یگانہ چنگیزی

قیامت ہے شبِ وعدہ کا اتنا مختصر ہونا
فلک کا شام سے دست و گریبانِ سحر ہونا
قصہ کتابِ عمر کا کیا مختصر ہوا
رخ داستانِ غم کا ادھر سے ادھر ہوا
شب امید کٹ گئی لیکن
زندگی اپنی مختصر نہ ہوئی

باقی صدیقی

زندگی غم کا نام ہے باقیؔ
ہم نے اب قصہ مختصر جانا
کچھ ہم میں نہیں بیاں کی طاقت
کچھ وقت نے بات مختصر کی
سرِ رہ حال پوچھنے والے
دل کی ہر بات مختصر تو نہیں
فاصلہ دل کا مختصر ہے ابھی
فیصہ اک نگہ پر ہے ابھی
تیرے غم کے ہزار پہلو ہیں
بات ہم مختصر کریں کیسے

جگر مراد آبادی

مرنا ہے ان کے پاؤں پہ رکھ کر سر نیاز
کرنا ہے آج قصۂ غم مختصر مجھے
شبِ وصل کیا مختصر ہو گئی
ذرا آنکھ جھپکی سحر ہو گئی
نمایاں ہوئی صبح پیری جگرؔ
بس اب داستاں مختصر ہو گئی

خواجہ میر درد

زور عاشق مزاج ہے کوئی
دردؔ کو قصہ مختصر دیکھا

قمر جلالوی

کیا ان آہوں سے شبِ غم مختصر ہو جائے گی
یہ سحر ہونے کی باتیں ہیں سحر ہو جائے گی؟
اس نے کس جملے کو سن کر کہہ دیا تجھ سے کہ خیر
نامہ بر میں یہ جوابِ مختصر سمجھا نہیں

عرفان صدیقی

تمام معرکے اب مختصر کروں گا میں
یہ ایک سینہ کہاں تک سپر کروں گا میں
کھلا کہ میں ہی مراد کلام ہوں اب تک
اشارۂ سخن مختصر سلام تجھے
ذرا سی دیر کو رک کر کسی جزیرے پر
سمندروں کا سفر مختصر بنایا جائے

احسان دانش

اوراق دو جہاں پہ بھی ہو گا نہ اختتام
احسانؔ سرگذشت الم مختصر کریں

اسرار الحق مجاز

غمِ دوراں میں گزری جس قدر گزری جہاں گزری
اور اس پر لطف یہ ہے زندگی کو مختصر جانا

آنس معین

تجھے خبر کیا مرے لبوں کی خموشیوں نے!
ترے فسانے کو کس قدر مختصر کیا ہے

زہرا نگاہ

ہمیں تو عادت زخم سفر ہے کیا کہیے
یہاں پہ راہِ وفا مختصر ہے کیا کہیے
حکایت غمِ دنیا طویل تھی کہہ دی
حکایت غمِ دل مختصر ہے کیا کہیے

فارغ بخاری

پکارا جب مجھے تنہائی نے تو یاد آیا
کہ اپنے ساتھ بہت مختصر رہا ہوں میں
ہم لوگ وہ ورق پا ہیں فارغؔ
جنت میں بھی مختصر ہی ٹھہرے

سید ضمیر جعفری

ہنستے رہے فلک پہ ستارے زمیں پہ پھول
اچھا ہوا کہ عمر ملی مختصر مجھے
جنگلوں میں زرد پت جھڑ کا سفر ہے زندگی
اس سفر کا مختصر رہنا بھی اچھی بات ہے

شکیل بدایونی

میں تو اس عالم کو کیا سے کیا بنا دیتا مگر
کس کی چلتی ہے حیات مختصر کے سامنے

فانی بدایونی

حشر کا دن بھی ڈھل گیا فانیؔ
دل کی روداد مختصر نہ ہوئی
قصۂ زیست مختصر کرتے
کچھ تو اپنی سی چارہ گر کرتے
طول رودادِ غم معاذ اللہ
عمر گزری ہے مختصر کرتے

فراق گورکھپوری

خوشا اشارۂ پیہم زہے سکوت نظر
دراز ہو کے فسانہ ہے مختصر پھر بھی

قتیل شفائی

قتیلؔ یہ وصل کے زمانے حسین بھی ہیں طویل بھی ہیں
مگر لگا ہے یہ دل کو دھڑکا انہیں کوئی مختصر نہ کر دے

محسن احسان

خود ہم نے کاٹ کاٹ دی زنجیر سانس کی
خود ہم نے زندگی کا سفر مختصر کیا

میرا جی

جیسے ہوتی آئی ہے ویسے بسر ہو جائے گی
زندگی اب مختصر سے مختصر ہو جائے گی