انشاء اللہ خان انشا

یہ عجیب ماجرا ہے کہ بروز عیدِ قرباں
وہی ذبح بھی کرے ہے وہی لے ثواب الٹا

بہادر شاہ ظفر

کیا جو قتل مجھے تم نے خوب کام کیا
کہ میں عذاب سے چھوٹا تمہیں ثواب ہوا

داغ دہلوی

ہماری آنکھوں نے بھی تماشا عجب عجب انتخاب دیکھا
برائی دیکھی، بھلائی دیکھی، عذاب دیکھا، ثواب دیکھا

مصحفی غلام ہمدانی

میں عجب یہ رسم دیکھی مجھے روزِ عیدِ قرباں
وہی ذبح بھی کرے اور وہی لے ثواب الٹا
قربانی آج در پہ ترے کرنی ہے مجھے
لے کر کے تیغ تو بھی برائے ثواب آ

جون ایلیا

بھول جانا نہیں گناہ اسے
یاد کرنا اسے ثواب نہیں

جگر مراد آبادی

میری بربادیاں درست مگر
تو بتا کیا تجھے ثواب ہوا

عبدالحمید عدم

مار دو مجھ کو رحم دل ہو کر
کیا یہ کارِ ثواب کرتے ہو

عرفان صدیقی

تو اور کوئی راز ہے مرے سخن کا‘ صاحبو!
کہ یہ عذابِ جاں فقط ثواب کے لیے نہیں

اختر شیرانی

جہاں میں اب کوئی صورت پئے ثواب نہیں
وہ مے کدے نہیں ساقی نہیں شراب نہیں
تو واعظوں کی نہ سن میکشوں کی خدمت کر
گنہ ثواب کی خاطر ثواب ہے ساقی
سمجھ کے اس کو غفور‌‌ الرحیم پیتا ہوں
نہ چھیڑ ذکر عذاب و ثواب پینے دے

ظہیر کاشمیری

جس دور کو فقیہ نے عصیاں سمجھ لیا
اس دور میں تو پی کے بہکنا ثواب تھا

شکیل بدایونی

ہم سے مے کش جو توبہ کر بیٹھیں
پھر یہ کارِ ثواب کون کرے

احمد فراز

بھلا ہوا ہم گناہ گاروں نے ضد نہیں کی
سمیٹ کر لے گیا ہے ناصح ثواب سارے

امیر مینائی

ہزار بار گلا رکھ دیا تہِ شمشیر
میں کیا کروں تری قسمت ہی میں ثواب نہ تھا
چومے جو اس کا مصحفِ رخ زلف میں پھنسے
مارِ عذاب بھی ہے طریقِ ثواب میں

شاذ تمکنت

فرات آج رواں ہے یزید پیاسا ہے
یہ پیاس کوئی بجھا کر ثواب کیا لیتا

فراق گورکھپوری

یہ اگلے وقتوں کے ہیں خوش ہیں باغ جنت میں
انہیں خبر ہی نہیں کیا ہے اس ثواب کی آنچ