مرزا غالب

جانتا ہوں ثوابِ طاعت و زہد
پر طبیعت ادھر نہیں آتی

انشاء اللہ خان انشا

مکڑاتے ہوئے پھرتے ہیں ہم کوچہ میں اس کے
کیا کیجیے دروازہ ادھر بند ادھر بند

بہادر شاہ ظفر

نباہ بات کا اس حیلہ گر سے کچھ نہ ہوا
ادھر سے کیا نہ ہوا پر ادھر سے کچھ نہ ہوا

داغ دہلوی

لگاتے ہیں دل اس سے اب ہار جیت
ادھر ہو گئی یا ادھر ہو گئی
ادھر دیکھ لینا ادھر دیکھ لینا
کن انکھیوں سے اس کو مگر دیکھ لینا
سب لوگ جدھر وہ ہیں ادھر دیکھ رہے ہیں
ہم دیکھنے والوں کی نظر دیکھ رہے ہیں
اب اے نگہِ شوق نہ رہ جائے تمنا
اس وقت ادھر سے وہ ادھر دیکھ رہے ہیں

شیخ ابراہیم ذوق

جگر دل دونوں پہلو میں ہیں زخمی اس نے کیا جانے
ادھر مارا تو کیا مارا ادھر مارا تو کیا مارا
کشتی بحرِ غم ہے مرے حق میں تیغ یار
کر دیتی ایک دم میں ادھر سے ادھر تو ہے

مصحفی غلام ہمدانی

کی آہ ہم نے لیکن اس نے ادھر نہ دیکھا
اس آہ میں تو ہم نے کچھ بھی اثر نہ دیکھا
نسیم صبحِ چمن سے ادھر نہیں آتی
ہزار حیف کہ گل کی خبر نہیں آتی
بھٹکتی پھرتی ہے لیلیٰ سوار ناقے پر
جدھر ہے وادی مجنوں ادھر نہیں آتی
بازیچے میں ہے ادھر وہ مشغول
اور بن رہی ہے ادھر خدا سے
ادھر سے جھانکتے ہیں گہہ ادھر سے دیکھ لیتے ہیں
غرض ہم اس کی صورت سو ہنر سے دیکھ لیتے ہیں
ہیں جان و دل کے خواہاں کیا سر کے بال اس کے
جو کچھ ادھر پڑے ہیں اور کچھ ادھر پڑے ہیں

مصطفٰی خان شیفتہ

محفل میں اک نگاہ اگر وہ ادھر کریں
سو سو اشارے غیر سے پھر رات بھر کریں

میر مہدی مجروح

لڑائی کا نہ میں توڑوں گا پھر تار
ذرا سی چھیڑ ہو جائے ادھر سے
ہے لطفِ زیست یہ کہ وہ بیٹھا ہو روبرو
بکھرے ہوں پھول ادھر تو دھری ہو ادھر شراب

فیض احمد فیض

یہ عہد ترکِ محبت ہے کس لیے آخر
سکونِ قلب ادھر بھی نہیں، ادھر بھی نہیں
چشم میگوں ذرا ادھر کر دے
دستِ قدرت کو بے اثر کر دے

مرزا رفیع سودا

گل پھینکے ہے اوروں کی طرف بلکہ ثمر بھی
اے خانہ بر انداز چمن کچھ تو ادھر بھی

یگانہ چنگیزی

محروم شہادت کی ہے کچھ تجھ کو خبر بھی
او دشمنِ جاں دیکھ ذرا پھر کے ادھر بھی
ہے جان کے ساتھ اور اک ایمان کا ڈر بھی
وہ شوخ کہیں دیکھ نہ لے مڑ کے ادھر بھی
وہ ہم سے نہیں ملتے ہم ان سے نہیں ملتے
اک ناز دل آویز ادھر بھی ہے ادھر بھی
صحرا کی ہوا کھینچے لیے جاتی ہے مجھ کو
کہتا ہے وطن دیکھ ذرا پھر کے ادھر بھی
ہاں کٹ گئی شاید ترے دیوانے کی بیڑی
پچھلے پہر آئی تھی کچھ آواز ادھر بھی
قصہ کتابِ عمر کا کیا مختصر ہوا
رخ داستانِ غم کا ادھر سے ادھر ہوا

باقی صدیقی

رنگ زندگی دییکھا کچھ یہاں وہاں باقیؔ
غم غلط کیا ہم نے کچھ ادھر ادھر اپنا
دل کے قصے ہیں کیا رکھا ہے
باتیں ہیں کچھ ادھر ادھر کی
منزل سے بہت دور نکل آیا ہوں باقیؔ
بھٹکا ہوا رہرو ہی کوئی آئے ادھر اب
کس سے پوچھیں بہار کی باتیں
اب صبا بھی ادھر نہیں آتی
ہم بھی مثال گردشِ دوراں ہیں بے مقام
پتھر ادھر بنے تو ادھر آئنہ بنے
ننگ ہستی ہے سکوت ساحل
کوئی طوفاں کو ادھر لے آئے

جون ایلیا

اب میں کوئے عبث شتاب چلوں
کئی اک کام ہیں ادھر درپیش

جگر مراد آبادی

کیا برابر کا محبت میں اثر ہوتا ہے
دل ادھر ہوتا ہے ظالم نہ ادھر ہوتا ہے
عہد غمِ فرقت میں دل اور جگر کیسے
اک زخم ادھر پایا اک داغ ادھر دیکھا
تھا باعث رسوائی ہر چند جنوں میرا
ان کو بھی نہ چین آیا جب تک نہ ادھر دیکھا
یوں دل کو تڑپنے کا کچھ تو ہے سبب آخر
یا درد نے کروٹ لی یا تم نے ادھر دیکھا
اس عشق کے ہاتھوں سے ہرگز نہ مفر دیکھا
اتنی ہی بڑھی حسرت جتنا ہی ادھر دیکھا

خواجہ میر درد

جگ میں آ کر ادھر ادھر دیکھا
تو ہی آیا نظر جدھر دیکھا
ہمیں تو باغ تجھ بن خانۂ ماتم نظر آیا
ادھر گل پھاڑتے تھے جیب روتی تھی ادھر شبنم

قمر جلالوی

ممکن ہے کوئی موج ہو ساحل ادھر نہ ہو
اے نا خدا کہیں یہ فریبِ نظر نہ ہو
مہماں ہے کبھی میری کبھی غیر کے گھر کی
تو اے شبِ فرقت ادھر کی نہ ادھر کی
بیمارِ ہجر آئی کہاں سے سحر ابھی
تارہ کوئی نہیں ہے ادھر سے ادھر ابھی
فائدہ کیا ایسی شرکت سے عدو کی بزم میں
تم ادھر دیکھا کیے اور ہم ادھر دیکھا کیے

عرفان صدیقی

اب اور کوئی راہ نکالو کہ صاحبو
جس سمت جا رہے تھے ادھر کچھ نہیں بچا
اب اور کوئی منزلِ دشوار سوچئے
جس سمت جا رہے تھے ادھر کچھ نہیں بچا
خرابوں میں اب ان کی جستجو کا سلسلہ کیا ہے
مرے گردوں شکار آئیں ادھر ایسا نہیں ہو گا
اب کدھر سے وار ہو سکتا ہے یہ بھی سوچئے
کل جدھر سے تیر آیا تھا ادھر کیا دیکھنا
عجیب روشنیاں تھیں وصال کے اس پار
میں اس کے ساتھ رہا اور ادھر چلا بھی گیا
سوچنا کیا ہے اگر دشت زمیں ختم ہوا
میرے دل میں بھی تو صحرا ہے ادھر چلتا ہوں
اے دل وہ دیکھ خیمہ، فردا قریب ہے
تجھ کو فصیلِ شب کے ادھر کیسے چھوڑ دیں
وہاں ہونے کو ہو گی برف باری
پرندے پھر ادھر آنے لگے ہیں
کل اسی موج میں اپنا تھا تو بہہ جانا تھا
جانِ من اب کوئی سیلاب ادھر آنے کا نہیں
مدت سے فقیروں کا یہ رشتہ ہے فلک سے
جس سمت وہ ہوتا ہے ادھر ہم نہیں ہوتے
تیرا یقین سچ ہے مری چشمِ اعتبار
سب کچھ فصیلِ شب کے ادھر بھی اسی کا ہے
پس حصار خبر آتی جاتی رہتی ہے
ہوا ادھر سے ادھر آتی جاتی رہتی ہے
اب ضیابار وہ مہتاب ادھر بھی ہو جائے
ورنہ ممکن ہے مری رات بسر بھی ہو جائے