مرزا غالب

غمِ ہستی کا ، اسدؔ ! کس سے ہو جز مرگ ، علاج
شمع ہر رنگ میں جلتی ہے سحر ہونے تک
وہ بادۂِ شبانہ کی سر مستیاں کہاں
اٹھیے بس اب کہ لذت خوابِ سحر گئی

بہادر شاہ ظفر

بلا سے گریۂِ شب تو ہی کچھ اثر کرتا
اگرچہ عشق میں آہ سحر سے کچھ نہ ہوا

حیدر علی آتش

یاد رکھتا ہے عدم میں کوئی ساغر کش اسے
ہچکیاں شیشۂِ مے شام و سحر لیتا ہے
اس کے کوچے میں مسیحا ہر سحر جاتا رہا
بے اجل واں ایک دو ہر رات مر جاتا رہا
کٹ جائے وہ زباں نہ ہو جس سے دعائے خیر
پھوٹے وہ آنکھ جو کہ نہ وقتِ سحر کھلے
فصلِ بہار آئی ہے چلتا ہے دورِ جام
مغ کی دکان شام کھلے یا سحر کھلے

داغ دہلوی

شبِ وصل ضد میں بسر ہو گئی
نہیں ہوتے ہوتے سحر ہو گئی
میسر ہمیں خواب راحت کہاں
ذرا آنکھ جھپکی سحر ہو گئی
شبِ وصل ایسی کھلی چاندنی
وہ گھبرا کے بولے سحر ہو گئی
یہی رونا ہے گر شبِ غم کا
پھوٹ جائیں گی تا سحر آنکھیں
تیور ترے اے رشکِ قمر دیکھ رہے ہیں
ہم شام سے آثار سحر دیکھ رہے ہیں

شیخ ابراہیم ذوق

جو رات خواب میں اس فتنہ گر کو دیکھتے ہیں
نہ پوچھ ہم جو قیامت سحر کو دیکھتے ہیں
وہ روز ہم کو گزرتا ہے جیسے عید کا دن
کبھی جو شکل تمہاری سحر کو دیکھتے ہیں
شمع گھبرا نہ شبِ غم سے کہ کوئی دم میں
تجھ کو کافور سفیدی سحر دیتی ہے
غنچہ ہنستا ہے ترے آگے جو گستاخی سے
چٹخنا منہ پہ وہیں بادِ سحر دیتی ہے
میں ناتواں ہوں خاک کا پروانے کی غبار
اٹھتا ہوں رکھ کے دوشِ نسیمِ سحر پہ ہاتھ

مصحفی غلام ہمدانی

رات کے رہنے کا نہ ڈر کیجیے
ایک تو شب یاں بھی سحر کیجیے
نہیں معلوم کہ ماتم ہے فلک پر کس کا
روز کیوں چاک گریبانِ سحر ہوتا ہے
شبِ وصال کب آتی ہے میرے گھر اے چرخ
کہ اس کے پیچھے سے دوڑی سحر نہیں آتی
شب اس کی بزم میں جو گئے ہم تو مصحفیؔ
ایسے جمے کہ واں سے نہ اٹھے سحر تلک
شب کی شبِ گل چمن کے ہیں مہمان
برگ جھڑ جائیں گے سحر سب کے
بتلا دے تو ہی واشد دل کا مجھے علاج
گلشن میں اے نسیمِ سحر جاؤں کیا کروں
دیجور میں کسے ہے سپید و سیہ کا فرق
زندانیوں کو شام و سحر دونوں ایک ہیں
مصحفیؔ میں ہوں وہ سرگشتہ کہ خورشید کی طرح
شام گر اور کہیں کی تو سحر اور کہیں
اے شبِ ہجر کہیں تیری سحر ہے کہ نہیں
نالۂ نیم شبی تجھ میں اثر ہے کہ نہیں

مصطفٰی خان شیفتہ

مانا سحر کو یار اسے جلوہ گر کریں
طاقت ہمیں کہاں کہ شبِ غم سحر کریں
ہے جی میں سونگھیں نکہتِ گل جا کے باغ میں
بس کب تک التجائے نسیمِ سحر کریں
شبِ وصل کی بھی چین سے کیوں کر بسر کریں
جب یوں نگاہبانی مرغِ سحر کریں
اے شیفتہ نوید شبِ غم سحر ہے آج
ہم تاب آفتاب، فروغِ قمر ہے آج
کیا غیر تھا کہ شب کو نہ تھا جلوہ گر چراغ
رہتا ہے ورنہ گھر میں ترے تا سحر چراغ
کیا لطفِ آہ، صبح شبِ ہجر مہروش
کیا فائدہ جو کیجیے روشن سحر چراغ
ہے دل کو یوں ترے دمِ اعجاز اثر سے فیض
غنچے کو جیسے موجۂِ بادِ سحر سے فیض
خرم نہادِ مے کش و زاہد شگفتہ دل
ہے شیفتہ ہر ایک کو وقتِ سحر سے فیض

مومن خان مومن

غیر سے بے حجاب ملتے ہو
شب عاشق سحر نہ ہو جائے
لگے خدنگ جب اس نالۂ سحر کا سا
فلک کا حال نہ ہو کیا مرے جگر کا سا

فیض احمد فیض

ماضی میں جو مزا مری شام و سحر میں تھا
اب وہ فقط تصورِ شام و سحر میں ہے
پھر لوٹا ہے خورشید جہانتاب سفر سے
پھر نورِ سحر دست و گریباں ہے سحر سے
کب ٹھہرے گا درد اے دل، کب رات بسر ہو گی
سنتے تھے وہ آئیں گے ، سنتے تھے سحر ہو گی

مرزا رفیع سودا

اتنی بھی پتنگ پیش قدمی!
گر شام نہیں سحر گئے ہم
تنہا ترے ماتم میں نہیں شام سیہ پوش
رہتا ہے سدا چاک گریبانِ سحر بھی

میر انیس

کچھ آج شام سے چہرہ ہے فق سحر کی طرح
ڈھلا ہی جاتا ہوں فرقت میں دوپہر کی طرح

یگانہ چنگیزی

لیلی شبِ ہجر نے بکھرا دیے گیسو
ماتم میں مرے چاکِ گریباں ہے سحر بھی
کس شان سے آتی ہے مری شام مصیبت
وہ دیکھو جلو میں ہے قیامت کی سحر بھی
بجھتی ہوئی اک شمع ہوں کیا دم کا بھروسا
دشمن ہے مری جان کی اب آہ سحر بھی
دیکھے کوئی جاتی ہوئی دنیا کا تماشا
بیمار بھی سر دھنتا ہے اور شمعِ سحر بھی
کیا وعدۂ دیدار کو سچ جانتے ہو یاسؔ
لو فرض کرو آئی قیامت کی سحر بھی
آخر حجاب و شرم کی حد بھی ہے مہرباں
پردہ الٹ نہ دے مری آہ سحر کہیں
فردا کو دور ہی سے ہمارا سلام ہے
دل اپنا شام ہی سے چراغِ سحر ہوا
قیامت ہے شبِ وعدہ کا اتنا مختصر ہونا
فلک کا شام سے دست و گریبانِ سحر ہونا
سرِ شام گل ہو گئی شمع بالیں
سلامت ہیں اب تک سحر کرنے والے
آہ بیمار کارگر نہ ہوئی
چرخ کانپا مگر سحر نہ ہوئی
بیمارِ محبت کی اب ہے یہ دعا ہر دم
پھر شام نہ ہو جس کی ایسی سحر آ جائے

باقی صدیقی

آئنہ بن گئی شفق باقیؔ
یاد آیا دمِ سحر کیا کیا
آئی نہ پھر نظر کہیں جانے کدھر گئی
ان تک و ساتھ گردشِ شام و سحر گئی
تیرے بغیر رنگ نہ آیا بہار میں
اک اک کلی کے اس نسیمِ سحر گئی
تیرے بغیر رنگ نہ آیا بہار میں
اک اک کلی کے پاس نسیمِ سحر گئی
یوں پریشاں ہیں جیسے حاصل شب
آج کچھ اور ہے سحر کے سوا
وہ نظر بن گئی پیغام حیات
حلقہ شام و سحر یاد آیا
پھر بجھی شمع جلا دی ہم نے
جانے کیا وقتِ سحر یاد آیا
نظروں میں ابھر آتا ہے ہر ڈوبتا تارا
اس طرح گزرتی ہے مرے دل سے سحر اب
خواب بن بن کے بکھرتا ہے جہاں
شام سے تابہ سحر آنکھوں میں
چھا کر دلوں پہ ان کی نظر مطمئن نہیں
تاروں کو روند کر بھی سحر مطمئن نہیں
روز ایک تازہ حادثہ لائے کہاں سے زیست
مانا کہ دور شام و سحر مطمئن نہیں
تلخی شب نہ جس میں شامل ہو
کوئی ایسی سحر نہیں آتی
اک کرن اس طرف سے گزری ہے
ہو رہی ہے کہیں سحر ساقی
اک سحر ظلمت جہاں سے دور
کہہ سکیں ہم جسے سحر اپنی
چاند شب کے گلے میں اٹکا ہے
دور ہنگامہ سحر ہے ابھی
تاروں کا طلسم ٹوٹنے دو
انوار سحر بھی دیکھ لیں گے
ملتی ہے دل کو محفل انجم سے روشنی
آنکھوں میں شب کٹے تو سحر آئنہ بنے
جس کی ضیا ہو دسترس شامِ غم سے ڈور
دنیا کو ایک ایسی سحر کی تلاش ہے
غمزدہ غمزدہ، لرزاں لرزاں
لو شبِ غم کی سحر آئی ہے
ایک برسا ہوا بادل جیسے
لو شبِ غم کی سحر آئی ہے

جون ایلیا

اک آفتاب ہے مری جیب نگاہ میں
پہنائی نمودِ سحر کس کے پاس ہے

جگر مراد آبادی

وہ اشک بھری آنکھیں اور درد بھرے نالے
اللہ نہ دکھلائے جو وقتِ سحر دیکھا
شبِ وصل کیا مختصر ہو گئی
ذرا آنکھ جھپکی سحر ہو گئی
کھیل ہے بازیچۂ شام و سحر میرے لیے
دو گلِ بازی ہیں یہ شمس و قمر میرے لیے
گرم ہے ہنگامۂ شام و سحر میرے لیے
رات دن گردش میں ہیں شمس و قمر میرے لیے
ترک مے سے اور بھی میں تو شرابی بن گیا
روز آ جاتا ہے مینائے سحر میرے لیے
سب ہو گئی اٹھ اٹھ کر اک باز نثار شمع
پروانوں نے کیا جانے کیا وقتِ سحر دیکھا

قمر جلالوی

شکن آلود بستر، ہر شکن پر خون کے دھبے
یہ حالِ شامِ غم لکھا ہے ہم نے تا سحر اپنا
خیر ہو آپ کے بیمارِ شبِ فرقت کی
آج اتری نظر آتی ہے سحر کی صورت
بیمار کو کیا خاک ہوا امیدِ سحر کی
وہ دو سانس کا دم اور یہ شب چار پہر کی
بیمار شبِ ہجر کی ہو خیر الٰہی
اتری ہوئی صورت نظر آتی ہے سحر کی
کیا ان آہوں سے شبِ غم مختصر ہو جائے گی
یہ سحر ہونے کی باتیں ہیں سحر ہو جائے گی؟
کس سے پوچھیں کے وہ میرے رات کے مرنے کا حال
تو بھی اب خاموش اے شمعِ سحر ہو جائے گی
بیمارِ ہجر آئی کہاں سے سحر ابھی
تارہ کوئی نہیں ہے ادھر سے ادھر ابھی
کیوں روتے روتے ہو گئے چپ شامِ غم قمر
تارے بتا رہے ہیں نہیں ہے سحر ابھی
قفس میں محوِ زاری کاہے کو شام و سحر ہوتے
اسیروں کے کسی قابل اگر صیاد پر ہوتے
علاجِ درد شامِ غم مسیحا ہو چکا جاؤ
مریضِ ہجر کی میت اٹھا دینا سحر ہوتے
مداوا جب دلِ صد چاک کا ہوتا شبِ فرقت
رفو کے واسطے تارے گریبانِ سحر ہوتے
قمر اللہ جانے کون تھا کیا تھا شبِ وعدہ
مثالِ درد جو پہلو سے اٹھا تھا سحر ہوتے
ہٹی زلف ان کے چہرے سے مگر آہستہ آہستہ
عیاں سورج ہوا وقتِ سحر آہستہ آہستہ
چٹک کر دی صدا غنچہ نے شاخِ گل کی جنبش پر
یہ گلشن ہے ذرا بادِ سحر آہستہ آہستہ
شام سے یہ تھی ترے بیمار کی حالت کہ لوگ
رات بھر اٹھ اٹھ کے آثار سحر دیکھا کیے
از شامِ ہجر تا بہ سحر کچھ نہ پوچھیے
کٹتے ہیں کیسے چار پہر کچھ نہ پوچھیے

شکیب جلالی

بھولا نہیں ہوں مقتلِ امید کا سماں
تحلیل ہو رہا تھا شفق میں سحر کا رنگ
جمنے لگی شکیبؔ جو پلکوں پہ گردِ شب
آنکھوں میں پھیلنے لگا خوابِ سحر کا رنگ

عرفان صدیقی

عجیب لوگ تھے مجھ کو جلا کے چھوڑ گئے
عجب دیا ہوں طلوعِ سحر پہ راضی ہوں
مانا کہ ایک عمر سے ٹھہری ہوئی ہے رات
انسان ہیں امیدِ سحر کیسے چھوڑ دیں
خیر‘ اب میری فصیلِ شہر بھی کیا دور ہے
جنگلوں تک آ چکا پیکِ سحر سنتا ہوں میں
ہم نے پہلے بھی مآل شبِ غم دیکھا ہے
آنکھ اب کے جو کھلے گی تو سحر ہے سائیں
یہاں بھی دل میں دیے جلتے بجھتے رہتے ہیں
ہمارے گھر بھی سحر آتی جاتی رہتی ہے
ہوئی ہے شاخ نوا تازہ تر، سلام تجھے
مسافتوں کی ہوائے سحر سلام تجھے
اب ایک خیمہ لگے دشمنوں کی بستی میں
دعائے شب کو نشانِ سحر بنایا جائے