ مرحلہ کوئی دے گا تو سر کروں گا میں
خانۂ درد ترے خاک بہ سر آ گئے ہیں
اب تو پہچان کہ ہم شام کو گھر آ گئے ہیں
شہسوارو، اپنے خوں میں ڈوب جانا شرط ہے
ورنہ اس میدان میں نیزے پہ سر آتا نہیں
پائے طلب کنارِ زمیں تک پہنچ گئے
میں رک گیا تو وحشتِ سر نے کہا نہیں
اپنے بھولے ہوئے منظر کی طرف لوٹ چلو
گم شدہ تیرو، کسی سر کی طرف لوٹ چلو
کوئی کنیز اہلِ حرم بے ردا نہ ہو
ان پاک بیبیوں کے کھلے سر کا واسطہ
حریف تیغِ ستم گر تو کر دیا ہے تجھے
اب اور مجھ سے تو کیا چاہتا ہے سر میرے
جھٹک کر پھینک دو گے چند ان چاہے خیالوں کو
مگر کاندھوں پہ یہ رکھا ہوا سر کیسے پھینکو گے
ندی سے پھول نہ گنجِ گہر نکلتا ہے
جو طشتِ موج اٹھاتا ہوں سر نکلتا ہے
نیند سے پہلے بہت شور مچاتے ہیں خیال
شب کو ہنگامۂ سر ختم کہاں ہوتا ہے
کھیل سب آنکھوں کا ہے سارا ہنر آنکھوں کا ہے
پھر بھی دنیا میں خسارہ سر بہ سر آنکھوں کا ہے
بس اپنا اپنا فرض ادا کر رہے ہیں لوگ
ورنہ سناں بھی اس کی ہے سر بھی اسی کا ہے