مرزا غالب

آتا ہے ایک پارۂِ دلِ ہر فغاں کے ساتھ
تارِ نفس کمندِ شکارِ اثر ہے آج
آہ کو چاہیے اک عمر اثر ہونے تک
کون جیتا ہے تری زلف کے سر ہونے تک
بھلا اسے نہ سہی، کچھ مجھی کو رحم آتا
اثر مرے نفسِ بے اثر میں خاک نہیں

انشاء اللہ خان انشا

گریہ و آہ و فغاں نالہ و یا رب فریاد
سب کو ہے ہر شب و روز اپنے اثر کا تکیہ
اترتی نجد میں کب تھی سواری لیلیٰ
ٹک آہ قیس کے جذب اثر سے اتری ہے
آہ کو مت حقیر جان یہی
دودمان اثر کی پونجی ہے

حیدر علی آتش

نے کشش معشوق میں پاتا ہوں نے عاشق میں جذب
کیا بلا آئی محبت کا اثر جاتا رہا
چاہے صفا تو ساتھ طہارت کے ذکر کر
پرہیز کر تو تجھ کو دوا کا اثر کھلے

داغ دہلوی

نگہ غیر پر بے اثر ہو گئی
تمہاری نظر کو نظر ہو گئی
جلایا تو ہے داغؔ کے دل کو تم نے
مگر اس کا ہو گا اثر دیکھ لینا
کب تک ہے تمہارا سخن تلخ گوارا
اس زہر میں کتنا ہے اثر دیکھ رہے ہیں
محبت کا اثر جاتا کہاں ہے
ہمارا دردِ سر جاتا کہاں ہے

شیخ ابراہیم ذوق

وہ دیکھیں بزم میں پہلے کدھر کو دیکھتے ہیں
محبت آج ترے ہم اثر کو دیکھتے ہیں
سرمایۂِ امید ہے کیا پاس ہمارے
اک آہ ہے سینہ میں سو نامید اثر سے
کہے جو کچھ مجھے ناصح نہیں وہ دیوانہ
کہ جانتا ہے کہے کا ہو کچھ اثر تو کہے

مصحفی غلام ہمدانی

کی آہ ہم نے لیکن اس نے ادھر نہ دیکھا
اس آہ میں تو ہم نے کچھ بھی اثر نہ دیکھا
مجھ کو نہیں آہ کا بھروسا
یعنی کہ یہ بے اثر بہت ہے
لوگ کہتے ہیں محبت میں اثر ہوتا ہے
کون سے شہر میں ہوتا ہے کدھر ہوتا ہے
چھریاں چلیں شب دل و جگر پر
لعنت ہے اس آہ بے اثر پر
ہے ہم سے تو آہ آہ کرنا
دینا اس کو اثر خدا سے
اس کے کوچے کو تو اے آہ غنیمت ہی سمجھ
سچ تو یہ ہے نہیں اتنا بھی اثر اور کہیں
اے شبِ ہجر کہیں تیری سحر ہے کہ نہیں
نالۂ نیم شبی تجھ میں اثر ہے کہ نہیں

مصطفٰی خان شیفتہ

وہ دوست ہیں انہیں جو اثر ہو گیا تو کیا
نالے ہیں وہ جو غیر کے دل میں اثر کریں
طوفانِ نوح لانے سے اے چشم فائدہ؟
دو اشک بھی بہت ہیں، اگر کچھ اثر کریں
آہنگ دل پذیر سے مطرب ہے جاں نواز
آہِ جگر خراش کا ظاہر اثر ہے آج
ہے دل کو یوں ترے دمِ اعجاز اثر سے فیض
غنچے کو جیسے موجۂِ بادِ سحر سے فیض

مومن خان مومن

صبر وحشتِ اثر نہ ہو جائے
کہیں صحرا بھی گھر نہ ہو جائے
بات ناصح سے کرتے ڈرتا ہوں
کہ فغاں بے اثر نہ ہو جائے
یہ جوش یاس تو دیکھو کہ اپنے قتل کے وقت
دعائے وصل نہ کی وقت تھا اثر کا سا

فیض احمد فیض

چشم میگوں ذرا ادھر کر دے
دستِ قدرت کو بے اثر کر دے
گرمیء شوقِ نظارہ کا اثر تو دیکھو
گل کھلے جاتے ہیں وہ سایہء در تو دیکھو

مرزا رفیع سودا

اے نالہ صد افسوس جواں مرنے پہ تیرے
پایا نہ تنک دیکھنے تیں روئے اثر بھی

یگانہ چنگیزی

وہی ساقی وہی ساغر وہی شیشہ وہی بادہ
مگر لازم نہیں ہر ایک پر یکساں اثر ہونا
انگڑائیاں لے لے کے اٹھے صاحب محفل
کچھ نیند بھی آنکھوں میں ہے کچھ مے کا اثر بھی
ہم ہاتھ سے دل تھامے ہوئے دور کھڑے ہیں
دیکھیں تو کوئی لیتا ہے کچھ اس کا اثر بھی
اے جذبۂ دل دیکھ بہت تو نے کمی کی
ہاں آہوں میں اب چاہیے تھوڑا سا اثر بھی
مر جائیں گے تڑپ کے اسیران بدنصیب
سن پائیں گے جو مژدۂ وحشتِ اثر کہیں
تسکینِ دل کو راز خودی پوچھتا ہے کیا
کہنے کو کہہ دوں اور اگر الٹا اثر ہوا

باقی صدیقی

رنگِ دل، رنگ نظر یاد آیا
تیرے جلوؤں کا اثر یاد آیا
میری فغاں کو بابِ اثر کی تلاش ہے
اس خانماں خراب کو گھر کی تلاش ہے

جون ایلیا

آخرش خون تھوکنے سے میاں
بات میں تیری کیا اثر آیا
اے اہلِ شہر میں تو دعا گوئے شہر ہوں
لب پر مرے دعا ہے اثر کس کے پاس ہے
شہر بہ شہر کر سفر زادِ سفر لیے بغیر
کوئی اثر کیے بغیر کوئی اثر لیے بغیر

جگر مراد آبادی

کیا برابر کا محبت میں اثر ہوتا ہے
دل ادھر ہوتا ہے ظالم نہ ادھر ہوتا ہے
ہم نے کیا کچھ نہ کیا دیدۂ دل کی خاطر
لوگ کہتے ہیں دعاؤں میں اثر ہوتا ہے
کون دیکھے اسے بیتاب محبت اے دل
تو وہ نالے ہی نہ کر جن میں اثر ہوتا ہے
آیا نہ راس نالۂ دل کا اثر مجھے
اب تم ملے تو کچھ نہیں اپنی خبر مجھے
برابر سے بچ کر گزر جانے والے
یہ نالے نہیں بے اثر جانے والے

خواجہ میر درد

پھرتی رہی تڑپتی ہی عالم میں جا بہ جا
دیکھا نہ میری آہ نے روئے اثر کہیں
ہم نے کس رات نالہ سر نہ کیا
پر اسے آہ کچھ اثر نہ کیا

قمر جلالوی

یہ تو نہیں آہ میں کچھ بھی اثر نہ ہو
ممکن آج رات کوئی اپنے گھر نہ ہو
ان کے جاتے ہی وحشت کا اثر دیکھا کیے
سوئے در دیکھا تو پہروں سوئے در دیکھا کیے

عرفان صدیقی

یہ کاروبار عرضِ تمنا فضول ہے
دل میں لہو، دعا میں اثر کچھ نہیں بچا
سب کاروبار عرضِ تمنا فضول ہے
دل میں لہو زباں میں اثر کچھ نہیں بچا
اس کا حرفِ مختصر بیداریوں کا سلسلہ
لفظ میں معنی کا، معنی میں اثر کا جاگنا
مدت سے اک سکوت ہمارا نشان تھا
ہم حرف زن ہوئے تو اثر نے کہا نہیں
شاعری کون کرامت ہے مگر کیا کیجے
درد ہے دل میں سو لفظوں میں اثر ہے سائیں
چاہتا کون ہے مرنے کی اذیت سے نجات
زہر تو ہے تو اثر ختم کہاں ہوتا ہے
تیغِ ستم کو جس نے عطا کی ہیں مہلتیں
فریاد کشتگاں میں اثر بھی اسی کا ہے

الطاف حسین حالی

ہوتی نہیں قبول دعا ترک عشق کی
دل چاہتا نہ ہو تو زباں میں اثر کہاں

احسان دانش

یوں اس پہ مری عرضِ تمنا کا اثر تھا
جیسے کوئی سورج کی تپش میں گلِ تر تھا
اس آدم خاکی پہ ستاروں کی نظر تھی
اس خاک پہ کچھ جلوۂ‌ یزداں کا اثر تھا

اختر شیرانی

کس کی آنکھوں کا لیے دل پہ اثر جاتے ہیں
مے کدے ہاتھ بڑھاتے ہیں جدھر جاتے ہیں
کیا کہہ گئی کسی کی نظر کچھ نہ پوچھئے
کیا کچھ ہوا ہے دل پہ اثر کچھ نہ پوچھئے
وہ دیکھنا کسی کا کنکھیوں سے بار بار
وہ بار بار اس کا اثر کچھ نہ پوچھئے

اسرار الحق مجاز

آہ تو بے اثر تھی برسوں سے
نغمہ بھی بے اثر ہے کیا کہیے
فلک کی سمت کس حسرت سے تکتے ہیں معاذ اللہ
یہ نالے نارسا ہو کر یہ آہیں بے اثر ہو کر

آنس معین

سنا ہے اس رت کو دیکھ کر تم بھی رو پڑے تھے
سنا ہے بارش نے پتھروں پر اثر کیا ہے

بشیر بدر

وہ بڑا رحیم و کریم ہے مجھے یہ صفت بھی عطا کرے
تجھے بھولنے کی دعا کروں تو مری دعا میں اثر نہ ہو

بیخود بدایونی

نالے میں کبھی اثر نہ آیا
اس نخل میں کچھ ثمر نہ آیا

عالم تاب تشنہ

مرے یقیں کو بڑا بد گمان کر کے گیا
دعائے نیم شبی تیرا بے اثر جانا

عبید اللہ علیم

ابھی نظر نہیں ایسی کہ دور تک دیکھوں
ابھی خبر نہیں مجھ کو کہ کس اثر میں ہوں

علی سردار جعفری

قافلے آئے تو تھے نعروں کے پرچم لے کر
سرنگوں ہو گئی ہر آہ اثر سے پہلے

تلوک چند محروم

وہ شام کی صورت ہے نہ وہ رنگ سحر ہے
کس کوکب منحوس کا یا رب یہ اثر ہے
محرومؔ مگر عشق تمہارا ہے ریائی
فریاد میں تاثیر نہ آہوں میں اثر ہے
اس کا گلہ نہیں کہ دعا بے اثر گئی
اک آہ کی تھی وہ بھی کہیں جا کے مر گئی

جلیل مانک پوری

دل سے لائے لب پہ ہم آہ و فغاں
اب تجھے لانا اثر کا کام ہے

حسرت موہانی

نارسا آہ عاشقاں وہ کہاں
دور ان سے جو بے اثر نہ ہوئی
حال میرا تھا جب بتر تب نہ ہوئی تمہیں خبر
بعد میرے ہوا اثر اب میں اثر کو کیا کروں

حفیظ جالندھری

وحشت دلِ فزوں تو ہے حال مرا زبوں تو ہے
عشق نہیں جنوں تو ہے اس کے اثر کو کیا کروں
اتنا تو ہوا آہ شبِ غم کے اثر سے
فطرت کا جگر پھوٹ بہا چشم سحر سے
خطرے میں ہیں کچھ دن سے حفیظؔ اہل دو عالم
ہر شب میرے نالوں کی لڑائی ہے اثر سے

حفیظ ہوشیارپوری

نصیب اہلِ وفا یہ سکونِ دل تو نہ تھا
ضرور نالۂ دل بے اثر گیا کوئی

رسا چغتائی

تیرا اپنا نہیں ترا سایا
تیرے زیر اثر رہے گا کیا

سیف الدین سیف

یہ وہی ساعت‌ بیداری ہے
جب دعاؤں میں اثر بولتا ہے

سیماب اکبر آبادی

فطرت ہر اعتبار سے ہے ہم نوائے حسن
آمین تم کو تو دعائیں اثر کریں
رسماً ہی ان کو نالۂ دل کی خبر تو ہو
یعنی اثر نہ ہو تو فریب اثر تو ہو
سیمابؔ آدھی رات کو آئیں وہ بے قرار
تیری دعائے نیم شبی میں اثر تو ہو

شاد عظیم آبادی

اب انتہا کا ترے ذکر میں اثر آیا
کہ منہ سے نام لیا دل میں تو اتر آیا
زباں پہ آتا ہے نالہ بھی سو کرشموں سے
کہاں سے آپ کے انداز کا اثر آیا
شراب پی کے میں پہنچا فلک پہ اے ساقی
کہاں سے ان کئی قطروں میں یہ اثر آیا

شان الحق حقی

اثر نہ ہو تو اسی نطق بے اثر سے کہہ
چھپا نہ دردِ محبت جہان بھر سے کہہ

شکیل بدایونی

ترکِ وفا کو مدت گزری
آج بھی لیکن دل پہ اثر ہے

عزیز حامد مدنی

ہزار وقت کے پرتو نظر میں ہوتے ہیں
ہم ایک حلقۂ وحشت، اثر میں ہوتے ہیں

فانی بدایونی

آہ اب تک تو بے اثر نہ ہوئی
کچھ تمہیں کو مری خبر نہ ہوئی
خود تغافل نے دیا مژدۂ بیداد مجھے
اللہ اللہ مرے نالے بھی اثر رکھتے ہیں
سچ ہے ہر نالہ کیوں رسا ہوتا
میرے نالے تھے کیوں اثر کرتے

اختر ہوشیارپوری

وہ آندھیاں چلی ہیں کہ اشجار اکھڑ گئے
دکان شیشہ گر پہ نہ پھر بھی اثر ہوا

اکبر حمیدی

جلال حسن دکھا میرے ماہتاب جمال
تو روشنی ہے شبوں کے اثر سے نکلے گا

احمد فراز

میری یہی بساط کہ فریاد ہی کروں
تو چاہتا نہیں ہے تو بابِ اثر نہ کھول

امیر مینائی

الفت کی کیا امید وہ ایسا ہے بے وفا
صحبت ہزار سال رہے کچھ اثر نہ ہو

شاذ تمکنت

مجھے مدتوں یہی وہم تھا کہ یہ خاک کیمیا بن گئی
اسی کشمکش میں گزر گئی کہ فغاں کروں تو اثر بھی ہے
سوز دعا سے ساز اثر کون لے گیا
اک سنگِ در سے نسبت سر کون لے گیا

فراق گورکھپوری

ترے کیف حسن کی جان ہے مری بے دلی و فسردگی
جسے کہتے ہیں غم رائگاں وہ لیے ہوئے کچھ اثر بھی ہے
نہ کہو تغافل‌ حسن سے کوئی کار سازی غم کرے
کہ جو آج غم سے نکل گئی وہ دعا خراب اثر بھی ہے

قتیل شفائی

بڑے مزے سے میں پی رہا ہوں مری طرف تم ابھی نہ دیکھو
مجھے یہ ڈر ہے نظر تمہاری شراب کو بے اثر نہ کر دے
کیوں تیرا گریباں ہے قتیلؔ اب بھی سلامت
کچھ تجھ پہ نئی رت کا اثر ہے کہ نہیں ہے

محسن احسان

خلوص ہو تو دعا میں اثر بھی آتا ہے
شجر ہرا ہو تو اس میں ثمر بھی آتا ہے

ناصر کاظمی

مرا تو خوں ہو گیا ہے پانی ستمگروں کی پلک نہ بھیگی
جو نالہ اٹھا تھا رات دل سے نہ جانے کیوں بے اثر گیا وہ

نوح ناروی

مجھ سے بگڑ کر اپنے گھر جائیے خیر جائیے
آپ نے یہ سمجھ لیا آہ میں کچھ اثر نہیں
ممکن نہیں وہ چاہنے والوں کو نہ چاہیں
اخلاص و محبت کا اثر بھی ہے کوئی چیز
بیتاب ادھر آپ پریشان ادھر ہم
آپس کی محبت کا اثر بھی ہے کوئی چیز
بے کار نہ جائے گا مرے دل کا تڑپنا
نالہ ہے کوئی شے تو اثر بھی ہے کوئی چیز